رەسەي جولبارىستارى قىتايعا قاشىپ جاتىر
وسىدان ءبىراز ۋاقىت بۇرىن كۋزيا دەپ اتالاتىن امۋر جولبارىسى رەسەي-قىتاي شەكاراسىن كەسىپ وتكەنى بەلگىلى.
ال ونىمەن بىرگە جۇرگەن يلونا قىتاي شەكاراسىنا جاقىن 5 شاقىرىمدا ۇستالىپ، كەرى قايتارىلدى.
مامانداردىڭ ايتۋىنا قاراعاندا، ولار بەسەۋ بولاتىن. كۋزيا، ۋستين، بوريا، يلونا جانە سۆەتلايا وسىدان ەكى جىل بۇرىن قيىر شىعىستاعى تايگادان تابىلدى. ولاردىڭ ۇشەۋىن كۋزيا، ۋستين، بوريا، يلونانى رەسەي پرەزيدەنتى پۋتين قورىقتان نۋ ورمانعا بوساتىپ جىبەرگەنى بەلگىلى. ال ولاردىڭ قاي جەردە جۇرەتىنىن ماماندار جەر سەرىگى ارقىلى باقىلاپ وتىرادى. ويتكەنى جولبارىستاردىڭ موينىنا بىلەزىك تاعىلعان.
ال قىتاي شەكاراسىنان ءوتىپ كەتكەن ۋستين ەندى كەرى ورالا ما؟ ارناۋلى ينسپەكتسيالىق باقىلاۋ مەكەمەسىنىڭ ماماندارى ءوزىنىڭ قولايلى ءومىر ءسۇرۋى ءۇشىن ىڭعايلى ايماقتى ىزدەپ جۇرگەن كورىنەدى. سوندىقتان ول كەز كەلگەن ۋاقىتتا بۇرىنعى جەرىنە قايتا كەلۋى ىقتيمال.
باقىلاۋشى ماماندار ۋستين 11 -قاراشا كۇنى قىتاي اۋماعىنا وتكەنىن ايتادى. قازىر ول رەسەي شەكاراسىنان ارى التى شاقىرىم جەردە ءجۇر. ونى قىتاي جاعى باقىلاپ وتىر. ال ودان ءبىر اي بۇرىن قىتاي اسقان كۋزيا مامانداردىڭ ايتۋىنا قاراعاندا، قولايلى ايماقتا ءجۇر.
ءبىراق رەسەيلىك باقىلاۋشىلار جولبارىستاردىڭ قىتاي جەرىندە بولۋى قاۋىپتىرەك دەگەن وي ايتىپ وتىر. ويتكەنى وندا قاراقشىلار كوپ، ولاردى ۇستاۋ جانە باقىلاۋ دا وڭاي بولماي تۇر. جەرگىلىكتى شارۋالار مالعا، ادامعا ءقاۋىپ توندىرەدى دەپ جولبارىستاردى جەر جاستاندىرۋى مۇمكىن.
قازىرگى ۋاقىتتا پريمورە جانە حاباروۆسك اۋماعىندا 500 گە جۋىق امۋر جولبارىسى بار كورىنەدى. سونىمەن قاتار سيرەك كەزدەسەتىن مۇنداي جىرتقىش جانۋارلار سولتۇستىك كورەيا مەن قىتايدىڭ سولتۇستىك شىعىسىندا بار.
دايىنداعان بەرىك بەيسەن ۇلى
«ايقىن»