وزبەكستان پرەزيدەنتىنىڭ ۇلكەن قىزى سوتتالادى
06:59, 13 - قاراشا 2014
استانا. قازاقپارات - وزبەكستان پرەزيدەنتىنىڭ ۇلكەن قىزى گۇلنار كاريموۆاعا اسا اۋىر قىلمىسقا قاتىسى بار دەگەن ايىپ تاعىلدى. تەرگەۋشىلەردىڭ ايتۋىنشا، ول 2011-2013-جىلداردا شارۋاشىلىق قىزمەت سالاسىندا ءارتۇرلى الاياقتىقتار جاساعان قىلمىستىق توپتىڭ مۇشەسى بولعان.
بۇل تۋرالى Bnews.kz حابارلايدى.
جەرگىلىكتى Fergananews.com سايتىنىڭ حابارلاۋىنشا، بۇل قىلمىستىق توپ بوپسالاۋ، قورقىتۋ جانە قولدان قۇجاتتار جاساۋ ىستەرىمەن اينالىسىپ، مەملەكەتكە اسا ءىرى مولشەردە شىعىن كەلتىرگەن.
باس پروكۋراتۋرا قىزمەتكەرلەرىنىڭ حابارلاۋىنشا، قىلمىستىق توپقا مۇشە ازاماتتار شەنىنە، لاۋازىمدارىنا قاراماي، ءتيىستى جازالارىن الاتىن بولدى. ولاردىڭ اراسىندا ەل پرەزيدەنتىنىڭ ۇلكەن قىزى گۇلنار كاريموۆا دا بار. قىلمىسكەرلەر اقشا جىمقىرۋدان بولەك، بىرنەشە ادامدى ەرىكسىز تۇردە قاماۋدا ۇستاعان. وسى وقيعاعا بايلانىستى تەرگەۋ جۇمىستارىمەن اينالىسۋدى اسكەري سوت ءوز قولىنا الدى.