عالىمدار ەلەستىڭ پايدا بولۋ قۇپياسىن اشتى
ميدىڭ ادامنىڭ قيمىلدارى مەن ونىڭ كەڭىستىكتە ورنالاسۋى تۋرالى اقپاراتتاردى جينايتىنى بەلگىلى. عالىمدار سەنسورلى- قوزعالتقىش اپپاراتىن ادامدار سيگنالداردى ءوزىنىڭ ەمەس، باسقا دەنەدەن شىعىپ جاتقانىن سەزىنەتىندەي اۋىستىرىپ، زەرتتەۋ جاسادى. كوزى بايلاۋلى ەرىكتىلەر قولدارىن العا قاراي قارماي باستايدى، ال ولاردىڭ ءىسىن ارتىندا تۇرعان روبوت قايتالاپ وتىردى.
سودان كەيىن ماماندار ادامدار مەن روبوتتاردىڭ قيمىلىن بىردەي ەتۋدى دوعارادى. بۇل كىدىرىس جارتى سەكۋندقا سوزىلسا دا، ادام ەلەستى سەزە باستايدى. ءۇش مينۋت وتكەن سوڭ عالىمدار ەرىكتىلەردىڭ نە سەزگەنىن سۇرايدى. ولار جاندارىندا بىرەۋدىڭ پايدا بولعانىن ايتتى، كەيبىرى ءتىپتى ءتورت ەلەستىڭ بولعانىن جەتكىزدى. اسەردىڭ كۇشتى بولعانى سونشالىقتى، ەرىكتىلەر زەرتتەۋدى توقتاتۋدى سۇرادى.
سونىمەن بىرگە، پسيحيكالىق اۋىتقۋشىلىقتارى بار 12 پاتسيەنت زەرتتەلدى. ونىڭ بارلىعى دا ەلەستى كورگەنىن ايتقان. سويتسە، ناۋقاستاردىڭ ميىنىڭ ءوزىن-ءوزى تانۋعا، قوزعالىسقا جانە كەڭىستىكتە ءوزىنىڭ ورانالاسۋ سەزىمىنە جاۋاپ بەرەتىن بولىكتەرى زاقىمدانعان ەكەن.
«ميىمىزدا دەنەمىزدىڭ كەڭىستىكتە ورنالاسۋى تۋرالى اقپارات الاتىن بىرنەشە قاينارى بار. قالىپتى جاعدايدا ادام ولاردان ءوزىنىڭ تۇتاس وبرازىن جينايدى. ءبىراق جۇيە بۇزىلعاندا - اۋرۋ كەزىندە نەمەسە ءدال وسى جاعدايداعىداي روبوتتىڭ اسەرى بولعاندا ادامدا ءوز دەنەسىنىڭ ەكىنشى وبرازى پايدا بولادى، ونى مي ءوزى دەپ ەمەس، وزگە ءبىر دەنە دەپ قابىلدايدى»، - دەدى زەرتتەۋدىڭ جەتەكشى اۆتورى دجۋليو رونيني. بۇل جاڭالىقتى اشقان عالىمدار ەندىگىدە ادامدار ەلەسكە سەنبەيتىن بولادى دەپ ەسەپتەيدى.
tengrinews.kz