التى ەل بىرىگىپ قارا تەڭىز كۇنىن اتاپ ءوتتى

استانا. قازاقپارات - 1996 - جىلى قارا تەڭىز ماڭىنداعى التى ەل - بولگاريا، رۋمىنيا، تۇركيا، گرۋزيا، رەسەي، ۋكراينا قارا تەڭىزدى وڭالتۋ جانە قورعاۋ جونىندەگى ءىس- ارەكەتتىڭ ستراتەگيالىق جوسپارىنا قول قويدى.

سونىڭ قۇرمەتىنە حالىقارالىق قارا تەڭىز كۇنى اتالىپ ءوتىلدى، دەپ حابارلادى «روس بالت» .

بۇل جوسپار تەڭىز ورتاسىنا جان- جاقتى زەرتتەۋ جۇرگىزگەننەن كەيىن ازىرلەنگەن. زەرتتەۋ بارىسى ونىڭ ءومىر ءسۇرۋ قابىلەتى وتكەن ءۇش ونجىلدىققا قاراعاندا، ەداۋىر ناشارلاعانىن كورسەتكەن.

ايتا كەتەيىك، قارا تەڭىزدىڭ ەڭ تەرەڭ جەرى 2210 مەتر بولسا، باتىستان شىعىسقا قاراي ۇزىندىعى شامامەن 1150 شاقىرىم. سولتۇستىكتەن وڭتۇستىككە قاراي تەڭىز 580 شاقىرىمعا جايىلعان.

تەڭىزدىڭ وسىمدىكتەر الەمى كوپ جاسۋشالى، جاسىل، قوڭىر، قىزىل سۋ تۇبىندەگى بالدىرلاردىڭ 270 ءتۇرىن قامتيدى. فيتوپلانكتون قۇرامىندا - كەمىندە 600 ءتۇرى بار.

قارا تەڭىزدە 2500 دەن استام جانۋارلار ءتۇرى مەكەن ەتەدى.