قىتايدا شىعارىلاتىن قازاق پەرنەتاقتاسىنىڭ اۆتورلارى ءوندىرىستى قازاقستانعا كوشىرۋ ءۇشىن قارجى ىزدەپ ءجۇر
تۇرعامبايەۆ ءۇش مىڭعا جۋىق قازاق پەرنەتاقتاسىنىڭ قازاقستان مەكتەپتەرىنە تاراتىلعاندىعىن ايتىپ وتىر. جاساپ شىعارۋشىلار پايدالانۋشىلاردىڭ گادجەت تۋرالى پىكىرلەرىن دە العان، ولاردىڭ 80 پايىزى كوڭىلدەرى تولاتىندىعىن بىلدىرگەن. سونىمەن قاتار جوبا اۆتورلارى پاتەنت الۋ ءۇشىن قۇجاتتارىن وتكىزگەن. بۇل ولاردىڭ قارجى گرانتىن الۋ ءۇشىن تەحنولوگيالىق دامۋ جونىندەگى ۇلتتىق اگەنتتىككە (ت د ج ۇ ا) ءوتىنىش جاساۋىنا مۇمكىندىك بەرەدى. «سونىمەن قاتار، قازاقستانداعى بارلىق مەكتەپتەردى وسى پەرنەتاقتالارمەن قامتاماسىز ەتۋ ءۇشىن، ۇكىمەتتىك دەڭگەيدە تاپسىرىس بەرۋشىلەردى ىزدەۋ جۇمىستارى جۇرگىزىلۋدە»، - دەيدى جوبا جەتەكشىسى.
«قازىر قۇجات اينالىمى ەكى تىلدە بىردەي جۇرگىزىلۋدە. ءبىز پەرنەتاقتامەن تەك مەكتەپتەردى عانا ەمەس، ۇلتتىق كومپانيالاردى دا قامتاماسىز ەتۋگە نيەتتىمىز»، - دەپ قوستى تۇرعامبايەۆ. بۇل رەتتە ول جوبانى قارجىلاندىرۋ پەرنەتاقتا جاساپ شىعاراتىن جابدىقتاردى ساتىپ الۋ ءۇشىن كەرەكتىگىن اتاپ ءوتتى. ولار پەرنەتاقتالاردى «الاتاۋ» يننوۆاتسيالىق تەحنولوگيالار پاركى» ە ە ا بازاسىندا جاساپ شىعارۋعا نيەتەنىپ وتىر.
ايتا كەتەيىك، قازاق پەرنەتاقتاسى تۇساۋى كەسىلگەننەن بەرى ءبىرقاتار وزگەرىستەردى باسىنان كەشتى. بۇرىن ايرىقشا پەرنەلەرى گادجەتتىڭ شەتتەرىنە ورنالاستىرىلعان بولاتىن، ەندى ولار ورتاسىنا شوعىرلاندىرىلعان. سونىمەن قاتار مۋلتيمەديالىق باعدارلامالاردى باسقاراتىن پەرنەلەر دە قوسىلعان.