اتىراۋدىڭ بالىعى ەلوردالىقتاردىڭ زور سۇرانىسىنا يە
جارمەڭكەنى استانا قالاسىنىڭ اكىمى يمانعالي تاسماعامبەتوۆ پەن باتىس قازاقستان وبلىسىنىڭ اكىمى نۇرلان نوعايەۆ ارالاپ شىقتى.
«بۇگىن مىنە وزدەرىڭىز كورىپ وتىرعانداي، استاناعا ەلىمىزدىڭ ەكى ۇلكەن باتىس ولكەسى اتىراۋ مەن باتىس قازاقستان وبلىستارى ات باسىن بۇرىپ وتىر. وسىعان دەيىن جارمەڭكەسىن وتكىزگەن ايماقتار سياقتى ولار دا ءوز وڭىرلەرىندە ونىدىرىلەتىن ونىمدەرىن اكەلىپ، حالىققا ۇسىنۋدا. باتىس قازاقستان وبلىسى ەتتەن باستاپ، كوكونىسكە دەيىن 500 توننادان استام ازىق-تۇلىك اكەلدى. جالپى، اكەلىنگەن ونىمدەر قالاداعى بازارلاردىڭ باعاسىمەن سالىستىرار بولساق 15-20 پايىزعا ارزان ساۋدالانۋدا»، - دەدى ەلوردا اكىمى.
سونىمەن قاتار ي. تاسماعامبەتوۆ اتىراۋ وبلىسى مۇنايلى ولكە بولعاندىقتان اۋىل شارۋاشىلىعى باسقا وڭىرلەرمەن سالىستىرعاندا جاقسى دامىماعاندىعىن قاپەرگە سالدى. سونداي-اق ونىڭ باستى سەبەبى ايماقتىڭ اۋا رايى جايسىزدىعىنا، جەر قۇنارىنىڭ اۋىل شارۋاشىلىعىن دامىتۋعا كەلمەيتىندىگىندە ەكەندىگىن اتاپ ءوتتى.
«سوندىقتان دا اتىراۋدىڭ ەڭ باستى اكەلگەن تاۋارى - بالىق ءونىمى. بىلتىرعى جارمەڭكەدە بالىق ونىمدەرىنە سۇرانىس جوعارى بولعاندىقتان وسى جولى ءدال وسى ونىمگە باسا نازار اۋدارىپ، مولىنان اكەلدى»، - دەدى قالا باسشىسى.
شىنىمەن دە، بۇل جولى اتىراۋ وبلىسى جارمەڭكەگە سازان، تابان، كوكسەركە سىندى 60 توننا بالىق اكەلگەن ەكەن. ءدال وسى ونىمدەرگە ەلوردالىقتاردىڭ تارابىنان سۇرانىستىڭ جوعارى ەكەندىگى انىق بايقالادى. بالىق ساتىپ الۋ كەزەگىندەگى قالالىقتاردىڭ سانى از ەمەس.