جانار بايسەمىزوۆا: تىلدەن ماقۇرىم... قازاقتىڭ تاعى ءبىر ۇرپاعى ءوسىپ كەلەدى
كەڭەس وداعىنىڭ قۇرامىندا بولعان مەملەكەتتە قازىر ءبىر اۋىز ورىسشا جازىلعان تاقتايشا جوق.
قاراپايىم حالىق تا، شەندىلەر دە، بايلار دا، بالالار دا تەك گرۋزين تىلىندە سويلەيدى. ۇكىمەت وتىرىستارى، دەپۋتاتتار جيىنى تەك گرۋزين تىلىندە وتەدى، پرەزيدەنت تە انا تىلىندە ايتادى ءبارىن.
كەزدەسكەن گرۋزيندەردىڭ بارىنەن سۇراپ شىقتىم: «گرۋزين ءتىلىن بىلمەيتىن گرۋزين بار ما؟». بەتىڭە باقىرايىپ قارايدى، كوزىنەن "ەسىڭ دۇرىس پا؟" دەگەن ءسوزدى وقيسىڭ... سوسىن، شامدانىپ-رەنجىپ شىعا كەلەدى: «انا تىلىنەن ماقۇرىم گرۋزين جوق، بولعان ەمەس، بولمايدى دا!». گرۋزين حالقىنان وسىنداي جاۋاپ العاندا قۋاناسىڭ، ءتىپتى تاڭ قالاسىڭ! دارىگەرلەرى دە تەك گرۋزين تىلىندە سويلەيدى. بۇرىنعى بۋىن اراسىندا ورىسشا بىلمەيتىن نەمەسە شالا سويلەيتىن گرۋزيندەر كوپ! ورىسشا سوزدەردى دۇرىس ايتپايتىندارىن قور سانامايدى. جاستار جاعى ورىسشانى تۇسىنبەيدى دە! وزدەرى ءبىزدى قورعاپ قالعان ءدىنىمىز، سەنىم بولماسا باياعىدا-اق جەر بەتىنەن جوعالىپ كەتەر ەدىك، - دەپ سانايتىن گرۋزيندەردىڭ رۋحى قانداي بيىك ەدى. انا ءتىلىن ارداقتاعان گرۋزين ۇلتىن شەكسىز جاقسى كورىپ كەتتىم...
P. S. استانا. اۋلا. "كىشكەنتاي قازاقتار" وزگە تىلدە شۇلدىرلەپ ءجۇر. تىلدەن ماقۇرىم... قازاقتىڭ تاعى ءبىر ۇرپاعى ءوسىپ كەلەدى...
جانار بايسەمىزوۆا
Facebook-تەگى پاراقشاسىنان