ن. نازاربايەۆ رەسەي پاتريارحى كيريللدى شاقىردى - فوتو

استانا. قازاقپارات - قازاقستان رەسپۋبليكاسى پارلامەنتى سەناتىنىڭ ءتوراعاسى قاسىم-جومارت توقايەۆ ماسكەۋگە جۇمىس بابىنداعى ساپارى اياسىندا ماسكەۋ جانە كۇللى رەسەي پاتريارحى كيريللمەن كەزدەستى.

سەنات ءتوراعاسى، الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى ماسكەۋ جانە كۇللى رەسەي پاتريارحىنا قازاقستان پرەزيدەنتى ن. نازاربايەۆتىڭ اماندىق پەن دەنساۋلىقتا بولۋىنا تىلەكتەستىگىن جانە شىنايى قۇرمەتىن جەتكىزدى.

پاتريارح كيريلل پراۆوسلاۆ اۋليەسى سەرگي رادونەجسكيدىڭ 700 جىلدىعىن مەرەكەلەۋگە وراي استانادا ەسكەرتكىش ورناتىلعانى ءۇشىن مەملەكەت باسشىسى ن. نازاربايەۆقا العىس ايتتى.

«مەنىڭ ەڭ ىزگى تىلەكتەرىمدى ءوزىم اسا قۇرمەتتەيتىن پرەزيدەنتكە جەتكىزۋدى وتىنەمىن. ول جانە بارلىق قازاق جۇرتشىلىعى ءدىني قاتىناستاردىڭ جوعارى دەڭگەيىنە قول جەتكىزە الدى. بۇل سىزگە ءدىني ليدەرلەر سەزىن شاقىرۋ تۋرالى حالىقارالىق دەڭگەيدە ماڭىزدى باستامامەن شىعۋعا مۇمكىندىك بەرەدى»، - دەپ اتاپ ءوتتى پاتريارح.

سەنات ءتوراعاسى استانا فورۋمىن جان-جاقتى قولداعانى ءۇشىن پاتريارحقا العىس ايتىپ، ماسكەۋ جانە كۇللى رەسەي پاتريارحىنىڭ سەزد جۇمىسىنا جەكە قاتىسۋى جانە ءدىني ليدەرلەر كەڭەسىنە ەنۋى ءدىني ءسامميتتىڭ ماقساتىنا جەتۋگە قوسقان زور ۇلەسىنىڭ جارقىن كورىنىسى بولعانىن اتاپ ءوتتى. سەزد حاتشىلىعىنىڭ باسشىسى ماسكەۋ جانە كۇللى رەسەي پاتريارحىنا قازاقستان پرەزيدەنتى ن. نازاربايەۆتان 2015-جىلعى 10-11- ماۋسىمدا استانادا وتەتىن V سەزگە جەكە شاقىرۋىن جەتكىزدى. V سەزدىڭ باستى تاقىرىبى «بەيبىتشىلىك پەن دامۋ جولىندا ءدىني ليدەرلەر مەن ساياسي قايراتكەرلەردىڭ ءۇن قاتىسۋى» دەپ اتالادى.

«الەمدىك جانە ءداستۇرلى دىندەر ليدەرلەرىنىڭ V سەزىنە ءسىزدىڭ ءوزىڭىزدىڭ قاتىسۋىڭىز دىندەر مەن مادەنيەتتەردىڭ ءۇن قاتىسۋىن ودان ءارى دامىتۋعا باعىتتالعان ورتاق ءىستى ودان ءارى ىلگەرىلەتۋگە، جاھاندىق دەڭگەيدەگى ءوزارا تۇسىنىستىك پەن تۇراقتىلىقتى دامىتۋعا ىقپال ەتەتىنى كۇمانسىز»، - دەدى ق. توقايەۆ.

پاتريارح كيريلل قازاقستان پرەزيدەنتى ن. ءا. نازاربايەۆتىڭ باستاماسى بويىنشا شاقىرىلعان فورۋم ماڭىزدى جانە ءتيىمدى ءۇن قاتىسۋ الاڭى بولىپ تابىلاتىنىن اتاپ ءوتتى.

«بۇل فورۋم تەك ءدىني قاۋىمداستىقتىڭ عانا ەمەس، قازىرگى زامانداعى ادامزات وركەنيەتىنىڭ جاعدايى كوتەرىلەتىن ماسەلەلەر بويىنشا حالىقارالىق ءۇن قاتىسۋعا ارنالعان تابىستى الاڭ بولىپ تابىلاتىنى داۋسىز. ءبىز بۇل كۇش-جىگەردىڭ ءبارىن باعالايمىز»، - دەدى پاتريارح كيريلل.

سول كۇنى سەنات ءتوراعاسى قازاقستان پراۆوسلاۆ شىركەۋىنىڭ رەسەيدەگى وكىلدىگىندە بولدى، سونداي-اق رەسەي س ءى م ماسكەۋ مەملەكەتتىك حالىقارالىق قاتىناستار ينستيتۋتىنىڭ 70 جىلدىعىنا وراي كرەمل سارايىندا وتكەن سالتاناتتى جينالىسقا قاتىستى.

اۆتور: سەرىك قاراجان