قازاقتىڭ باتىرى «اجەتحانا تازالايدى» ەكەن
ويتكەنى، «باتىر» دەگەن ۇلتتىق برەنتپەن اجەتحانانى تازالاۋعا ارنالعان حيميالىق ۇنتاق شىعارىلا باستادى، - دەپ حابارلايدى «الاش ايناسى» باسىلىمى.
الەۋمەتتىك جەلىلەردە بۇل ماسەلە كەڭىنەن تالقىلانىپ جاتىر. ولاردىڭ دەنى ۇلتتىق سانادان باتىر اتاۋىنا دەگەن قۇرمەتتى ءوشىرىپ تاستاۋ ءۇشىن جاسالىنىپ جاتۋى مۇمكىن ەكەنىن ايتادى.
باتىر - ەلدى قورعاۋ جولىندا ەرلىك ىستەگەن ەرلەرگە عانا بەرىلەتىن ەسىم. قازاق حالقى قولىنا تۋ ۇستاپ، ارتىنا ىلەسەر قول جيناپ، توپ باستاعان وعلانىن عانا باتىر سانايدى.
بۇل اتاۋدى مانسۇقتاپ، اجەتحانا تازالاعىش ۇنتاققا قويعان «كاز بىت حيم» - نىڭ نە ويلاعانى بار؟ اجەتحانانى كىم تازالايدى؟ اسىلىندە بۇل ايەل ازاماتتىڭ جۇمىسى... ەندەشە، نەلىكتەن ەرلەرگە لايىق باتىر ەسىمى بەرىلىپ وتىر؟ جوق الدە، ءبىزدىڭ بۇگىنگى قىز-كەلىنشەكتەرىمىز اجەتحاناعا «باتىرمەن قول ۇستاسىپ» بارسىن دەگەنى مە؟ نەمەسە «پاتشالار جاياۋ باراتىن سارايدى» تازالاۋ ەرلىككە باعالانا باستاعانى ما؟ قوش. جالپى، ءبىر اۋىز سوزبەن ايتقاندا قازاقتىڭ ۇلتتىق سيپاتىن، ۇلتتىق مىنەزىن بىلدىرەتىن وسىنداي قاسيەتتى سوزدەردى اجەتحاناعا «سۇيرەۋ» دۇرىس ەمەس.
ءبىز بۇرىن اسكەري ونەردى جاقسى مەڭگەرگەن، اقىلدىلىعىمەن، اسقان قايراتىمەن، ەرلىگىمەن اتى شىققان ازاماتتاردى باتىر دەيتىنبىز. ەندى شە؟ اجەتحانا تازالايتىن ۇنتاقتىڭ اتاۋى «باتىر» بولىپ تۇرسا، قاي قازاقتىڭ بالاسى باتىرلىققا ۇمتىلا قويسىن!