ەلباسى ءتورتىنشى زاۋىتتىڭ ورنىنا شىمكەنت مۇناي وڭدەۋ زاۋىتىن كەڭەيتۋ تۋرالى ۇكىمەت ۇسىنىسىن قولدادى

استانا. قازاقپارات - ەلباسى ەلىمىزدە ءتورتىنشى مۇناي وڭدەۋ زاۋىتىن سالماي- اق، ونىڭ ورنىنا شىمكەنت مۇناي وڭدەۋ زاۋىتىن كەڭەيتۋ تۋرالى ۇكىمەتتىڭ ۇسىنىسىنا قولداۋ ءبىلدىردى.

بۇل تۋرالى بۇگىن پارلامەنت ءماجىلىسىنىڭ ەكولوگيا جانە تابيعاتتى پايدالانۋ كوميتەتىنىڭ كەڭەيتىلگەن وتىرىسىندا ەنەرگەتيكا ۆيسە- ءمينيسترى ۇزاقباي قارابالين ءمالىم ەتتى.

 ۆيسە- ءمينيستردىڭ ايتۋىنشا، بۇگىنگى كۇنى قازاقستانداعى ءۇش مۇناي وڭدەۋ زاۋىتىنىڭ شىعارىپ وتىرعان ءونىم كولەمى ىشكى سۇرانىستىڭ تەك 70 پايىزىن عانا قامتي الادى. وسىعان بايلانىستى ەلباسى بولاشاقتا ءتورتىنشى زاۋىت سالۋ ماسەلەسىن قاراستىرۋدى ۇسىنعان بولاتىن. «قازىرگى تاڭدا ءۇش زاۋىتتا قايتا جاڭعىرتۋ جۇمىستارى وتۋدە. قايتا جاڭعىرتۋداعى ەڭ ءبىرىنشى ماقساتى - ءار زاۋىتتىڭ ءوندىرۋ قۋاتىن ارتتىرۋ. قازىرگى جاعدايدا ءبىزدىڭ زاۋىتتىڭ ءارقايسىسى 14 ميلليون توننا توڭىرەگىندە مۇناي وڭدەيتىن بولسا، جاڭعىرتۋ جۇمىسىنان سوڭ 18,5 ميلليون توننالىق كورسەتكىشكە قول جەتەتىن بولادى. بۇل تەك 2016 -جىلدان كەيىن ورىن الادى»، - دەدى ۇزاقباي قارابالين.

ونىڭ سوزىنە قاراعاندا، دۇنيەجۇزىندەگى تاجىريبە بويىنشا جاڭا زاۋىت سالۋ بارىسىندا ونىڭ تيىمدىلىگى نەگىزىنەن 10 ميلليون توننا ءونىمدى وندىرە الاتىنداي اۋماقتا قاراستىرىلادى. ياعني، ءدال وسىنداي كورسەتكىش بولعاندا عانا جاڭا زاۋىت سالۋ ءوزىن- ءوزى اقتاي الادى.

«جاڭا زاۋىتتىڭ وسىنداي قۋاتىن سالۋ ءۇشىن بىزگە 6-8 ميلليارد دوللارعا دەيىن قاراجات كەتەدى. ەكىنشىدەن، بولاشاقتا قاجەتتى جانار- جاعارمايدىڭ كولەمىن ەسكەرە وتىرىپ، ءبىز ەلباسىنا ۇكىمەتتىڭ اتىنان ۇسىنىس ەنگىزدىك. وندا جاڭا زاۋىتتىڭ ورنىنا شىمكەنتتەگى مۇناي وڭدەۋ زاۋىتىن كەڭەيتۋدى ۇسىندىق. بۇل ۇسىنىستى ەلباسى قولدادى»، - دەدى ۇ. قارابالين.

 ونىڭ سوزىنە قاراعاندا، شىمكەنتتەگى زاۋىتتىڭ كەڭەس وداعى تۇسىندا جاسالعان ينفراقۇرىلىمدىق جوباسى 12 ميلليون تونناعا نەگىزدەلگەن. سوندىقتان دا، قازىرگى تاڭدا جاڭا زاۋىت قۇرىلىسىنان گورى شىمكەنت م ءو ز كەڭەيتۋ ءتيىمدى بولماق.

 «بىرىنشىدەن، بۇعان كەتەتىن شىعىن دا ازايادى، تيىمدىلىگى دە ارتادى. ماسەلەن، سول وڭىردە حالىقتىڭ شوعىرلانۋى جاقسى، ياعني سۇرانىس تا ارتادى. سۇرانىستان ارتىلعان ونىمدە وڭتۇستىكتەگى كورشىلەرگە قاراي بەرىلۋى ىقتيمال. ويتكەنى، سولتۇستىكتەگى رەسەيگە ەكسپورتتاۋ مۇمكىن ەمەس، قىتاي دا ءوزىنىڭ مۇناي وڭدەۋ زاۋىتىن سالىپ الدى، باتىستا ازەربايجاننىڭ مۇنايى بار. ال شىمكەنتتەگى مۇنايدىڭ ارتىلعانىن وزبەكستان، قىرعىزستان، اۋعانستان مەن تاجىكستانعا جونەلتۋگە مۇمكىندىك بار. سوندىقتان دا، ەڭ ءتيىمدى نۇسقاسى - ءتورتىنشى زاۋىتتىڭ ورنىنا شىمكەنتتەگى مۇناي وڭدەۋ زاۋىتىن كەڭەيتۋ بولىپ وتىر»، - دەيدى ۇ. قارابالين.

«ءبىزدىڭ ساراپتامالارىمىز بويىنشا كەلەشەكتە ءبىزدىڭ ەلىمىزدىڭ جاعدايى كوتەرىلىپ، يندۋستريالىق قۋات قارقىن الا باستاعان سايىن جانار- جاعارمايدىڭ سۇرانىسى دا ارتا تۇسەدى. ماسەلەن، 2021-2024 - جىلدار ارالىعىندا بىزدە تاپشىلىق بولۋى ىقتيمال، بۇل اسىرەسە ديزەلدىك وتىنعا قاتىستى بولىپ وتىر»، دەيدى ۇ. قارابالين.

 ونىڭ ايتۋىنشا، ديزەلدىك وتىنعا بۇل كەزەڭدەگى تاپشىلىق شامامەن 1 ميلليون -1,5 ميلليون توننا شاماسىندا ورىن الۋى ىقتيمال. «ال 2025 - جىلعا قاراي ءبىز وزىمىزدەگى مۇناي وڭدەۋشى زاۋىتتاردىڭ كۇشىن قوسىمشا ارتتىرۋىمىز كەرەك»، - دەدى ۆيتسە- مينيستر.