شۆەتسيا قازاقتارىنىڭ تىرشىلىگى - فوتو
ونىڭ 55 ءتۇتىنى ۆەستوروس قالاسىندا تۇرادى.
ۆەستوروسقا ستوكگولمنەن كۇن سايىن كوشىپ كەلىپ جاتقان اعايىن تاعى بار.
تۇركيادان دا قونىس اۋدارعان قازاقتار وسىندا تۇراقتاپتى. شۆەد ازاماتتارىنا تۇرمىسقا شىققان قازاق قىزدارىنىڭ دا سانى ءبىرشاما. ولاردىڭ ءداستۇر، ءدىني كوزقاراستارى بىزدەن وزگەشە - دەيدى سونداعى اعايىندار.
شۆەتسيا - كەيىنگى جىلدارى قازاق قانداستارىمىزدىڭ سانى تەز وسكەن ەلدىڭ بىرىنە اينالدى. قازاق اۋىلدارىنىڭ كەڭ قانات جايۋىنا سەبەپ بولىپ وتىرعان جايتتىڭ ءبىرى ەۋروپادا ءوتىپ تۇراتىن كىشى قۇرىلتايلار.
جاستار جاعى جوعارى وقۋ ورىندارىندا ءبىلىم الادى، ءارتۇرلى كاسىپپەن شۇعىلدانۋعا دا مۇندا مۇمكىندىك جاسالعان. زەينەتكە شىققان قارتتارىمىز قول قۋسىرىپ وتىرماي، جاستاردىڭ تاربيەسىنە، ءتىلدى ۇمىتپاۋىنا مىقتاپ دەن قويعان.
ونىڭ دالەلى - ەۋروپانىڭ باسقا قالالارىنداعى قانداستارىمىز سياقتى ەمەس، مۇنداعى از قازاق ءتورت قوعامدا بىرلەسە جۇمىس ىستەيدى. وسىنداي كەلەلى باسقوسۋدى ۇيىمداستىرىپ وتىرعان قازاق مادەنيەت ورتالىعى قاناتىنىڭ استىندا تاعى دا «جاستار مادەنيەت ورتالىعى»، «ايەلدەر قولونەر مەكتەبى»، (اجەلەر بىرلەستىگى) جۇمىس ىستەسە، مۇنداعى «يسلام مادەنيەت ورتالىعىنىڭ» قىزمەتى - ءوز الدىنا ءبىر توبە.
«يسلام مادەنيەت ورتالىعى» 1995 - جىلدان بەرى ۇكىمەتتىڭ كومەگىمەن 1 جارىم ميلليون كرونعا مۇسىلمان مەشىتىنىڭ عيماراتىن ساتىپ العان ەكەن. اۋەلى شىركەۋ بولىپ، كەيىن جاستار تەاترىنا اينالعان بۇل عيماراتتى بۇكىل مۇسىلماننىڭ باسىن قوساتىن مەشىت جاساۋ ءىسى وڭايعا سوقپاعان. مەشىتكە 250 كىسى ەركىن سيادى.
جۇما نامازىن وتەۋگە مۇندا ارنايى 27 ولكەدەن مۇسىلماندار جينالادى. بۇكىل ۆەستوروستىڭ رۋحاني ورداسى دا، جالعىز مەشىتى دە وسى. اللا ءۇيىنىڭ جانىنان 2000 - جىلدان باستاپ 13-14 جاستاعى بالالاردى قۇران وقىتىپ ۇيرەتەتىن، ءدىني ءدارىس بەرەتىن مەكتەپ-ينتەرنات ەتىپ جاساپتى. مەشىتكە جەرگىلىكتى ءدىني ساۋاتى جاقسى، قۇران وقۋعا قابىلەتتى جاستار تارتىلعان.
بالالار مۇندا جاتاتىن توسەك-ورنى مەن تاماق ىشەتىن اسحانامەن قامتاماسىز ەتىلگەن ءارى جيناقى. جاستاردىڭ دىنگە بەتبۇرىسى وتە جاقسى دەيدى جەرگىلىكتى جۇرت. كوپ جاستار ورازا ۇستايدى. مۇسىلمانداردى جەرلەيتىن ارنايى ورىندا بولىنگەن.
ءار جىلى مۇندا مەشىت اتىنان اۋىزاشار بەرىلىپ تۇرادى. يمام احمەت باھادىر 1995 - جىلى مەشىت اشىلعان تۇستا ءتوراعا بولىپ سايلانعان. ۆەستوروس مەشىتىنە جەرگىلىكتى حالىقتىڭ كوزقاراسى ءتۇزۋ، ەلدىڭ ءدىني ساۋاتىن اشۋدا ءبىزدىڭ جۇمىسىمىز دەيدى احمەت. 1942 - جىلى التاي جايلاۋىنىڭ «قادىرات» اتتى مەكەنىندە دۇنيە ەسىگىن اشقان احمەت اعا كەزىندە 9 باتىردىڭ ءبىرى، اتاعىنان ات ۇرىككەن وسپان باتىردىڭ ەڭ سوڭعى اسكەري قولباسشىسى نۇرعوجا باتىردىڭ ۇرپاعى ەكەن. احمەت تۋرالى تولىعىراق تاعى جازاتىن بولامىز.
فوتو جازيرا امانتاي
BAQ. KZ