قازاقستاننىڭ اۋە قورعانىس سالاسى تاعى ءبىر جاڭا ۇشاقپەن تولىقتى
حاۆەر اپاريسيو، Airbus Military كومپانياسىنىڭ ۇشقىش- ۇيرەتۋشىسى:
- بۇل اۋە كولىگىمەن جۇك نەمەسە ادامداردى كەز كەلگەن جەرگە جەتكىزۋگە بولادى. ياعني، ارنايى قونۋ الاڭدارى قاجەت ەمەس. سونداي- اق ول بيىك جەرلەردە دە دەسانتتار مەن جۇكتەردى تۇسىرۋگە قاۋقارلى. ناقتىرەك ايتار بولساق، توتەنشە جاعدايلارعا ارنالعان امبەباپ ۇشاق.
2012 - جىلى قازاقستانعا وسىنداي 2 اسكەري- تاسىمال ۇشاعى اكەلىنگەن بولاتىن. سول ۋاقىتان بەرى وتاندىق ۇشقىشتار جاڭا كولىكتىڭ قىر- سىرىن جاقسى مەڭگەرىپ العان. ماماندار: «ۇشاق تولىقتاي كومپيۋتەرمەن جابدىقتالعاندىقتان، اۋادا وتە تۇراقتى ءارى باعىت تۋرالىعىن جاقسى ساقتايدى» ، - دەيدى. ونى باسقارۋعا ەكى ۇشقىش جەتكىلىكتى. سونداي- اق س-295 ۇشاعىنىڭ 42 پايىزى كومپوزيتسيالىق ماتەريالدان جاسالعاندىقتان، ول وزگە ۇشاقتارعا قاراعاندا 3 تونناعا جەڭىل. سوعان سايكەس ۇنەمدى.
عابيت ابدۋلوۆ، 53/975 اسكەري ءبولىمى باسشىسىنىڭ ورىنباسارى:
- بۇل ۇشاقتاردىڭ ارقاسىندا ءبىز اسكەري قىزمەتكەرلەرىمىزدى قازاقستان شەكاراسىنا جانە باسقا ەلدەرگە تاسىمالداۋعا تولىق قاۋقارىمىز بار. ءبىزدىڭ قۇرلىق اسكەرىمىزدىڭ جىلدامدىعى جانە ۇلكەن كۇش قۋاتى ارتا تۇسەدى. بۇگىن اكەلىنگەن ۇشاقتىڭ الدىنعىلارعا قاراعاندا ءبىرشاما وزگەشەلىكتەرى بار. ول ءبىزدىڭ اۋا رايى مەن جەر جاعدايلارىنا بەيىمدەلىپ جاسالعان.
جاڭا اۋە كولىكتەرى بۇگىنگە دەيىن ءتۇرلى اسكەري جاتتىعۋلاردا سىناقتان ءوتتى. ماسەلەن، تاياۋدا وتكەن شاڭحاي ىنتاماقتاستىعى ۇيىمىنىڭ «ارەكەتتەستىك 2014» وقۋ جاتتىعۋى كەزىندە وسى ۇشاقتان قازاقستاندىق ساربازدار پاراشيۋتپەن سەكىرىپ، بىلىكتىلىكتەرىن كورسەتتى.
ەۋروپالىق كونسەرن مەن قازاقستان اراسىنداعى كەلىسىم بويىنشا 2018 - جىلعا دەيىن ەلىمىزگە وسىنداي تاعى 5 ۇشاق اكەلىنبەك. 4 - ۇشاقتى وسى جىلدىڭ سوڭىندا جەتكىزۋ جوسپارلانىپ وتىر.
«حابار» ارناسى