ەكى رەت ادەيى وت قويىپ، ونى اۋىزدىقتاعان ءورت ءسوندىرۋشىنىڭ قىلمىسى اشكەرەلەندى

استانا. قازاقپارات - ءورت شىعارىپ، كەيىن ونى اۋىزدىقتاۋعا ارىپتەستەرىنە كومەكتەسىپ جۇرگەنى ءۇشىن شوتلانديالىق ءورت ءسوندىرۋشى 2  جىلعا بوستاندىعىنان ايىرىلدى.

بۇل تۋرالى The Herald گازەتى جازدى.

ەرىكتىلەر ءورت سوندىرۋشىلەر كومانداسى كومانديرىنىڭ ورىنباسارى دەۆيد ماككەي ەكى مارتە وت قويدى دەپ ايىپتالدى. العاشقىسى 2013 - جىلى ناۋرىزدا ورىن الىپ، 42 مىڭ فۋنت (52,8 مىڭ ەۋرو) زالال كەلتىرگەن. بىرنەشە كۇننەن كەيىن ول سترونتيان ماڭىنداعى جاس كوشەتتەردى ورتەگەن. جالىن 2 تاۋلىكتەن كەيىن عانا اۋىزدىقتالدى.

ەكى جاعدايدا دا بۇل ازامات ءوز ارىپتەستەرىمەن بىرگە وتتى ءوشىرىپ، بۇل كۇندەرى مەملەكەتتىك مەرەكە تويلانعاندىقتان ەكى ەسەلەنگەن ءبىر كۇندىك جالاقى العان.

كۋاگەرلەر ونى سۋ جەتكىزەتىن اق كولىك ارقىلى تانىعان. بۇل جەردە ول جارتى ايلىق جالاقىعا جۇمىس ىستەگەن. بىرنەشە ادام بۇل ماشينانى وت شىققان جەرلەردىڭ ماڭىندا كورگەن. كولىكتە ورناتىلعان GPS-ناۆيگاتور ارقىلى قىلمىسكەردىڭ كىناسى دالەلدەندى.