قازاقتىڭ تاۋەلسىزدىك كۇنى جاڭا جىلدىڭ كولەڭكەسىندە قالماسىن - دەپۋتات ر. حالمۇرادوۆ
بۇگىن ماجىلىستە ۇكىمەت باسشىسىنىڭ اتىنا ساۋال جولداعان دەپۋتات روزاقۇل حالمۇرادوۆ وسى ماسەلەنى كوتەردى.
ساۋال بارىسىندا دەپۋتات جەلتوقسان ايى باستالماي جاتىپ، ەلىمىزدىڭ بارلىق قالالارىندا جاڭا جىل مەرەكەسىنە كىرىسۋ «داستۇرگە» اينالعانىن، وسى ماقساتتا ميلليونداعان قاراجات شىعىندالاتىنىن اتاپ ءوتتى.
«الايدا، جاڭا جىلعا دەيىن ەلىمىز ءۇشىن ماڭىزى ۇلكەن مەرەكەلەر - تۇڭعىش پرەزيدەنت كۇنى مەن تاۋەلسىزدىك كۇنى جونىندە ەش اقپارات كەزدەستىرمەي قالامىز. تەك قانا ءۇش-ءتورت كۇن قالعاندا اقپارات قۇرالدارىندا كەيبىر باعدارلامالاردا جۇگىرتپە جولدار بەرىلە باستايدى.
بۇل تاۋەلسىزدىك كۇنىن جاڭا جىل مەرەكەسىنىڭ، شىرشانىڭ كولەڭكەسىندە قالىپ قوياتىنىن كورسەتەدى. ەگەر ءبىز ۇلت رەتىندە تاۋەلسىزدىگىمىزدى قادىر تۇتساق، ەڭ الدىمەن وسى مەيرامدارعا كوڭىل ءبولۋىمىز كەرەك. ءبىز جاڭا جىلدى تويلاۋعا، قالالاردى، ەلدى مەكەندەردى بەزەندىرۋگە، شىرشالاردى ورناتۋعا قارسى ەمەسپىز. ءبىراق، الدىمەن تۇڭعىش پرەزيدەنت كۇنى مەن تاۋەلسىزدىك كۇنىن مەرەكەلەگەننەن كەيىن جاڭا جىلدى قارسى الۋعا كىرىسسەك تە بولار ەدى عوي»، - دەيدى ر. حالمۇرادوۆ.
ونىڭ ايتۋىنشا، جەلتوقسان ايىن تۇتاستاي تۇڭعىش پرەزيدەنت كۇنى، تاۋەلسىزدىك كۇنىن تويلاۋمەن وتكىزۋدىڭ تاربيەلىك، تاعىلىمدىق ءمانى زور. وسىعان وراي، دەپۋتات جەلتوقساننىڭ ءبىرىنشى جارتىسىن ايتۋلى مەرەكەلەر رۋحىنا سايكەس ۇيىمداستىرۋ قاجەتتىگىن العا تارتادى.
بۇل رەتتە كورنەكى ورىنداردىڭ بارلىعىن ەلباسىنىڭ الۋان ءتۇرلى قىزمەتىن كورسەتەتىن، تاۋەلسىزدىك رۋحىن تانىتاتىن پلاكاتتار مەن ستەندتەر، جارىق بەرۋشى تابلولارمەن بەزەندىرىپ، جۇيەلى تۇردە حالقىمىزدى، جاستاردى وتانسۇيگىشتىككە، بىرلىككە، قوعامدىق كەلىسىمگە شاقىراتىن ءىس-شارالاردى ۇيىمداستىرۋ ماڭىزدى. سوعان وراي، مينيسترلىكتەرگە جانە جەرگىلىكتى اتقارۋشى ورگاندارعا ءتيىستى تاپسىرمالار جۇكتەلسە»، - دەيدى دەپۋتات ر. حالمۇرادوۆ.
«سۇتتەي ۇيىعان ەل، تۇبەگەيلى تۇلەگەن جەر، سول جەردىڭ توسىندە بوي كوتەرگەن جاڭا استانا، ساۋلەتتى عيماراتتار، جىلدان-جىلعا ءوسىپ كەلە جاتقان زەينەتاقى مەن جالاقى، بالا سانىنىڭ ءوسۋى، ءولىمنىڭ ازايۋى وسىنىڭ بارلىعى - تۇڭعىش پرەزيدەنتتىڭ ەڭبەگى، ەل تاۋەلسىزدىگىنىڭ ارقاسى ەكەنى بەلگىلى.
قازاق ۇلتىنىڭ ساقتالۋى، ىقىلىم زاماننان ءوزى مەكەندەگەن اتاجۇرتىندا دەربەس مەملەكەت رەتىندە شاڭىراق كوتەرىپ، وركەندەۋى ەل تاۋەلسىزدىگىنەن باستاۋ الادى. سوندىقتان دا، قازاقستان حالقى ءۇشىن تاۋەلسىزدىك كۇنىنىڭ الار ورنى ەرەكشە. تاۋەلسىزدىك تۇعىرلى بولۋى ءۇشىن ونىڭ قادىرىنە جەتۋ قاجەت. ول - كەز-كەلگەن ازاماتتىڭ وتان الدىنداعى پارىزى. وسى پارىزدىڭ جاۋاپكەرشىلىگىن بۇگىنگى ۇرپاق قانشالىقتى ۇعىنىپ ءجۇر؟» - دەيدى دەپۋتات.
اۆتور: قانات مامەتقازى ۇلى