پۋتيننىڭ كوڭىلدەسى دەپۋتاتتىق قىزمەتىنەن باس تارتتى

استانا. قازاقپارات - رەسەي مەملەكەتتىك دۋماسىنىڭ دەپۋتاتى الينا كابايەۆا ءوزىنىڭ دەپۋتاتتىق مانداتىن مەرزىمىنەن بۇرىن توقتاتۋعا شەشىم قابىلدادى.

مەملەكەتتىك دۋمانىڭ رەگلامەنت كوميتەتى الينا كابايەۆانىڭ ءوز ەركىمەن دەپۋتاتتىق وكىلەتتىگىن مەرزىمىنەن بۇرىن توقتاتۋ تۋرالى ءوتىنىشىن ماقۇلداپ، ەندى بۇل ماسەلەنى 16- قىركۇيەك كۇنى مەملەكەتتىك دۋما وتىرىسىندا قاراۋدى ۇسىندى، - دەپ حابارلايدى رەسەي پارلامەنتى تومەنگى پالاتاسىنىڭ رەسمي سايتى.

الينا كابايەۆا - الەمنىڭ بىرنەشە دۇركىن چەمپيونى، سونداي-اق كوركەم گيمناستيكادان جازعى وليمپيادالىق ويىنداردىڭ جەڭىمپازى. ول ءوزىنىڭ سپورتتىق مانسابىن 2007-جىلى توقتاتىپ، ءدال سول جىلى «ەدينايا روسسيا» پارتياسىنان مەملەكەتتىك دۋماعا دەپۋتات بولىپ سايلانعان بولاتىن. 2011-جىلى پالاتانىڭ التىنشى قۇرامىنا قايتا سايلاندى. الينا كابايەۆا قازىر 31 جاستا، ول مەملەكەتتىك دۋمانىڭ دەنەشىنىقتىرۋ جانە سپورت كوميتەتىندە جۇمىس ىستەيدى.

مەملەكەتتىك دۋما رەگلامەنت كوميتەتىنىڭ ءبىرىنشى ورىنباسارى نادەجدا گەراسيموۆانىڭ ايتۋىنشا، كابايەۆا «سپورتتىق ماسەلەلەرمەن» اينالىسۋعا نيەت ەتىپ وتىر. «بىزدە رەسمي اقپارات جوق، بىزگە بەلگىلى بولعانداي، ول ءوز ماماندىعى بويىنشا جۇمىس ىستەپ، سپورت ماسەلەسىمەن اينالىساتىن بولادى»، - دەدى ول ر ي ا نوۆوستي اگەنتتىگىنە بەرگەن سۇحباتىندا.

نادەجدا گەراسيموۆا دەپۋتات نە سەبەپتى مانداتتى تاپسىرۋعا بەل بايلاعانىن جانە قانداي جۇمىسقا ورنالاساتىنىن ايتۋعا مىندەتتى ەمەستىگىن جەتكىزدى.

شەتەلدىك جانە رەسەيلىك ب ا ق قۇرالدارى الينا كابايەۆانىڭ رەسەي پرەزيدەنتى ۆلاديمير پۋتينمەن وتە جاقىن قارىم-قاتىناستا ەكەندىگىن بۇرىننان بەرى جازىپ كەلەدى. ب ا ق قۇرالدارىنىڭ نۇسقاسى بويىنشا، ايگىلى سپورتشى الينا كابايەۆا وتە قۇپيا تۇردە پۋتينگە الدىمەن ءبىر ۇل، ودان كەيىن ءبىر قىز تۋىپ بەرگەن كورىنەدى.

2008-جىلى «موسكوۆسكي كوررەسپوندەنت» گازەتى كابايەۆا مەن ءپۋتيننىڭ الداعى بولاتىن ۇيلەنۋ تويى تۋرالى (پۋتين رەسمي تۇردە 2013-جىلى عانا اجىراستى) جازعان بولاتىن. كەيىن بۇل اقپارات جوققا شىعارىلىپ، ال گازەت جابىلىپ قالدى. پۋتيننىڭ ءوزى دە بۇل اقپاراتتى جوققا شىعاردى.

ۆلاديمير پۋتين ءوزىنىڭ ايەلى ليۋدميلامەن زاڭدى تۇردە اجىراسقاننان كەيىن، پرەزيدەنت پەن دەپۋتاتتىڭ قۇپيا بايلانىسى جونىندەگى قاۋەسەت تاراي باستادى. الايدا كابايەۆا رەسەيلىك باسىلىمعا بەرگەن ءبىر سۇحباتىندا ءوزىنىڭ جەكە ومىرىنە ارالاسپاۋدى ءوتىندى.

Tengrinews.kz