الماتىدا ورالمان جانە شەتەلدەردە تۇراتىن قازاق جاستارىنىڭ سۋرەت كورمەسى وتەدى
11:04, 14 - قىركۇيەك 2014
استانا. قازاقپارات - قازاقستان رەسپۋبليكاسى مادەنيەت مينيسترلىگىنىڭ ءتىل كوميتەتى 2014 -جىلدىڭ قازان ايىندا الماتى قالاسىندا شەتەلدەردە تۇراتىن قازاق جانە ورالمان جاستارىنىڭ ونەر فەستيۆالى اياسىندا «ءبىر ماقسات، ءبىر مۇددە، ءبىر بولاشاق» اتتى سۋرەت كورمەسىن وتكىزەدى.
شارانىڭ ماقساتى - شەتەلدەگى تالانتتى قازاق جاستارىنىڭ بەينەلەۋ ونەرى تۇرلەرىن مەڭگەرۋدەگى شىعارماشىلىق شەبەرلىگىنە باسا نازار اۋدار جانە ولاردىڭ وتانسۇيگىشتىك، رۋحاني، ۇلتتىق ناقىشتا بەينەلەنگەن، تىڭ تاقىرىپتاعى شىعارمالارىن ناسيحاتتاۋ.
بەينەلەۋ ونەرىندە شىعارماشىلىقپەن شىڭدالىپ جۇرگەن شەتەلدەردەگى قانداستارىمىز بەن ورالمان قازاق جاستارىنىڭ تۋىندىلارىن كوپشىلىككە تانىتۋدى كوزدەگەن كورمەگە 20-35 جاس ارالىعىنداعى جاستار قاتىسا الادى. كورمە جەڭىمپازدارى لاۋرەاتتىق ديپلومدارمەن جانە باعالى سىيلىقتارمەن ماراپاتتالادى، دەپ حابارلايدى دۇنيەجۇزى قازاقتارى قاۋىمداستىعىنان.