التايدىڭ اسقارىنان ءاپپاق سالەم - قىتايلىق قانداسىمىزدىڭ قازاق ەلىنە ارناۋى
تۋعان وتانىنان الىستا جۇرگەن تالاي قازاق بالاسىنىڭ كوكەيىندەگى سەزىمىمەن ورتاقتاسىپ جاتقان جىر جولدارىن نازارلارىڭىزعا ۇسىنىپ وتىرمىز .
اسسالاۋماعالەيكۋم، قازاق ەلى !
ۇرپاعى كوكتۇرىكتىڭ، تازا تەگى .
بويىنا جىبەك جولى ورنالاسقان ،
ەجەلدەن ورتا ازيا بازارى ەدى .
سوعىسىپ مۇڭعۇلمەنەن ەكى ءجۇز جىل ،
قاھارمان حالقىم نەتكەن عاجاپ ەدى .
ودان سوڭ ورىس كەلىپ ويران سالعان ،
كوز تىككەن بايلىعىڭا تاجال ەدى .
شەر جۇتىپ.. .
شۇرايلى ولكەڭ وكسىك اتىپ ،
كەكتەنگەن ەل مەن جۇرتىم نازالى ەدى.
ال بۇگىن تاۋەلسىزدىك تۋىن تىكتىڭ،
ماقتانىپ تاريحىڭدى جازام ەندى.
ىلەنىڭ قورعاسىنان وتكەنىمدە ،
جەرىنە قازاقستان جەتكەنىمدە ،
كورىندى الماتىداي ارۋ قالا ،
كوسىلگەن الاتاۋدىڭ بوكتەرىندە .
جات بولىپ اتا قونىس، ارۋاعىڭ ،
ءبىر كەزدە قازاق سەنەن شەتتەدى مە.
ءوز قونىسىڭ وزىڭە تۇراق بولماي ،
باسىڭنان باعىڭ ۇشىپ كەتپەدى مە !؟
اجالدى جەلتوقساننىڭ ىزعارىندا ،
نە ساباز جانىپ قيىپ وتپەدى مە.
جاساڭداپ شالعىنداردىڭ جاپىرىلعان ،
گۇل اشىپ بايشەشەگىڭ كوكتەدى مە !؟
الاۋلاپ الاتاۋدان التىن ساۋلە ،
ءتاڭىرىم نۇر- شۋاعىن توكپەدى مە.
تاريحتىڭ قاق تورىنەن ورىن الىپ ،
قازاقتار قولىڭ كوككە جەتپەدى مە !؟
ارمانداپ وسى كۇندى تالاي بوزداق ،
ومىردەن سەرگەلدەڭ بوپ وتپەدى مە !
جەتىسۋ، جەر ۇيىعى تالدىقورعان ،
ءدام تاتتىق الماتىعا بارار جولدان.
اۋىلى «اقىن سارا» وسىندا ەكەن،
مەكەنى سەگىز ماتاي ۇلكەن ورداڭ.
ءبىرجان سال كوكشەتاۋدان ىزدەپ كەلىپ ،
بۇل جەردە ۇلان- اسىر دۋمان سالعان.
ءۇشارالدا قابانباي مازارىنا ،
دۇعا وقىپ كەلگەن قازاق وڭ مەن سولدان .
قولداي گور باتىر بابا ارۋاعى ،
قازاققا قاپ تاۋىنداي قورعان بولعان .
ءبىر كەزدە قورعاپ قالعان قونىسىڭا ،
بۇل كۇندە شەتەلدەن كەپ قازاق قونعان .
تۇرعانداي قوناقتارعا ءىلتيپات قىپ ،
باس يزەپ سالەم ەتىپ، قالىڭ ورمان .
اياگوز وزەنىنىڭ تولقىنىندا ،
ءدينانىڭ كۇيلەرىنىڭ سازى قالعان .
الەكەڭ، احمەت، ماجان، ءمىرجاقىپتار ،
ەلى ءۇشىن جانىن قيىپ قۇربان بولعان.
ۇلت ءۇشىن بارىن بەرگەن بوزداقتارعا ،
اعايىن، وقيىقشى دۇعا مولدان !
امان با قانداس حالىق سەمەيدەگى ،
ەشقاشان ۇمىتىلمايدى ەر ەڭبەگى.
قازاقتىڭ مىقتىلارى سەندە تۋعان ،
اباي، مۇحتار، اسەتتەي كەمەڭگەرى.
بار ما ەكەن، بۇگىنگى ۇرپاق اراسىندا ،
كەشەگى شاكەرىمگە تەڭەلگەنى ؟
ورداسى ابىلايدىڭ قايتا ورناپ ،
قازاقتار قاۋىشتى عوي، ەل- ەلدەگى .
قولعا الىپ اتا سالتىن، انا ءتىلىن ،
وسى عوي ىرگەسىنىڭ كەڭەيگەنى .
ورىن اپ ازيانىڭ قاق توسىنەن ،
قازاقتىڭ حالىقاراعا تەڭەلگەنى.
كەشەگى تورعاي توزدى زامانداردا ،
قازاقتى «ەل بولادى» دەگەن بە ەدى .
الاۋلاپ اقيقاتتىڭ ازات تاڭى،
جوقتالدى ازاپتى ءومىر، كەتكەن كەگى.
« ءۇمىتسىز شايتان ءىسى» دەيدى حالىق ،
دەگەن تاعى «دۇنيەنىڭ بولار شەگى» .
تاۋ، دالاڭ شاتتىق ۇنمەن جاڭعىرىعىپ ،
قازاقتىڭ بيلىك ايتسىن بي مەن بەگى.
استانا سارىارقانىڭ قاق توسىندە ،
ءىلىندىم «ابىلايلاپ» ءدال بەسىندە .
كەشەگى كۇي پەرىسى قۇرماڭعازى ،
كۇي توككەن ساۋساعىنان سوتكەسىنە ،
ءماديدىڭ قاراوتكەلى قالا بوپتى ،
اندەرى شىرقاپ سالعان ءتۇستى ەسىمە ،
ەسىلدىڭ جاعاسىندا ەلوردادان ،
توگىلگەن قازاعىما كوپ نەسىبە .
اتالعان باتىرلاردىڭ اتىمەنەن ،
جۇرەسىڭ كوشەسىمەن كەڭ كوسىلە .
ورناتقان ەگەيلەرگە بىردەن ءمۇسىن ،
وتەسىڭ ءمىناجات قىپ كوپ تەسىلە .
ءان ساپ ءوت ءبىرجان سالدىڭ داڭعىلىنان ،
دۇعا قىپ ولەڭ ءسوزدىڭ توكپەسىنە.
قازاقتىڭ قاجىمۇقانداي قايرتتى ۇلى ،
قالماعان بۇكىل الەم وكپەسىنە.
ايبىندى استاناعا كەلگەن قازاق ،
كىم كەپىل التى ايلانباي وتپەسىنە .
كوكشەتاۋ سان تاريح ساقتالعان جەر،
ەسىمى ەگەيلەردىڭ ماقتالعان جەر .
جۇڭعارلار تۇرماستاي بوپ تاپتالعان جەر .
قابانباي قۋ باس اتتى تاڭ اسىرىپ ،
بوگەنباي نايزا قايراپ باپتالعان جەر .
تاعى دا اقىن تۋىپ جاتىرمىسىڭ ،
ءبىرجان سال سارانى ىزدەپ اتتانعان جەر .
سەندە ءوتتى ۇكىلى ىبىراي، بالۋان شولاق ،
تاۋ- تاسىڭ ولەڭمەنەن اپتالعان جەر .
كولىندە بۋرابايدىڭ ءۇنى قالقىپ ،
اقاننىڭ اسقاق ءانى جاتتالعان جەر .
ماعجاننىڭ گۇلسىمگە ارناپ جازعان حاتىن ،
ۇرپاقتار قاز- قالپىندا اپ قالعان جەر.
باياندى باق ورناسىن باستارىڭا ،
كەلگەن جوق مىنا باقىت قاس- قاعىمدا .
ەل ءۇشىن نەلەر ساباز وتقا ءتۇسىپ ،
قيدى عوي قىرشىنىنان جاس جانىن دا .
ەل بولدىڭ حالىقارادا تەرەزەڭ تەڭ،
نۇراعاڭ نۇرلى جول مەن باستاۋىندا .
جازىلعان پەشەنەڭدە بايلىعىڭ بار ،
اتىڭ كوپ، اسىڭ تولى استاۋىڭدا .
تەڭەيتىن ەل مەن ەلدى ءبىلىم عانا ،
قاسقايىپ ىرىق بەرمە قاس جاۋىڭا.
«بىرلىك ءتۇبى تىرلىك» دەپ ايتقان بابام ،
ءمانى ۇلكەن بۇل ءسوزىنىڭ استارىندا .
كەرەگەڭ كەڭ دالاڭداي كەڭ جايىلىپ ،
كوك تۋىڭ جەلبىرەسىن اسپانىڭدا .
ءىزى بار وتكەن كۇننەن قازاعىمنىڭ ،
تاريحتىڭ تاڭبا باسقان تاستارىندا .
ءبىر كۇنىڭ جاقسى بولسىن، ءبىر كۇنىڭنەن ،
اينالدىم بىرلىگىڭنەن، تىرلىگىڭنەن .
تاريحتا قازاق دەگەن اتتى ساقتاپ ،
مىڭ ءولىپ حالىقپىز عوي مىڭ تىرىلگەن .
شۇبارلاۋ كورىنەدى قالا ءتىلى ،
ءۇن قاتشى دۇنيەگە ءوز تىلىڭمەن .
قازاقتىڭ قازاقتىعى - انا ءتىلى ،
ايىرما ءوز تىلىڭنەن، ءوز دىنىڭنەن .
كوتەرگەن شايقالماسىن شاڭىراعىڭ ،
تابىسقان قوزىڭداي بوپ جامىرادىم .
اتويلاپ، ابىلايلاپ ۇران سالساڭ ،
كوك تۋىڭنىڭ استىنان تابىلامىن ،
التايدىڭ اسقارىنان ءاپپاق سالەم ،
تۋعان ەل سالەمىمدى قابىل العىن !
كارىمحان زاقيا (مەشەل) ۇلى