اتاجۇرتقا ورالعانىمىز قانداي باقىت - م. سولايمانوۆ - فوتو
ول 2010-جىلى اتاجۇرتقا كەلىپ قونىستانعان، زايىبى گۇلنارا ەكەۋى ءتورت قىز، ءبىر ۇل تاربيەلەپ وتىر. 1969-جىلى وزبەكستاننىڭ قوڭىراتىندا دۇنيەگە كەلگەن ونىڭ و باستان ارمانى قازاقستانعا ورالۋ بولىپتى. «اكەم ءجامي اتا-انادان وربىگەن توعىز اعايىندىنىڭ ءۇشىنشىسى. اتام سۇلەيمەن (وزبەكستاندا اتاتەگى سولايمانوۆ بولىپ قاتە جازىلىپ كەتكەن) اقتوبەنىڭ شالقارىنان. باسىنا ءىس تۇسكەن الماعايىپ زاماندا باس ساۋعالاپ، قوڭىراتقا تابان تىرەگەن.
اجەمنىڭ سوزىنە قاراعاندا، ءدىني ساۋاتتى، كوكىرەگى وياۋ ازامات بولعان. ول جاققا بارعان سوڭ دا، ەرەكشە قابىلەتتى، كوزى قاراقتى ازاماتتان سەكەم العان بيلىك اقىرى ەكى جىلعا اباقتىعا جاۋىپتى. نە ءۇشىن تەرگەلىپ، قانداي كىنا تاعىلعانىن اجەمىز تاپتىشتەپ ايتپادى. اتا-انام قاراپايىم ەڭبەك ادامدارى بولدى. «زاماننىڭ بەتى بەرى قاراپ، جاعداي وڭالعان تۇستا اتاجۇرتقا ورالىڭدار» دەگەن اتامىزدىڭ اماناتىن ورىنداۋ ءبىزدىڭ باعىمىزعا بۇيىرعان ەكەن. اكەمىز ومىردەن ەرتە كەتىپ، بەس بالا قالدىق. ءبارىمىز ءوسىپ-ءونىپ، ءۇيلى-باراندى بولعان سوڭ، ەلگە قايتۋعا بەل بۋدىق. ءبىر ءىنىم اقتاۋدى، قالعانىمىز اق جايىقتى بەتكە الدىق»، - دەيدى ميرات.
ميرات اسكەر قاتارىنان ورالعاسىن ارناۋلى ءبىلىم الىپ، ەل قاتارلى قىزمەت ەتكەن. ول - قازىر شەبەر قۇرىلىسشى. جارى گۇلنارا ورازباي قىزى اۋداندىق ورتالىق اۋرۋحانادا مەيىربيكە قىزمەتىن ابىرويمەن اتقارىپ كەلەدى. «اتامەكەنگە ورالىپ، ۇرپاق الدىنداعى اتا-انالىق بورىشىمىزدى ورىندادىق. ەندى ۇلىقتى ۇل، قىلىقتى قىز ءوسىرىپ، ەل يگىلىگىنە ادال ەڭبەك ەتۋ - باستى ماقسات. شاشقان داننەن مول ءونىم الاتىن قۇنارلى توپىراعى، اۋىل شارۋاشىلىعىن ورىستەتۋگە وتە قولايلى تابيعاتى بار مەكەندە قاي شارۋانى بولسىن ورىستەتىپ اكەتۋگە بولادى. ەڭ باستىسى، ەڭبەك ەتكەن جانعا مەملەكەت تاراپىنان وراسان قولداۋ بار. بولاشاقتا، بالكىم، ءوز ءىسىمىزدى قولعا الارمىز. ازىرگە وتاعاسى قۇرىلىس سالاسىندا ەڭبەك ەتىپ جاتىر، بالالار كىشكەنتاي»، - دەيدى ول.
قانىنا دارىعان قىمبات قاسيەتىن ۇرپاعىنىڭ بويىنا سىڭىرە بىلگەن اتا-انانىڭ بالا تاربيەسىندە دە وزىندىك ەرەكشەلىكتەرى بايقالادى. قىر گۇلىندەي قۇلپىرىپ ءوسىپ كەلە جاتقان قىلىقتى قىزدارى بىلىمگە قۇشتار، ونەرگە بەيىم. تۇلا بويى تۇڭعىشتارى گۇلنۇر بيىل عانا تەڭىن تاۋىپ، قۇتتى ۇياسىنا قونسا، فاريدا، قارلىعاش، ۇلبانۋ ەسىمدى قىزدارى قاسىم امانجولوۆ اتىنداعى مەكتەپتىڭ ۇلگىلى وقۋشىلارى، ال جۇرسىنبەگى مەكتەپالدى دايارلىق توبىنا باردى. قازاق قىزىنا ءتان تالعامپاز، تۇلا بويى ونەگە تۇنعان بەلسەندى شاكىرتتەرىن ۇستازدارى دا ماقتان تۇتادى. از-ماز ەركەلىگى بولماسا، جۇرسىنبەك تە تەكتى اكەنىڭ تاربيەسىن كورگەن، قاعىلەز.
وسىنداي بەرەكەلى وتباسىلار باردا وتانىمىزدىڭ دىڭگەگى دە مىقتى بولماق.
اۆتور: ەلجان ەرالى