قازاقستان مۇسىلماندارى ءدىني باسقارماسى استاناعا كوشەدى
بۇل تۋرالى ءدىني باسقارمانىڭ باسپا ءسوز قىزمەتى حابارلادى.
«جاقىندا قازاقستان مۇسىلماندارى ءدىني باسقارماسى اپپاراتىنىڭ نەگىزگى قۇرامىن استاناعا كوشىرۋىمىز قاجەت. بۇل - ءدىني باسقارما ءۇشىن ماڭىزدى قادام. استانادا جۇمىس قارقىنىن كۇشەيتەمىز. مۇنداي تاريحي شەشىم بارىمىزگە ۇلكەن جاۋاپكەرشىلىك جۇكتەيدى. ەلوردادا ءدىني باسقارمانىڭ جاڭا عيماراتىنىڭ قۇرىلىسى باستالعانىنا قاراماستان، ۋاقىتشا كەڭسە تابۋدى نايب ءمۇفتي سەرىكباي قاجى وراز بەن اپپارات جەتەكشىسى عىلىمبەك ماجيەۆكە تاپسىرامىن»، - دەدى ەرجان قاجى مالعاجى ۇلى.
القالى جيىندا باس ءمۇفتي الماتىداعى عيماراتتا جۇمىس جۇيەلى جۇرگىزىلە بەرەتىنىن باياندادى. «كەيبىر ادامدار ءدىني باسقارما ءبىرتۇتاس كوشەتىن بولىپتى دەيتىن كورىنەدى. ولاي ەمەس. مادەني، ادەبي، ءدىني وشاعىمىز - الماتى ءارقاشان ءمۇفتيات ءۇشىن ماڭىزدى. وسىنداعى عيماراتتا دا جۇمىس ىستەيتىن بولامىز»، - دەدى باس ءمۇفتي.
باس قوسۋدا ەرجان قاجى مالعاجى ۇلى وسىناۋ يگى باستامالار مەن ءدىن سالاسىنداعى تاريحي وقيعالار حالقىمىزدىڭ دارحان مىنەز، دوسقا قامقور كەڭپەيىل نيەتىنىڭ، ۇلتتار تاتۋلىعىنىڭ ءھام بىرلىگىنىڭ ارقاسىندا جۇزەگە اسىپ جاتقانىن ايتتى. ىنتىماق بولسا، ىرىس تا، بەرەكە دە بولاتىنىن تىلگە تيەك ەتتى. باس ءمۇفتي قىزمەتكەرلەرگە جۇمىستى ءوندىرىپ ىستەپ، جاۋاپتى كەزەڭدە بەلسەندىلىك تانىتۋعا ۇندەدى.