پۋتين پوروشەنكوعا جەتى پۋنكتتەن تۇراتىن بەيبىتشىلىك جوسپارىن ۇسىندى

استانا. قازاقپارات - رەسەي فەدەراتسياسىنىڭ پرەزيدەنتى ۆلاديمير پۋتين ۋكرايندىق ارىپتەسى پەتر پوروشەنكومەن تەلەفون ارقىلى سويلەسىپ، جەتى پۋنكتتەن تۇراتىن ۋكراينانىڭ وڭتۇستىك-شىعىسىنداعى جاعدايدى تۇراقتاندىرۋ جوسپارىن ۇسىندى.

بۇل تۋرالى جۋرناليستەرگە رەسەي پرەزيدەنتىنىڭ ءوزى مالىمدەدى، - دەپ حابارلايدى ر ي ا نوۆوستي.

1. ۋكراينانىڭ وڭتۇستىك-شىعىسىنداعى دونەتسك پەن لۋگانسك باعىتىنداعى قارۋلانعان ساربازداردىڭ بەلسەندى شابۋىلداۋشى قارۋلى كۇشتەرىنىڭ وپەراتسياسىن دوعارۋ.

2. ۋكراينانىڭ قارۋلانعان كۇشتىك قۇرىلىمدارى بولىمشەلەرىن قاراپايىم حالقى بار اۋماقتى ارتيللەريامەن، بارلىق اتقىش جۇيە تۇرلەرىمەن اتقىلاماس ءۇشىن كەرىگە شەگىندىرۋ.

3. قاۋىپسىزدىك اۋماعىن قالىپتاستىرۋدا اتىس-شابىستى دوعارۋ شارتتارى حالىقارالىق باقىلاۋعا تولىققاندى كورىنىپ، ءادىل باعاسى بەرىلەتىندەي جاعداي تۋعىزۋ.

4. شيەلەنىستى اۋماقتاعى حالىققا، بەيبىت تۇرعىندارعا قارسى اۋە كۇشىن قولدانباۋ.

5. قانداي دا ءبىر قوسىمشا شارتتارسىز «بارلىعىن بارلىعىنا» دەگەن نۇسقادا كۇشتەپ ۇستاپ وتىرعانداردى ايىرباستاۋدى ۇيىمداستىرۋ.

6. دونباسس- دونەتسك جانە لۋگانسك وبلىستارىنىڭ حالىق كوپ شوعىرلانعان اۋماقتارىنا جانە قالالارعا گۋمانيتارلىق جۇكتى جەتكىزۋ جانە ودان بوسقىنداردى الىپ شىعۋ ءۇشىن گۋمانيتارلىق ءدالىز اشۋ.

7. دونباستىڭ زارداپ شەككەن حالقىنا كومەكتەسۋ ءۇشىن ونداعى بۇزىلعان الەۋمەتتىك جانە ومىرگە ماڭىزدى قۇرىلىمدار مەن نىسانداردى قالپىنا كەلتىرۋگە قاجەتتى كۇردەلى جوندەۋ بريگاداسىن جىبەرۋ مۇمكىندىگىن قاراستىرۋ.

پۋتيننىڭ سوزىنە قاراعاندا، قانتوگىستى دوعارىپ، جاعدايدى تۇراقتاندىرۋ ءۇشىن «شيەلەنىسۋشى قوس تاراپ وسى جوسپار ەرەجەلەرىن بىرگە ماقۇلداپ، جۇزەگە اسىرۋى ءتيىس».

رەسەي فەدەراتسياسىنىڭ پرەزيدەنتى كيەۆپەن جانە ۋكراينانىڭ وڭتۇستىك-شىعىسى وكىلدەرىمەن 2014-جىلدىڭ 5- قىركۇيەگىنە بەلگىلەنگەن جۇمىسشى توپتار كەزدەسۋىندە ءتۇيىندى كەلىسسوزگە كەلۋ مۇمكىندىگى بارىن ايتتى.

ەسكە سالا كەتەلىك، سارسەنبىدە پۋتين مەن پوروشەنكو بەيبىتشىلىك ورناتۋعا ىقپال ەتەتىن ءبىرقاتار قادام جاساۋعا ۋاعدالاسىپ تەلەفونمەن سويلەستى. بۇل كەلىسسوزگە تۇسىنىكتەمە بەرگەن پوروشەنكونىڭ باسپا ءسوز قىزمەتى الدىندا «اتىس-شابىستى تۇبەگەيلى توقتاتۋ» تۋرالى ايتقان ەدى. الايدا كەيىننەن ۋكراينا پرەزيدەنتىنىڭ سايتىندا بۇل ءماتىن وزگەرتىلىپ، «دونباستا وق اتۋدى دوعارۋ رەجيمى» تۋرالى كەلىسىمگە قول جەتكىزدىك دەپ ناقتىلاپ جازىلدى.

ءوز كەزەگىندە پۋتين اكىمشىلىگى «پرەزيدەنتتەر اتىس-شابىستى دوعارۋعا ىقپال ەتەتىن قادامداردى تالقىلادى، رەسەي شيەلەنىسۋشى تاراپ بولماعاندىقتان قانداي دا ءبىر كەلىسىمگە كەلمەدى» دەپ مالىمدەدى.

ۋكراينا ۇ ق ق ك باسشىسى اندرەي لىسەنكونىڭ ايتۋىنشا، پوروشەنكو مەن پۋتين كەلىسسوزىنە قاتىستى كەڭەيتىلگەن تۇسىنىكتەمەنى ۋكراينا پرەزيدەنتىنىڭ اكىمشىلىگى كەيىنىرەك بەرەدى.
alashainasy.kz