كاريموۆ تە الاڭداپ وتىر
ساراپشىلاردىڭ ايتۋىنا قاراعاندا، يسلام كاريموۆتىڭ مازاسىزدانۋىنىڭ ءجونى بار. ويتكەنى كەيىنگى كەزدە ەل ىشىندە ەليتاارالىق شايقاس كۇشەيىپ، سىرتتان يسلام راديكاليزمى سىقىلدى قاۋىپتىڭ بارى ايقىن بىلىنە باستادى.
راسىندا دا، يسلام كاريموۆ تاۋەلسىزدىككە قاتىستى سويلەگەن سوزىندە تاياۋ جانە الىس شەتەلدەن تونەر قاۋىپتىڭ بارىن جاسىرمادى.
- اتاپ ايتقاندا، لاڭكەستىك پەن ەكسترەميستىك ارەكەتتەر بولۋى مۇمكىن. سوندىقتان رەسمي تاشكەنت كەز كەلگەن ءتۇيىندى ماسەلەنى حالىقارالىق نورمالار ارقىلى تەك قانا ساياسي كەلىسسوز جانە بەيبىت جولمەن شەشۋگە ۇمتىلادى وزبەك حالقى ءوزارا تاتۋ تۇرىپ، بۇرىنعىدان بىرلىككە، ىنتىماققا توپتاسا باستاۋى ءتيىس، - دەدى يسلام كاريموۆ.
ارينە، كاريموۆتىڭ بۇلاي مالىمدەمە جاساۋى بەكەر ەمەس. سوڭعى ايلاردا الەمدەگى جاعداي ءتىپتى ۋشىعا ءتۇستى. اسىرەسە، يراك پەن اۋعانستان، سونىمەن قاتار ۋكرايناداعى جاعداي الاڭداتارلىق جاعدايعا جەتتى.
رەسەي ستراتەگيالىق زەرتتەۋلەر ينستيتۋتىنىڭ عىلىمي قىزمەتكەرى، ساياساتتانۋشى اجدار كۋرتوۆتىڭ ايتۋىنشا، كاريموۆتىڭ مازاسىزدانۋىندا سەبەپ بار. ويتكەنى كۇندە قانتوگىس بولىپ جاتقان يراك جەرىندە «يسلام مەملەكەتى» اتتى مىقتى قارۋلانعان لاڭكەستىك توپ بوي كوتەردى.
ولار قازىر بوي بەرمەي بيلىكپەن جانە ا ق ش اسكەرلەرىمەن سوعىسىپ جاتىر. لاڭكەستەردىڭ ماقساتى - بارلىق مۇسىلمان مەملەكەتتەرىندە وزدەرىنىڭ حاليفاتىن ورناتۋ. بۇل ماسەلە، اسىرەسە، دىنشىلدەۋ كەلەتىن وزبەكتەرگە قيىنداۋ. كاريموۆتىڭ الاڭداپ وتىرعان سەبەبىنىڭ ءبىرى دە وسى. ەكىنشىدەن، قاشان دا تىنىشسىز بولىپ تۇرعان اۋعانستاننان دا جىلىمىق اۋا رايى كەلىپ تۇرعان جوق. شەكاراسى جاقىن رەسمي كابۋلدا كۇندە جارىلىس. ءالى كۇنگە دەيىن پرەزيدەنتتەرىن سايلاي الماي الەك.
- راسىندا دا، وزبەكستانعا باستى قاۋىپ اۋعان جەرىنەن كەلەدى. كەيىنگى كەزدە بۇل ايماقتا دا يسلام قوزعالىسى ورىستەدى. ولار بيلىككە قارسى شىعىپ، ءوز تالاپتارىن قويۋدا. ونىڭ ۇستىنە كەيىنگى كەزدە وزبەك جەرىندە ا ق ش اسكەري بازاسىنىڭ ورناۋى تۋرالى ماسەلە دە تىعىرىققا تىرەلدى. سوندىقتان وزبەككە ءوز كۇشتەرىنە سەنۋگە تۋرا كەلەدى، - دەيدى رەسەيدىڭ ورتا ازيا جانە ورتالىق شىعىس ازيا ەلدەرى جونىندەگى ساراپشىسى الەكساندر كنيازيەۆ.
اقيقاتىندا بۇگىنگە دەيىن اۋعانستاندا پرەزيدەنت سايلاۋىنىڭ ناتيجەسى ءالى ناقتىلانعان جوق. بۇل ەلدەگى ساياسي كۇشتەردىڭ نارازىلىعىن بارعان سايىن ۋشىقتىرىپ بارادى. ال بولاشاقتا بيلىككە كىم كەلەدى، قايتادان كارزاي ما، جوق الدە وعان قارسى كۇشتەر مە؟ ول جاعى بەلگىسىز. ال بيلىككە يسلامدىق كۇشتەر كەلسە، كورشى ەلدەرگە قيىن. كاريموۆتىڭ الاڭداۋىنىڭ سىرى دا وسىندا، - دەيدى ساياساتتانۋشى اجدار كۋرتوۆ.
ساراپشىلار كەيىنگى جىلدارى پرەزيدەنت پەن ونىڭ قىزىنىڭ كوزقاراسىندا دا كوپ قايشىلىق بولعانىن دا تىلگە تيەك ەتەدى. پرەزيدەنتتىڭ قىزى ۇزاق ۋاقىت ءۇي قاماقتا وتىرعانى دا بەلگىلى.
- سوندىقتان يسلام كاريموۆ ىشكى جانە سىرتقى جاۋلاردان قاۋىپتەنىپ وتىر، - دەيدى ساراپشىلار.
«ايقىن گازەتى»