استانادا اقسۇيەك قىزدارعا ارنالعان وقۋ ورنى اشىلدى

  استانا. قازاقپارات -     استانادا اقسۇيەك قىزدارعا ارنالعان وقۋ ورنى اشىلدى. «قازاق قىزى» دەپ اتالاتىن ينستيتۋت شاكىرتتەرگە ەۋروپانىڭ وزىق مادەنيەتى مەن قازاقتىڭ داستۇرلەرىن قاتار ۇيرەتپەك.

ياعني، قالتالىلاردىڭ قىزدارىنا داستارحان باسىندا شانىشقى مەن پىشاقتى قالاي ۇستاۋدان باستاپ، گولف ويناپ، يوگانىڭ قيمىلدارى ۇيرەتىلەدى. قىمبات جيھازدارمەن جابدىقتالعان، ءىشى - سىرتى كوزدىڭ جاۋىن الاتىن وقۋ ورنىنىڭ سالتاناتتى اشىلۋىنا ءماجىلىستىڭ ۆيتسە- سپيكەرى داريعا نازاربايەۆانىڭ ءوزى كەلەدى دەپ جوسپارلانىپ وتىر.

استانانىڭ سول جاعالاۋىندا، تۋرا ورتالىقتا تۇرعان «قازاق قىزى» دەپ اتالعان ينستيتۋتتىڭ ىشىنە كىرگەن ادامنىڭ كوزى تالادى. قىمبات جيھازدار، كوزدىڭ جاۋىن الاتىن جاۋھارلارمەن بەزەندىرىلگەن بولمەلەر قۇددى مۇراجايدا جۇرگەندەي اسەر قالدىرادى. ءدال وسى جەردە 300 قىز قىركۇيەكتىڭ ورتاسىنان باستاپ وقۋىن باستايدى.

 سەگىز جاستان باستاپ 17 جاسقا دەيىنگى بويجەتكەندەر مۇندا ەۋروپانىڭ مادەنيەتىن ۇيرەنىپ، ادەمى سويلەپ، ناعىز اقسۇيەكتەرشە ءجۇرىپ- تۇرۋعا ءدارىس الماق. ماسەلەن، مىنا ۇستەلدە قىزدارعا شاراپ پەن شامپاندى قاي بوكالعا قۇيىپ، داستارحان باسىندا قىلىعىمەن قىمسىنىپ قالاي وتىرۋ كەرەكتىگى ايتىلاتىن ساباقتار وتكىزىلەدى.

زارينا احمەتجانوۆا، «قازاق قىزى» قوعامدىق بىرلەستىگىنىڭ پيار ديرەكتورى:

بوكالدىڭ ءوز ارناۋى بار. بىرەۋىنە ءبىز شامپان قۇيساق بىرەۋىنە شاراپ قۇيامىز. قىزداردى ۇيرەتەمىز. نازار اۋدارساڭىز مىناۋ شانىشقى بالىق جەۋگە عانا ارنالعان. وسىنداي ۇساق تۇيەكتەردى ۇيرەتەمىز.

سوڭعى ۇلگىدە سالىنعان، ءار ورىندىعىنىڭ ءوزى تاپسىرىسپەن جاسالعان وقۋ ورنىندا استاناداعى مينيسترلەر مەن دەپۋتاتتاردىڭ قىزدارى عانا، ءيا بولماسا بيزنەسمەندەردىڭ بالالارى وقۋى ابدەن مۇمكىن. ويتكەنى، قاراپايىم اتا- انالار مۇنداي ەليتالىق جەرگە بالاسىن جىبەرىپ، اقسۇيەكتەردىڭ تاربيەسىن ۇيرەتكىزۋگە قالتاسى كوتەرمەيتىندىگى بەلگىلى. ال داۋلەتتىنىڭ قىزدارى ءاربىر ۇساق- تۇيەكتى ءبىلىپ وسۋىنە مۇندا بارلىق جاعداي جاسالعان. پىشاعىنا دەيىن گۇلمەن كومكەرىلگەن، اس ۇيدەن گورى سارايعا ۇقسايتىن بۇل جەردە اسپازدار شاكىرتتەرگە ەۋروپانىڭ ەڭ اتاقتى تاعامدارىن ازىرلەۋگە ۇيرەتپەك.

زارينا احمەتجانوۆا، «قازاق قىزى» قوعامدىق بىرلەستىگىنىڭ پيار ديرەكتورى:

وسى جەردە تەك سالاتتار جاساۋدى عانا ەمەس نان يلەۋگە ۇيرەنەدى. ۇيلەرىنە كەلىپ، اناسىنا مەن ۇيرەندىم كومەكتەسەم دەيتىندەي جاعداي جاسايمىز.

ءۇش قاباتتى عيماراتتىڭ ەڭ استىندا يوگامەن اينالىساتىن بولمە، ءان ستۋدياسى مەن شەبەرحانا ورنالاسقان. ونەرلى قىزدار ءان ايتىپ، سىرداق تىگىپ، بي بيلەمەك. ءتىپتى، اقسۇيەكتەر عانا وينايتىن گولف كلۋبى، سۋرەت سالۋ بولمەلەرى جەكە جەكە. قالتالىلاردىڭ قىزدارى بۇلاردىڭ بارىنەن جالىقسا، وسىندا وتىرىپ سەرگىپ الۋىنا دا بولادى. ال مۇنداي قىمبات وقۋ ورنىنىڭ قوجايىنى كىم، اشۋعا قانشا قارجى جۇمسالعانى بىزگە جاسىرىن. بەلگىلىسى، "قازاق قىزىنىڭ" سالتاناتتى اشىلۋىنا داريعا نازاربايەۆا باستاعان دەپۋتاتتار مەن مينيسترلەردىڭ وزدەرى كەلەدى دەپ جوسپارلانعان.

وسى مىنبەردەن قىزدارعا داريعا نازاربايەۆا، گۇلشارات ءابدىحالىقوۆا، زاعيپا باليەۆا سياقتى ەلگە بەلگىلى ايەلدەر مەن بيبىگۇل تولەگەنوۆا سياقتى انشىلەر ءدارىس وقىپ، ومىردەن تۇيگەندەرىمەن بولىسپەك. جوبا اۆتورلارى اۋىلداعى ەلگە ونەگە بولعان اجەلەردى دە شاقىرىپ، تاربيە ساعاتتارىن ۇيىمداستىرامىز دەيدى.

31- ارنا