بوكسشى قانات يسلامنىڭ جەكە سايتى اشىلادى
سايتتا بوكسشىنىڭ جەكپە-جەگىنەن كاسىبي فوتو، ۆيدەواقپارات، كەلەسى ۇرىس قاشان جانە كىممەن وتەتىنى جايلى ماعلۇمات قازاق، ورىس، اعىلشىن تىلدەرىندە دەر كەزىندە جاريالاناتىن بولادى.
«بۇگىندە قاناتتىڭ جەكپە-جەگىن كورە الماي سۋساپ جۇرگەن جانكۇيەرلەر كوپ. ماسەلەن مەنىڭ ءوزىم قاشان كىممەن جۇدىرىقتاساتىنىن بىلمەيمىن، ەكى كۇننەن سوڭ وسى الەۋمەتتىك جەلى ارقىلى ءبىلىپ وتىرامىز. ساپالى سۋرەت، بەينەاقپارات تا از. سوندىقتان، ونى جۇرتشىلىققا كەڭىنەن ناسيحاتتاۋ قاجەتتىگى تۋىپ وتىر. بۇل جونىندە قاناتتىڭ وزىمەن، پروموۋتەرى نەلسون لوپەسپەن سويلەستىك.
ولار ءىسىمىزدى قۇپتادى. قاناتتىڭ ءار كەزدەسۋىندە ولارمەن تىكەلەي بايلانىستا بولامىز. اقپاراتتى پروموۋتەر نەلسون لوپەس جىبەرىپ وتىرادى دەپ كەلىستىك. سايت وپەراتيۆتى جۇمىس ىستەيتىن بولادى. امەريكادا جەكپە-جەك كۇندىز وتسە، بىزدە ءتۇن بولادى عوي. سوعان قاراماستان، تۇندە كەلگەن اقپاراتتى تۇندە سالاتىن بولامىز»، - دەدى جۋرناليست بەرىك سۇلتان.
ءبىر ايتا كەتەرلىگى، سايت جاساۋشىلار جاس سپورتشىنىڭ قازاقستانعا عانا ەمەس، الەمگە تانىمال بولۋىن ماقسات تۇتادى.
Kanatislam.com سايتىن اشۋداعى ماقسات кz دومەنى ەمەس، com-دى تاڭداۋىمىز قاناتتىڭ جەتىستىگىنە تەك قازاقستاندىقتار عانا ەمەس، بۇكىل الەم كۋا بولسىن دەگەن ويدان تۋدى. قازاقتىڭ قاناتىن الەمگە ناسيحاتتاۋدا تامشىداي بولسىن ۇلەسىمىزدى قوسۋعا تىرىسىپ، قولىمىزدان كەلگەندى جاساپ جاتىرمىز»، - دەدى ب. سۇلتان.
وسى ورايدا، بوكسشىنىڭ «قازاق سپورتى» گازەتىنە بەرگەن سۇحباتىنان ءۇزىندى كەلتىرە كەتكەندى ءجون سانادىق.
«قازاققا دەگەن مەنىڭ وكپەم جوق. كەرىسىنشە، مەن قازاق حالقىنىڭ الدىندا قارىزدارمىن. ەلگە كەلگەندە «وليمپياداعا بارامىن، ەگەر بولماسا، كاسىپقوي بوكسقا بارىپ قازاقتىڭ اتىن شىعارامىن» دەپ وزىمە-ءوزىم سەرت بەرگەنمىن. مەن قازىر كاسىپقوي بوكسقا كەتتىم. بۇل جەردە مەن جەكە باسىمنىڭ ماسەلەسىن كۇيتتەپ كەتكەن جوقپىن. ارمانىم - ا ق ش-تا ءجۇرىپ، قازاقتىڭ اتىن شىعارۋ. قازاق ۇلتىنىڭ مىقتىلىعىن بۇكىل الەمگە پاش ەتسەم، ارمانىمنىڭ ورىندالعانى. كاسىپقوي بوكستا دا قازاقتىڭ ءانۇرانىن شىرقاتىپ، كوك تۋىن جەلبىرەتۋگە بولادى»، - دەدى قانات.
قازاقتىڭ باتىر ۇلى قانات يسلام 1984- جىلى 13- قىركۇيەكتە دۇنيەگە كەلدى. ول اۋەسقوي بوكسشى رەتىندە قىتاي حالىق رەسپۋبليكاسى ۇلتتىق قۇراما كومانداسىنىڭ قۇرامىندا بەيجىڭ وليمپياداسىنىڭ قولا جۇلدەگەرى، چيكاگودا وتكەن الەم چەمپيوناتىنىڭ (2007) جانە ازيا ويىندارىنىڭ (2006) قولا جۇلدەگەرى. قىتايدىڭ 10 دۇركىن چەمپيونى. 2010 -جىلى ازاماتتىعىن اۋىستىرىپ، اتامەكەنى قازاقستانعا كوشىپ كەلىپ «استانا ارلاندارى» كاسىبي كلۋبىنىڭ مۇشەسى بولىپ 2012- جىلعا دەيىن ونەر كورسەتكەن. قازىر كاسىپقوي بوكسشى، «نەلسون» پروموۋتەرلىك كلۋبى اتىنان شارشى الاڭعا شىعىپ ءجۇر! 29 جاسار بوكسشىنىڭ سۇراپىل سوققىسى امەريكانى مويىنداتىپ كەلەدى. 2012-جىلى كاسىپقوي بوكسقا اۋىسقالى بەرى قانات 18 كەزدەسۋ وتكىزىپ، ونىڭ 15 ىندە جەكپە-جەكتى مەرزىمىنەن بۇرىن اياقتاعان.
اۆتور: گۇلميرا عوسمانالي