قازاق بالاسى ەلەكتروندى جايناماز جاسادى
ەندى نامازدا وقىلاتىن سۇرەلەر مەن ايتىلاتىن دۇعالاردى جاتتاۋ قيىن دەيتىن مۇسىلمان باۋىرلامىز وسى جاينامازدى الىپ، قولدانسا بولادى. مۇنداي ەرەكشە دۇنيەنى الماتىلىق الحانباي ساتىبالدى ۇلى (سۋرەتتە) ويلاپ تاۋىپتى.
بۇل جاينامازدىڭ ۇزىندىعى 140 سانتيمەتردى قۇرايدى. قازاقتىڭ ۇلتتىق ويۋ- ورنەگىمەن كەستەلەنگەن. جوعارى جاعىنا ءتورتبۇرىشتى چيپ ورناتىلعان. وعان 10 سۇرە مەن ناماز وقىعاندا ايتىلاتىن دۇعا- تىلەكتەر ەنگىزىلگەن. كادىمگى «باتارەيكامەن» جۇمىس ىستەيدى. قۇلاققاپپەن دە تىڭداۋعا بولادى.
«بۇل جايناماز ارقىلى نامازدى شاريعاتقا ساي تولىمدى ورىنداۋعا بولادى، - دەيدى الحانباي ساتىبالدى ۇلى. - ياعني ناماز وقۋشى ساجدەگە جىعىلىپ، رۋكۋعقا تۇرعانداعى بارلىق قيمىلىن قالىپتاسقان ۇلگىگە ساي جاساي الادى. بۇل اسىرەسە ناماز وقۋدى ەندى باستاعان، ءالى سۇرەلەردى تولىق جاتتاپ ۇلگەرمەگەن نەمەسە سۇرەلەردى جاتتاۋعا مۇمكىندىگى جوق قارت كىسىلەرگە تاپتىرماس دۇنيە. ءوزىم بەس ۋاقىت ناماز وقيتىندىقتان مەشىتتەردە جاسى ەگدە تارتقان كىسىلەردەن اراب تىلىندەگى سۇرەلەردى جاتتاۋ قيىنعا سوعاتىنىن ءجيى ەستيتىنمىن. سودان وسىنداي جايناماز جاساپ شىعارۋدى ويلادىم» .
مۇنداي جاينامازدىڭ ازىرگە 13 مىڭ داناسى ساتىلىمعا شىعىپتى. وعان ورناتىلاتىن قۇرىلعىنىڭ ءبىراز بولىگى قىتايدا، قالعانى تايلاندتا جاساپ شىعارىلعان. اۆتور جوباسىن ىسكە اسىرۋ ءۇشىن ەكى جىل ۋاقىتىن جۇمساعان كورىنەدى.
بۇل جاينامازدى ەلىمىزدىڭ باس ءمۇفتيى ەرجان قاجى مايامەروۆتىڭ ءوزى سىناقتان وتكىزىپ، دىنتانۋشىلارمەن بىرلەسە ساراپتاپ، ماقۇلداپتى. ول جاينامازدىڭ ەلەكتروندى نۇسقاسى دىنىمىزگە قايشى دۇنيە ەمەستىگىن اڭعارتسا كەرەك.
«وكىنىشكە قاراي، ادامدار ءالى مۇنداي جاينامازعا اسا ءمان بەرمەي جاتىر. ودان گورى جالعان دۇنيەنىڭ جىلتىراعان زاتتارى وتىمدىرەك پە دەپ قالامىن كەيدە. سەبەبى ءالى ەش جەردە جۇمىس ىستەمەيتىن جاپ- جاس قىز- جىگىتتەرىمىز 100-150 مىڭ تەڭگەنىڭ تەلەفونىن ۇستاۋعا قۇمار دا، اللانىڭ الدىنداعى پارىزىن ورىنداۋعا ارنالعان جايناماز سىندى زاتتاردى ساتىپ العاندا قۇلىقسىزدىق تانىتادى. ەندىگى بار كۇش- جىگەرىمدى وسى جاينامازدى جارنامالاۋعا جۇمساپ جاتىرمىن. مۇنداي زات يسلام ءدىنى كەڭ تارالعان ەشبىر ەلدە جاسالماعان. 4500 تەڭگەدەن ساۋدالانۋدا. ال ونى ون دانادان كوپ العان ادامدارعا ايتارلىقتاي جەڭىلدىكتەر قاراستىرىلعان» ، - دەيدى الحانباي ساتىبالدى ۇلى.
اۆتور: س. ماقۇلبەك.
«الاش ايناسى»