استانادا قازاقستان مۇسىلماندارى ءدىني باسقارماسى عيماراتى سالىنادى
جۋىردا عانا قايتا جاساقتالعان مادەنيەت جانە سپورت مينيسترلىگىنىڭ باسشىسى ارىستانبەك مۇحامەدي ۇلى الماتىداعى قازاقستان مۇسىلماندارى ءدىني باسقارماسى ەندى ەلوردا تورىنەن قونىس تەبەتىندىگىن ايتتى.
«ءيا، الماتى جىلى ايماق، قولايلى تابيعات اياسىندا. دەگەنمەن، ءدىني باسقارمانى ەل ورتالىعىنا كوشىرۋىمىز كەرەك»، - دەدى مينيستر.
ال ءدىن ىستەرى كوميتەتىنىڭ ءتوراعاسى عالىم شويكين ق م د ب-نىڭ ەلىمىزدەگى وزگە ءدىني بىرلەستىكتەرمەن قارىم-قاتىناس جاساۋدا ءتيىمدى باعىت ۇستانىپ، جەمىستى ەڭبەك ەتىپ كەلە جاتقانىن اتاپ ءوتتى، دەپ حابارلايدى «نۇر استانا» ورتالىق مەشىتىنەن.
«ءدىني باسقارمانى استاناعا كوشىرۋ ماسەلەسى شەشىلۋى ءتيىس. قازىرگى ۋاقىتتا قاجەتتى قۇجاتتار رەسىمدەلۋدە. ال كەلەسى جىلدىڭ باسىنان ق م د ب عيماراتى سالىنادى دەپ جوسپارلاپ وتىرمىز»، - دەدى ع. شويكين.