شىنجاڭ- ۇيعىر اۆتونوميالىق ولكەسىندە سەگىز لاڭكەس ءولتىرىلدى

 بەيجىڭ. قازاقپارات - ق ح ر- دا شىنجاڭ- ۇيعىر اۆتونوميالىق ولكەسىنىڭ (ش ۇ ا ءو) سولتۇستىك- باتىسىندا زومبىلىق جاساپ، ءبىرقاتار لاڭكەستىك شابۋىل جانە قىلمىستار جاساعانى ءۇشىن سەگىز ادام ءولتىرىلدى.

 قىلمىسكەرلەرگە بەس ءارتۇرلى ارەكەتتەر - بەيجىڭدەگى تيانانمين الاڭىندا لاڭكەستىك اكتى جاساعانى، اقسۋدا پوليتسەي ۋچاسكەسىنە شابۋىل جاساعانى، زاڭسىز جارىلعىشتار جاساعانى جانە قاشعاردا قاساقانا كىسى ولتىرگەنى، سونداي- اق لاڭكەستىك ۇيىم قۇرىپ، مەملەكەتتىك شەنەۋنىكتەردى ولتىرگەنى، حوتاندا پوليتسەي ۋچاسكەسىن ورتەگەنى ءۇشىن ەڭ جوعارى ءولىم جازاسىنا ۇكىم شىعارىلدى.

ەسكە سالا كەتەيىك، 2013 - جىلعى 28 -  قازاندا تيانانمين الاڭىندا لاڭكەستىك اكتى بولدى. لاڭكەس باسقارعان جول تالعامايتىن ماشينا تۇرعان ادامداردى باسىپ ءوتىپ جارىلعان، سونىڭ سالدارىنان التى ادام ءولىپ، 39 ى جارالاندى. قىتاي بيلىگى 22 - مامىردا ءۇرىمجى بازارلارىنىڭ بىرىنشە بولعان لاڭكەستىكتەن كەيىن لاڭكەستىككە قارسى ءبىر جىلدىق ناۋقاندى باستادى. ول كەزدە بىرنەشە جارىلىس سالدارىنان 39 ادام ءولىپ،  94 ءى جاراقاتتانعان بولاتىن.

 شىنجاڭنىڭ جەرگىلىكتى سۋديالارى 5- مامىردا لاڭكەستىك ۇيىمداردى قۇرعانى نەمەسە باسقارعانى، قاساقانا كىسى ءولتىرىپ، ءورت سالعانى ءۇشن 12 ادامعا ءولىم جازاسىن بەردى، تاعى 69 ادامعا ءومىر بويى تۇرمەدە وتىرۋعا جانە ءارتۇرلى مەرزىمگە باس بوستاندىعىنان ايىرۋعا جازا تاعايىندالدى.

 ەسكە سالا كەتەيىك، ش ۇ ا ءو- دە شىنجاڭدى ق ح ر- دان ءبولىپ اكەتۋ ءۇشىن كۇرەسىپ جاتقان «شىعىس تۇركىستان يسلام قوزعالىسى» ەكسترەميستىك ۇيىمى ارەكەت ەتەدى. قىتايدا لاڭكەستىك ۇيىم دەپ تانىلعان بۇل زاڭسىز قارۋلى قۇرىلىم شىنجاڭدا جانە ق ح ر- دىڭ باسقا دا اۋداندارىندا ءبىرقاتار شابۋىلدار جاسادى، ولاردا قۇقىق قورعاۋ ورگاندارى قىزمەتكەرلەرىمەن قاتار بەيبىت تۇرعىندار قۇربان بولدى.

 قىتاي بيلىگى 2009 - جىلعى ۇرىمجدەگى جاپپاي تارتىپسىزدىكتى ۇيىمداستىرۋعا «شىعىس تۇركىستان يسلام قوزعالىسى» جاۋاپتى دەپ سانايدى. ول كەزدە 197 ادام قازا تاپتى، 1700 دەن استامى جاراقاتتاندى.