مەنىڭ ءومىرىم ءيت ءومىر
ماتيماتيكاعا ءالسىز بولعامىممەن، ءتىل- ادەبيەتكە قۇمار ەدىم. ارا- تۇرا وزىمنەن ءبىر سىنىپ تومەن وقيتىن قىزدارعا عاشىق بولعانىم سونشالىق، ولاردىڭ كەيبىرىنە ارناپ ولەڭ دە جازىپ تۇردىم.. شىعارمالارىمنىڭ اراسىندا ءوز سەزىمىمدى وزگەلەرگە ءبىلدىرۋ ماقساتىندا لاقاپ اتپەن اڭگىمەلەر جازعان كەزدەرىم دە بولعان. سول سەبەپتى سىنىپتاستارىمنىڭ الدى بولماسام دا، ارتى بولماعانىم انىق. كەي ۋاقىتتاردا ءتۇرلى ۇيىرمەلەرگە بارىپ، مەكتەپ اراسىندا وتەتىن جىل سايىنعى جەڭىل اتلەتيكا جارىستاردا جۇلدەلى ورىنداردان كورىنسەم، «بال داۋرەن» ۆوكالدى ينسترۋمەنتالدى ءانسامبلدىڭ بەلدى ءانشىسى دە بولعانمىن. سونىڭ ارقاسىندا ءوزىم وقىعان ءبىلىم ورداسىنىڭ نامىسىن تالاي سايىستاردا قورعاعانىم ءالى ەسىمدە. كەيىن ويلاپ قاراسام، اتا- انام مەن تۋعاندارىم مەنەن كەرەمەتتەي جەڭىس كۇتپەسە دە، ورتادان جوعارى ءومىر سۇرەدى دەپ توپشىلاسى كەرەك.
وكىنىشكە وراي، بيىل جاسىم 39 عا كەلگەن مەنىڭ ءومىرىم ولاي بولماي شىقتى. قازىر باسىمدا باسىبايلى باسپانام دا، بالا- شاعام دا جوق. ءتىپتى مەن وسى جاسقا كەلگەنشە ۇيلەنگەن دە ەمەسپىن. وعان سەبەپ تە جوق ەمەس. قولىمدا ديپلوم بولماعاندىقتان جالاقىسى جوعارى جۇمىسقا دا كىرىپ كورمەپپىن. سوڭعى 8 جىلدان بەرى ىستەپ كەلە جاتقان جۇمىسىم - پوەزد ماشينيستەرىن تاسۋ. مەنىڭ ناپاقا تاۋىپ جۇرگەن جەرىم 1- ء الماتى ۆوكزال ماڭىنداعى تەمىرجول دەپوسى. ءوزىم 10 جىل وقىعان مەكتەبىمنىڭ قاسىندا بىرگە جۇمىس ىستەيتىن ەكى جىگىتپەن بىرىگىپ پاتەر جالداپ تۇرامىن. پاتەردە بىرگە تۇراتىن ارىپتەستەرىمنىڭ ىشىندەگى ەڭ ۇلكەنى مەنمىن. وزىمنەن 15-17 جاس كىشى بويداقتاردىڭ ءجۇرىس- تۇرىسىنا قاراپ، جاس كۇنىمدە جىبەرگەن سان ءتۇرلى قاتەلىكتەرىم ەسىمە تۇسەدى. جانە ول بالالاردىڭ مەنىڭ ايتقانىمدى تىڭدامايتىنىن ىشتەي سەزەمىن دە. ولار ويلايدى «مەن ومىردە ءوز ورنىن تابا الماعان بەيشارا» دەپ. جانە ولاردىڭ ويى دۇرىس تا. ال بەيشارانى كىم تىڭداسىن. مەنىڭ سوزىمە ەشكىم قۇلاق اسپايتىندىقتان قولىما قالام الىپ، «الاش ايناسى» گازەتىندەگى «وتباسى - وشاق قاسى» ايدارىنا باسىمنان وتكەندەردى جازىپ، ءبىر ادامعا بولسا دا وي سالارمىن، اداسىپ جۇرگەندەردى كەرى قايتارارمىن دەگەن ماقساتپەن ىشىمنەن شىققان شەرىمدى تارقاتىپ وتىرمىن. ەگەر مۇمكىندىك بولىپ جاتسا وسى جازعاندارىمدى جاريالاساڭىزدار سىزدەرگە مىڭ العىس ايتار ەدىم.
ءبىز ءۇش اعايىندىمىز. ءۇيدىڭ تۇڭعىشىمىن. مەنەن ەكى جاسقا كىشى داۋلەت ەسىمدى ءىنىم 21 جاسىندا- اق شاڭىراق كوتەرسە، قازىر ءۇش بالاسىن ەل قاتارلى باعىپ- قاعىپ وتىر. اينۇر ەسىمدى جالعىز قارىنداسىم، ءالى كۇنگە تۇرمىسقا شىقپاعانىمەن ايلىعى ءتاۋىر بانكتە جۇمىس ىستەيدى. ال زەينەت جاسىنداعى اكەمىز داۋلەتتىڭ قولىندا. شەشەمنىڭ و دۇنيەگە اتتانعالى 7 جىل تولدى. 1992 - مەكتەپ بىتىرگەن جىلى سىنىپتاستارىمنىڭ باسىم كوپشىلىگى وقۋعا تاپسىرىپ، ومىرگە جوسپارىن قۇرىپ، جان- تالاسىپ جاتقاندا مەن اسكەرگە بارىپ قايتىپ، پوليتسيا قىزمەتكەرى اتانۋ ەدى. ال ۋاقىتى كەلگەندە مەنى اسكەرگە الماي قويدى. وعان سەبەپ سول قۇلاعىم ناشار ەستيدى. اسكەرگە بارمايتىنىمدى ەستىگەن اكەم «جيگۋلي» ساتىپ اپەردى. كەيىن ويلاپ قاراسام، ول كولىك ماعان باقىت ەمەس، قاسىرەت اكەلگەندەي ەكەن. ولاي دەيتىنىم قالادا اكەمنىڭ 5 بولمەلى جەر ءۇيى بولعانىنا قاراماستان ول كولىك مەنىڭ جاتىن ورنىما دا، اسحاناما دا اينالعان. اكەمنىڭ ۇيىندە كەي جىلدارى جىلىنا ەكى- ءۇش- اق رەت قانا بارعان كەزىمدە ەسىمدە. قاسىما ءوزىم سەكىلدى ەش جەرگە وقۋعا تۇسپەگەن، نە تۇراقتى جۇمىستا جوق قۋات ەسىمدى سىنىپتاسىمدى ەرتىپ الىپ، وتىزعا كەلگەنشە باسىمىز اۋعان جاقتا جۇردىك، ويىمىزعا كەلگەنىن ىستەدىك. ءسويتىپ جۇرگەندە ەكەۋمىز ويىن اۆتوماتىنىڭ قىزىعىنا قالاي كىرىپ كەتكەنىمىزدى بىلمەي قالىپپىز.
قۋات ەكەۋمىزدى ىزدەگەندەر قالاداعى ويىن اۆتوماتى بار جەرلەردى ارالايتىن. مەنىڭ بەرەكەسىز تىرلىگىمە ابدەن اشىنعان اكەم زەينەتكە شىعار جىلى (2003 - جىل. الماتىدا پاتەر باعاسى قىمباتتاماي تۇرعان) سەيفۋللين مەن قاراساي باتىر كوشەسى قيىلىسىنان 7 مىڭ دوللارعا ءبىر بولمەلى پاتەر الىپ بەردى. ال ول ۋاقىتتا مەن قارىزعا بەلشەدەن باتىپ، ءوزىمدى قويارعا جەر تاپپاي سەندەلىپ، قارىزعا اقشا العان تانىستارىمنىڭ بارلىعىنان قاشىپ- پىسىپ، جاسىرىنىپ جۇرگەنمەن. ءتىپتى ءوزىمدى دارا اسۋعا دەيىن بارعانمىن. ەگەر سول كەزدە قاسىمدا قۋات بولماعاندا كىم ءبىلسىن قازىر و دۇنيەدە جۇرگەنىممەن ول جاقتا دا انامنان ۇرىس ەستىپ ءجۇرۋىم مۇمكىن ەدى. سول جىلدارى ماعان قارىزعا اقشا بەرگەن تانىستارىم جىلدار بويى الا الماي جۇرگەن اقشاسىن قايتارىپ الۋ ماقساتىندا ەكى- ۇشتەن جينالىپ كەلىپ بىرنەشە رەت سوققىعا دا جىققان كەزدەرى دە بولعان. سونىڭ سالدارىنان دەنساۋلىقتان دا ايىرىلدىق. مەنىڭ بۇگىنگى ءومىرىم كۇندەلىكتى ءوز نانىن تاۋىپ جەپ جۇرگەن يتتىكىنە ۇقساس. سوندىقتان اعايىن مەن جىبەرگەن قاتەلىكتى سىزدەر جىبەرمەسەڭىزدەر ەكەن دەيمىن. جىبەرگەن ەڭ ۇلكەن قاتەلىگىم جالپى ادام اراقتى جەڭە الماعانداي، ويىن اۆتوماتتارىن دا جەڭە المايدى ەكەن. وكىنىشتىسى مەن سونى كەش ۇقتىم. قينالعانىم سونشالىق اكەم سىيلاعان ۇيدە سول جىلى ساتىپ جىبەرىپ، الدىمەن سومماسى ۇلكەن قارىزدارىمدى جاپتىم. سول كۇندەردەن قالعان قارىزدارىمدى ءبىرشاماسىن ءالى كۇنگە دەيىن قايتارۋمەن كەلەمىن. اللا قالاسا وسى جىلدىڭ سوڭىندا قارىزدارىمنان تولىقتاي قۇتىلامىن دەپ وتىرمىن.
قازىر مەنىمەن بىرگە تۇرىپ جاتقان 22-24 جاسار ەكى جىگىت قولدارى قالت ەتسە، كارتا وينايتىن بولىپ ءجۇر. ال مەن ولاردىڭ ءومىرى مەنىكىنە ۇقساس بولعانىن قالامايمىن.