قاراقات پەن ءقىدىرالى قايدا قىدىرىپ ءجۇر - فوتو
قاراقات ءابىلدينا باسپا ءسوز بەتىنە بەرگەن ءبىر سۇقباتىندا ءقىدىرالى بولمانوۆپەن 1996- جىلى 1- جەلتوقسانىندا جەرلەس اعاسىنىڭ مەرەيتويىندا تانىسقانىن بايانداعان ەدى. «مەن ول كەزدە ون سەگىز جاستا ەدىم. ءبىر-ءبىرىمىزدى ۇناتىپ، 4 جىلداي كەزدەسىپ جۇردىك. ودان سوڭ عانا شاڭىراق كوتەرەمىز دەپ شەشتىك. اتا-انامىزدىڭ كەلىسىمىمەن توي جاساپ، بارلىق ءداستۇر-جورالعى بويىنشا وتاۋ تىكتىك»، - دەپ ەسىنە الادى ءانشى. سونىمەن قاتار ولاردى ەڭ الدىمەن ونەر تابىستىرعانىن جاسىرمايدى.
وتباسى شىرقىنىڭ بۇزىلماۋى ءۇشىن قاراقات ءابىلدينا ەرلى-زايىپتىلاردىڭ اراسىندا سەنىم مىقتى بولۋ كەرەكتىگىن باسا ايتادى: «ەكەۋمىز وتباسىن جاڭا قۇرعان جىلدارى تەلەفوندا مازا بولمايتىن. ال مەرەكە كۇندەرى، وزگە دە رەتى كەلگەن ۋاقىتتا حابارلاسقان قىزداردا شەك جوق. وعان قۋانباسام، رەنجىمەيمىن.
جالپى، ەرلى-زايىپتى ادامداردا ءوزارا سەنىم مىقتى بولۋى كەرەك. ونسىز بولمايدى. قىدىردى مۇلدەم قىزعانبايمىن دەپ ايتا المايمىن. ايتپەسە، سەنىڭ ول ادامعا دەگەن سەزىمىڭنىڭ جوقتىعىن بىلدىرەدى. بالالارىمنىڭ اكەسى، ءوزىمنىڭ ءسۇيىپ قوسىلعان جارىم بولعاننان كەيىن قىزعاناتىنىم راس. ءبىراق مەندەگى قىزعانىش ەسەر ەمەس، ەستى قىزعانىش. سوندىقتان سانالى تۇردە قىزعانا ءبىلۋ كەرەك.
ەڭ باستىسى جۇرەكتەگى سەنىمگە كىرىپ، ءبارىن دە اقىلمەن شەشۋ قاجەت. سوندا عانا ماحاببات ماڭگىلىككە ۇلاسادى. ەرلى-زايىپتى ادامدارعا وتباسىنىڭ شىرقىن كەتىرەتىن اۋىر سوزدەر ايتىپ، ءبىر-ءبىرىنىڭ كوڭىلىن قالدىرۋعا بولمايدى. بارلىعىن تارازىعا سالىپ، اقىلمەن ولشەپ ىستەۋ كەرەك. ءجون-جوسىقسىز قىزعانىش جاقسىلىققا اپارمايدى. اللاعا شۇكىر، جارىم ەكەۋمىزدىڭ ارامىزدا سەنىم، ادامي تۇسىنىستىك، ءبىر-بىرىمىزگە دەگەن سەزىم بار. ءبىز ۇساق-تۇيەك جايتتارعا ەشقاشان ءمان بەرمەيمىز»، - دەيدى كوپبالالى انا.
باس قوسقان 15 جىل ىشىندە ونەرلى وتباسىندا بەكبولات، ءيمانالى، ءنۇرالي، ايسۇلتان ەسىمدى ءتورت ۇل پەرزەنت دۇنيەگە كەلگەن. انشىلىكپەن قاتار، ءقىدىرالى بولمانوۆ «بال-بالا» ماركاسىمەن قازاق تىلىندە ءان ايتىپ، بي بيلەيتىن قازاقي بولمىستى ويىنشىقتار شىعارۋمەن اينالىسادى. قول ۇستاسقان قوس جۇپتىڭ «اينالايىن»، «باعىم سەن»، «حانزادا»، «اياۋلىم» سياقتى بىرنەشە تانىمال ءانى دە تىڭدارمانداردىڭ جۇرەگىن جاۋلاپ، وشپەس مۇراعا اينالدى.
مەرەيتوي قارساڭىندا ەكى جۇپ وتباسىمەن تۇركيا ەلىنە دەمالىسقا اتتانىپ، وزدەرىنىڭ الەۋمەتتىك جەلىدەگى رەسمي پاراقشاسىندا ءبولىسىپ وتىردى.
سايتىمىزدىڭ اتىنان ونەرلى وتباسىنا مىقتى دەنساۋلىق، باق-بەرەكە تىلەيمىز. قازاق جاستارىنا ۇلگى بولارداي وسىنداي وتباسىلار كوبەيە بەرسىن!
دايىنداعان: انار مۇستافينا
massaget.kz