لوندوندا قازاقستاننىڭ بەيبىتشىلىك جانە كەلىسىم ورتالىعى اشىلادى
08:35, 20 - تامىز 2014
استانا. قازاقپارات - 26- تامىزدا ۇلى بريتانيانىڭ لوندون قالاسىندا قازاقستاننىڭ بەيبىتشىلىك جانە كەلىسىم ورتالىعىنىڭ اشىلۋ سالتاناتى وتەدى. بۇل تۋرالى قازاقستان حالقى اسسامبلەياسىنىڭ باسپا ءسوز قىزمەتىنەن حابارلادى.
ورتالىقتىڭ اشىلۋى - ەتنوسارالىق تولەرانتتىق جانە قوعامدىق كەلىسىمنىڭ قازاقستاندىق مودەلىن تانىتۋعا، مەملەكەت ارالىق قارىم-قاتىناستاردى نىعايتۋعا، ساياسي، ساۋدا-ەكونوميكالىق جانە ءبىلىم بەرۋ، مادەني ىنتىماقتاستىقتىڭ باسىم سەكتورلارىندا ەكى جاقتى قارىم-قاتىناستى كەڭەيتۋگە باعىتتالعان.
اشىلۋ سالتاناتىنا قازاقستان حالقى اسسامبلەياسى ءتوراعاسىنىڭ ورىنباسارى - حاتشىلىق مەڭگەرۋشىسى ەرالى توعجانوۆ، ۇلى بريتانيا پارلامەنتىنىڭ قاۋىمدار پالاتاسىنىڭ دەپۋتاتى سەر توني بولدري جانە بريتاندىق ينۆەستورلار، عالىمدار، ەكى جاقتى ىنتىماقتاستىق تۋرالى كەلىسىمدەر شەڭبەرىندە قارىم-قاتىناس جۇرگىزەتىن كومپانيا وكىلدەرى قاتىسادى.