گۇلدەن توقىلعان ەڭ ۇلكەن كىلەم
كەستەلەپ شىعۋعا مىڭداعان بەگونيا گۇلى جۇمسالاتىن كىلەم 2 -جىلدا 1 مارتە دايىندالىپ، كۇللى الەم تۋريستەرىنىڭ نازارىن ەرىكسىز وزىنە اۋدارتادى. بريۋسسەلدە اۋماعى 2,5 مىڭ شارشى مەتر بولاتىن گۇلمەن كومكەرىلگەن كىلەم 40 -جىلدان استام ۋاقىتتان بەرى دايىندالىپ كەلەدى. عاجايىپ كىلەم فلوريستيكا ونەرىندەگى جاۋھار تۋىندىلاردىڭ ءبىرى رەتىندە باعالانادى. جىل سايىن ونىڭ تاقىرىبى دا وزگەرىپ وتىرادى. بۇل جولى ديزاينەرلەر تۇركيا مەن تۇرىك كىلەمىنە باسىمدىق بەرىپتى. ۇلتتىق ويۋ- ورنەكتى الاڭ اۋماعىنا ورنالاستىرۋ پروتسەسىنە تۇرىكتىڭ بەلگىلى كىلەم توقۋشىلارى باسشىلىق ەتەدى.
ستەين گووسەنس، فلوريست: - ءاربىر سەكتور گۇلدىڭ ءتۇر- تۇسىنە قاراي بولىنگەن. پروتسەستى باقىلاۋعا العان 4 شەبەر قانداي گۇلدى قاي جەرگە ورنالاستىراتىنىن كورسەتەدى. ويتكەنى مۇندا الۋان ءتۇرلى ءجۇز مىڭداعان بەگونيا گۇلدەرى بار. كوەن ۆوندەنبۋش، شارانى ۇيىمداستىرۋشى: - بۇل ۇلكەن پازل ءتارىزدى. ءار گۇل ءوز ورنىندا بولۋى ءتيىس. ايتپەسە سۋرەتتىڭ كەسكىنى بۇزىلادى. گۇلمەن ورنەكتەلگەن كوزدىڭ جاۋىن الاتىن كىلەمدى دايىنداۋ بارىسى 1 -جىلعا سوزىلادى. ديزاينەرلەر مەن باعباندار ويۋ- ورنەك تاڭداپ، عاجايىپ تۋىندىنىڭ جوباسىن ازىرلەيدى. مەرەكەدەن ءبىر كۇن بۇرىن الاڭعا توپىراق توسەلەدى. بيىل كىلەمدى توقۋعا 120 فلوريست پەن ەرىكتىلەر جۇمىلدىرىلىپ، 700 مىڭنان استام بەگونيا قولدانىلدى. قايتالانباس تۋىندىنى ازىرلەۋ ءۇشىن ۇزاق ۋاقىت ساقتالاتىن وسى گۇلدەر تاڭدالىپ الىنادى. ساسكيا دە گراۆە، ەرىكتىلەر توبىنىڭ مۇشەسى: - گۇلدى كىلەم - بريۋسسەلدىڭ باستى نىشانى. مىڭداعان تۋريست وسى عاجايىپتى ءوز كوزدەرىمەن كورۋ ءۇشىن الەمنىڭ تۇكپىر- تۇكپىرىنەن اعىلادى. كەش قارايا گۇلدى كومپوزيتسياعا پروجەكتوردىڭ جارىعى تۇسىرىلەدى. ال سوڭعى كۇنى قالا تۇرعىندارى مەن قوناقتارى گۇلدى گوبەلەنمەن قوش ايتىسادى. بۇل كۇنى جارىق ساۋلەلى شوۋ مەن سالتاناتتى وت شاشۋ ۇيىمداستىرىلادى. اۆتورلارى: گۇلداريا شامۇراتوۆا، جانات ەرنست، جومارت احمەتوۆ