اناسىن ءولتىرىپ، دەنەسىن بۇتارلاپ تاستاعان بويجەتكەن ۇستالدى

استانا. قازاقپارات - يندونەزيا پوليتسياسى بالي ارالىنداعى قوناق ۇيلەردىڭ بىرىنەن دەنەسى بولشەكتەلىپ، شابادانعا سالىنعان ا ق ش-تىق ايەلدىڭ ءمايىتىن تاپتى، دەپ جازادى 24.kz.

جان تۇرشىگەرلىك قىلمىسقا كۇدىكتى رەتىندە 62 جاستاعى مارقۇمنىڭ 19 جاستاعى قىزى مەن ونىڭ 21 جاسار دوسى ۇستالدى. پوليتسەيلەردىڭ ايتۋىنشا، جاستار قوناق ۇيگە تاكسي شاقىرىپ، شاباداندى كولىكتىڭ ارتىنا سالعان. وسىدان كەيىن جۇرگىزۋشىدەن ءسال كۇتە تۇرۋىن سۇراپ، سول جەردەن ءىزىن سۋىتقان.

ءبىرقاتار ساراپتاما جۇمىسىنان كەيىن ماماندار ايەلدىڭ ءولىم الدىندا بىرنەشە دەنە جاراقاتىن العانىن انىقتادى. قوناق ۇيدەگى بەينەباقىلاۋدىڭ بىرىندە مارقۇمنىڭ 21 جاستاعى جىگىتپەن كەلىسپەي قالىپ، ۇرىسقان كەزى ءتۇسىپ قالعان.

قازىرگە كۇدىكتىلەر تاعىلعان ايىپتى مويىنداماي وتىر. وعان قوسا چيكاگو پوليتسيسى اناسى مەن قىزى تۇرعان ۇيگە 2004-2013 -جىلدار ارالىعىندا 86 رەت شاقىرۋ العاندارىن جەتكىزدى. تانىستارىنىڭ ايتۋىنشا، ەكەۋىنىڭ قارىم-قاتىناسى وتە ناشار بولعان.