سولتۇستىك كورەيا جاپون تەڭىزىنە قاراي تاعى زىمىران ۇشىردى

استانا. قازاقپارات - ك ح د ر بەيسەنبى كۇنى سەۋلگە ريم پاپاسى فرانتسيسكانىڭ كورەي تۇبەگىنە بەيبىتشىلىكتى ۇندەۋ ماقساتىمەن كەلىپ قونۋىنا ساناۋلى عانا مينۋت قالعاندا جاپون تەڭىزىنىڭ اكۆاتورياسىنا جاقىن قاشىقتىقتى بىرنەشە بالليستيكالىق زىمىران ۇشىردى.

بۇل تۋرالى كورەيا رەسپۋبليكاسىنىڭ قارۋلى كۇشتەر قولباسشىلار شتابىنا سىلتەمەمەن  newsas.net  حابارلادى.

«زىمىران شىعىس جاعالاۋداعى ۆونسان قالاسى اۋدانىنان سولتۇستىك- شىعىس باعىتقا قاراي اتىلدى» ، - دەيدى كۇش باسپا ءسوز حاتشىسى وم حيەسيك. - ءبىزدىڭ قارۋلى كۇشتەرىمىز جاعدايدى ءجىتى باقىلاۋعا الدى، وسىعان بايلانىستى قوسىمشا شارالار قولداناتىن بولادى» .

ساراپشىلار باعاسى بويىنشا، اتقىلاۋ جاقىن قاشىقتىقتاعى زىمىرانعا لايىقتالعان 300 م م كاليبرلى KN-09 اتىس قارۋىمەن رەاكتيۆتى جۇيەنى جەتىلدىرۋ شەڭبەرىندەگى سىناق رەتىندە جۇرگىزىلگەن. وڭتۇستىك كورەيا اسكەريلەرىنىڭ مالىمەتى بويىنشا، اتۋ جەرگىلىكتى ۋاقىتپەن 09:30 ساعاتتا جاسالعان. زىمىران 220 شاقىرىم قاشىقتا، تەڭىزدىڭ ۇستىنە قۇلاعان.

«رەنحاپ» اگەنتتىگى شتاب وفيتسەرلەرىنىڭ ءبىرىنىڭ: «شاماسى، سولتۇستىك ءوزىنىڭ قارۋىنىڭ كۇشىن كورسەتۋگە تىرىسىپ، ونىمەن ويناۋدى جالعاستىرىپ جاتقان سياقتى» ، - دەگەن ءسوزىن كەلتىرەدى.

سەۋل قازىر مۇنداي سىناقتاردى تالاي مارتە بارىپ قاداعالاعان سولتۇستىك كورەيا باسشىسى كيم چەن ىننىڭ بۇل جولى زىمىراندى اتۋعا قاتىسقان- قاتىسپاعانىن انىقتاۋعا تالپىنىپ جاتىر. «ك ح د ر ۇستىمىزدەگى جىلى بارلىعى 105 زىمىران اتتى» ، - دەلىنگەن حابارلامادا.