ىشىمدىك ءىشىپ، قىلمىس جاساعان لوندوندىقتاردىڭ اياعىنا ەلەكتروندىق بىلەزىك تاعىلماق

استانا. قازاقپارات - ىشىمدىك ءىشىپ، بىرنەشە رەت قىلمىس جاساعان لوندون تۇرعىندارىنىڭ اياعىنا ەندى ەلەكتروندىق بىلەزىك تاعىلاتىن بولدى.

ال اياعى تۇسالعاندار 4 اي بويى اشى سۋدىڭ ءدامىن تاتا المايدى.

ويتكەنى بىلەزىكتىڭ بويىندا ارنايى قۇرىلعى بار. ول ءار جارتى ساعات سايىن ادامنىڭ ىشكەن-ىشپەگەندىگىن دالەلدەپ، دەنە قىزۋىنان اقپارات بەرەدى ەكەن. ەگەر قىلمىسكەر سول ارالىقتا ىشىمدىك ءىشىپ قويسا، سوت الدىنا بارادى.

قىدىرىستاردان كەيىنگى ءدال وسى كورىنىس تۇنگى البيون ءۇشىن ۇيرەنشىكتى جاعداي. اسىرەسە، دەمالىس كۇندەرى ەلدەگى ءتارتىپتى قاداعالايتىن ورگاننىڭ قىزمەتى قىزادى. پوليتسەيلەر ىشىمدىككە سىلقيا تويىپ، توبەلەس شىعارعاندارمەن الىسىپ الەك.

سول سياقتى جەدەل-جاردەم قىزمەتكەرلەرىنىڭ دە اياعىنا تىنىم جوق.

ءوزىنىڭ مولشەرىنەن ارتىق سىلتەپ جىبەرگەندەردى اۋرۋحانالارعا تاسيدى.

بريتانيانىڭ ۇلتتىق دەنساۋلىق ساقتاۋ قىزمەتىنە تيەسىلى 10 ميللياردتىق بيۋدجەتتىڭ ۇشتەن ءبىر بولىگى وسىنداي ماسكۇنەمدەردى جازىپ الۋعا جۇمسالادى.

الەۋمەتتىك ادىلدىك ورتالىعىنىڭ دەرەگى بويىنشا بريتاندىق ەر ازاماتتار ىشىمدىككە قۇمار باتىس ەۋروپاداعى ەلدەردىڭ ىشىندە  ەكىنشى ورىندا كەلەدى.

جەين، لوندون تۇرعىنى:

- ماعان ەشكىم دە ىشۋگە تىيىم سالا المايدى. بۇگىن ءبىز مايكتىڭ تۋعان كۇنىن تويلاپ جاتىرمىز. دۋمانىمىز تاڭعا دەيىن ۇلاسادى.
ءوزىنىڭ وعاشتاۋ ءىس-ارەكەتتەرىمەن ەلگە تانىلىپ بولعان لوندون مەرى بۇل ماسەلەنى شەشۋدىڭ جاڭا ءادىسىن تاپتىم دەپ ويلايدى.

ياعني، ادامنىڭ ساۋلىعىن قاداعالايتىن ەلەكتروندىق بىلەزىك لوندون تۇرعىندارىنىڭ وسپادار ارەكەتتەرىنىڭ الدىن الۋعا كومەكتەسپەك. ەندى سوت شەشىمىمەن ازىرگە 100-150 ادامنىڭ اياعىنا تۇساۋ سالىنادى.

بوريس جونسون، لوندون مەرى:

- بۇل ءادىستىڭ ماقساتى -  ەلدەگى ىشىمدىك ىشكەن ماسكۇنەمدەردىڭ قىلمىستارىن ازايتۋ. لوندوندا قىلمىس سانى ازايعانىمەن، اشى سۋدىڭ كەسىرىنەن بولاتىن ءتارتىپ بۇزۋشىلىقتار تۇيتكىلدى ماسەلەگە اينالىپ وتىر. ادامدار ىشىمدىكتى ءىشۋىن ىشەدى دە، ءوز ءىس-ارەكەتتەرىن باقىلامايدى. سوندىقتان ءبىز وسىعان قارسى ءبىر ايلا تابۋىمىز كەرەك بولدى. بۇل بىلەزىكتەر ءوزىنىڭ تيىمدىلىگىن امەريكادا دالەلدەگەن.

دەگەنمەن دە، قالا باسشىنىسىڭ بۇل باستاماسىنا جان-جاقتان سىن ايتۋشىلار كوبەيدى. بىرەۋلەر مۇنى ادام قۇقىعىن بۇزۋ دەسە، ەندى ءبىرى قۇرىلعىنىڭ ونداي تەحنيكالىق مۇمكىندىگىنە كۇمانمەن قارايدى. ال ءتىپتى كەيبىرەۋلەر بۇل جاڭاشىلدىق ءوز امبيتسياسىن جاسىرماي كورسەتىپ جۇرەتىن كونسەرۆاتور جونسوننىڭ سايلاۋالدى ۇگىت-ناسيحات جۇمىسى دەپ ەسەپتەيدى.

ءسوز سوڭىندا ايتايىق، مۇنداي ءادىس بۇرىن شوتلانديادا دا قولدانىلعان. الايدا اياقسىز قالدى. قازىر وندا بۇل بىلەزىكتەر قولدانىستا جوق.

24.kz