تۇمەن قازاقتارىنىڭ قۇرىلتايى ءوتتى
ءبىراق، تاريحي وتاندارىنان جىراقتا جۇرسە دە، سالت- داستۇرلەرى مەن ادەت- عۇرىپتارىن ۇمىتقان ەمەس.
جىل سايىن باس قوسىپ، قۇرىلتاي وتكىزەدى.
بيىل دا رەسەيدىڭ قايىڭدى ورمانىنىڭ القابىندا قازاقى ءان اسپانداپ، بيشىلەر ءوز ونەرلەرىمەن شاشۋ شاشتى.
تۇمەن وبلىسى قازاقتارىنىڭ قۇرىلتايى جىل سايىن وتكىزىلەدى. جازدىڭ جايماشۋاق ۋاقىتىن تاڭداپ، وڭىردەگى اۋداندار كەزەكتەسىپ ۇيىمداستىرادى. بيىلعى كەزەك سوروكيندىكتەردىڭ ەنشىسىنە ءتيدى.
مەرۋەرت احمەتوۆا، سوروكين اۋدانى قازاقتارى ۇلتتىق- مادەني اۆتونومياسىنىڭ ءتورايىمى:
بىلتىر ءبىرىنشى ورىن العان بولاتىنبىز. سوندىقتان، بيىلعى كەزەك بىزگە ءتيدى. بىردە- ءبىر قازاق ازاماتى شەت قالعان جوق، ءبارى اتسالىسىپ جاتىر.
قۇرىلتاي - تۇمەن قازاقتارى ءۇشىن جاي عانا جيىن ەمەس، ۇلكەن توي. قازاقتىڭ سالت- ءداستۇرىن پاش ەتىپ، كيىم ۇلگىلەرىن كورسەتەدى. ۇلكەندەر جاعى ادەت- عۇرىپتاردى جاستارعا ۇيرەتەدى.
بولات احمەتوۆ، تۇمەن وبلىسىنىڭ تۇرعىنى:
بۇل شارا - وسكەلەڭ ۇرپاققا ۇلگى. سالت- ءداستۇرى مەن ۇلتتىق تاعامدارىن ءبىلىپ وسەتىن بولادى.
«توي دەسە، قۋ باس دومالايدى» ، دەمەكشى، كورشىلەردىڭ مەرەكەسىنەن قازاقستاندىقتار دا قالىس قالعان جوق. سولتۇستىك قازاقستان وبلىستىق اسسامبلەياسىنىڭ وكىلدەرى مەن كوركەمونەرپازدارى تۇمەندىك قانداستارىن قۇتتىقتاپ قايتتى.
كارىباي مۇسىرمان، س ق و «قازاق ءتىلى» قوعامىنىڭ ءتوراعاسى:
سىرتتا جۇرسە دە، وزدەرىنىڭ سالت- ءداستۇرىن، انا ءتىلىن ۇمىتقىلارى كەلمەيدى. سوندىقتان، وسىنداي قۇرىلتاي وتكىزىپ وتىر. وزدەرىنىڭ ونەرگە، انا تىلىنە دەگەن قۇلشىنىستارىن كورسەتىپ وتىر. ءبىز سوعان قۋانىشتىمىز. وسىنداي ىنتىماقتاستىق الداعى ۋاقىتتا دا جالعاسا بەرەدى، دەپ ويلايمىز.
قازاقتىڭ تويى ەشقاشان بايگە مەن كۇرەسسىز وتكەن ەمەس. جىگىتتەر بوز كىلەمدە باق سىناپ، مىقتىلاردى انىقتادى. ەڭ باستىسى، شەتتە جۇرسە دە، سالت- ءداستۇردى دارىپتەي بىلگەن قانداستارىمىز ءۇشىن مۇنداي جيىنداردىڭ ماڭىزى زور.
ساعىندىق ءسابيت ۇلى
«قازاقستان»