ۋكراينا اۋەكومپانياسى ۇشاقتارى قازاقستانعا قاراي رەسەيدى وراعىتىپ ۇشا باستادى
"بۇل- اۋە كومپانياسىنىڭ شەشىمى. ولار (ۋ ح ا - ۋكراينا حالىقارالىق اۋە جەلىلەرى - اۆت. ەسكەرتپەسى) بالاما باعىتتى تاڭداپ الدى. بۇگىنگى كۇننەن باستاپ ولار باسقا نۇكتەدەن - اقتاۋ اۋماعىنان قاتىناۋدى ءجون دەپ تاپتى. بۇگىنگە دەيىن ولار قازاقستان تەرريتورياسىنا رەسەيدىڭ اۋە كەڭىستىگى ارقىلى ۇشىپ جەتەتىن" دەيدى سۇحبات بەرۋشى.
ەسكە سالا كەتەلىك، 2014 - جىلدىڭ 7 - تامىزىندا رەسەي ۋكراينا اۋە كومپانيالارىنا ءوز تەرريتورياسى ارقىلى گرۋزياعا، ءازىربايجانعا، ارمەنياعا جانە تۇركياعا تاسىمال جاساۋعا تىيىم سالعان. ءبىراق ۋكراينا اۋە كومپانيالارىنىڭ رەسەي ارقىلى قازاقستانعا تاسىمال جاساۋىنا تىيىم سالۋ تۋرالى ايتىلماعان. الايدا اۆياتسيا سالاسى ماماندارى ەگەر مۇنداي شەكتەۋ قويىلسا، وندا ۋكرايندىق اۋە كومپانيالار ءبىرقاتار ماسەلەلەرگە تاپ بولادى دەسكەن ەدى.
ماسەلەن، قازاقستان اۋە تاسىمالى قاۋىمداستىعىنىڭ پرەزيدەنتى ۆلاديمير كۋروپاتەنكو، ەگەر رەسەي ۋكرايندىق اۋە كومپانيالارعا ءوز تەرريتورياسى ارقىلى قازاقستانعا جەتۋىنە تىيىم سالسا، وندا ولار قازاقستان باعىتىنا قارايعى بيلەت قۇنىن جوعارلاتۋعا ءماجبۇر بولادى دەپ مالىمدەگەن.
"ەگەر تىيىمعا قازاقستان ىلىنسە، وندا "ەير استانانىڭ" ۋ ح ا (ۋكراينانىڭ حالىقارالىق اۋە جەلىلەرى) الدىندا ەكونوميكالىق جاعىنان، ۋاقىت بويىنشا دا، وتىن شىعىنى بويىنشا دا ارتىقشىلىعى كۇرت ارتار ەدى. ەڭ باستىسى - بيلەتتى قىمباتتاتۋدىڭ قاجەتى بولمايدى. ال كەلەسى تاراپتىڭ بيلەت قۇنى ارتادى. جالپى، مەن ۋكراينانىڭ حالىقارالىق اۋە كومپانيالارى كيەۆتەن الماتىعا قالاي ۇشاتىنىن كوز الدىما ەلەستەتە المايمىن. بۇل ارادا رەسەيسىز ەش بولمايدى. ارينە، "وراعىتىپ" وتەتىن جولدار بار، ول ءۇشىن وزبەكستان مەن قىرعىزستان ارقىلى شامامەن مىڭ شاقىرىمدى ارتقا تاستاۋ كەرەك" دەيدى كۋروپاتەنكو.
جاعدايدى جالپىلاي ساراپشى بىلاي سيپاتتايدى: قازىر ۋكرايندىق اۋە كومپانيالار قالاي ۇشادى، قانداي بالاما باعىتتار بار، سونىڭ بارلىعىن وي ەلەگىنەن وتكىزىپ، مەملەكەتتەرگە تاسىمال ءۇشىن ءوتىنىش جولداۋ كەرەك. "كەيبىر مەملەكەتتەر تاسىمالعا 10 كۇنگە، كەيبىرەۋى 15 كۇنگە رۇقسات بەرەدى. ەگەر الدەكىم بيلەتتى ەكى اي بۇرىن ساتىپ الىپ قويعان بولسا، وندا ولار ەندى قوسىمشا اقشا شىعارعىسى كەلمەيدى، ۋاقىتىن جوعالتادى، ۇشۋدان باس تارتۋلار بولادى، باسقا كومپانيا ۇشاقتارىنا وتىرعىزۋ جايتى ورىن الادى جانە ت. س. س. " دەيدى سۇحبات بەرۋشى.
سونداي- اق ول ارتىق قوسىلعان شاقىرىمدار - قوسىمشا وتىن شىعىندارى ەكەنىن ەسكەرتەدى. سوندىقتان ۋكراين اۋە كەمەلەرىنە جانارماي قۇيۋ ورىندارىن ىزدەۋ كەرەك بولادى، دەمەك قوسىمشا قونۋ مەن ۇشۋلار بولادى، بۇل دا ءبىرقاتار اۋىرتپالىق تۋعىزادى. ساراپشى مۇنىڭ بارلىعى بيلەتتىڭ قىمباتتاۋىنا جانە ۋكراين اۋە كومپانيالارىنىڭ شىعىنعا باتۋىنا اكەپ سوعادى دەپ قورىتىندىلايدى.
ۋكراينانىڭ ءىرى اۋە كومپانياسى - ۋكراينا حالىقارالىق اۋە جەلىلەرىنىڭ ۇشاعى الماتى مەن استاناعا ءجيى قاتىنايدى. وسى باعىتتار ارقىلى قازاقستاندىقتار تۇركياعا جانە ەۋروپاعا جول تارتادى.
ەسكە سالا كەتەلىك، 8 - تامىزدا ۋ ح ا- نىڭ ەكى ۇشاعى قازاقستاننان كيەۆكە بەلگىلەنگەن ۋاقىتىندا جەتە الماعان. الماتى اۋەجايىنداعى ونلاين- تاقتايشا سايتى مالىمەتىنە سايكەس، ۋ ح ا ۇشاعى كيەۆكە قاراي اۋەجايدان 8 - تامىزدىڭ 05.40 ۋاقىتىندا كوتەرىلۋى كەرەك بولاتىن، الايدا ول تەك 08.51 ۋاقىتىندا عانا ۇشۋعا مۇمكىندىك العان. كيەۆتىڭ "بوريسپول" اۋەجايىنداعى ونلاين- تاقتاشاداعى مالىمەتكە سايكەس، الماتىدان كەلگەن ۇشاق 08.00 ۋاقىتىندا (استانا ۋاقىتى - 11.00-دە) قونۋى ءتيىس ەدى. ءبىراق كەلگەن ۋاقىتى - 12.24 (استانا ۋاقىتى - 15.24) . استانادان كيەۆكە شىعۋى ءتيىس تاعى ءبىر ۇشاق ءبىر ساعاتقا كەشىككەن.
كەيىننەن قازاقستانداعى ۋ ح ا وكىلدىگىندەگىلەر بۇل كەشىگۋدىڭ رەسەي تەرريتورياسى ارقىلى ۇشۋعا تىيىم سالىنعاندىقتان ورىن العانىن مالىمدەگەن. "رەسەيدەن بۇل مالىمەتتى راستايتىن رەسمي قۇجات بىزگە ۇسىنىلعان جوق، ءوزىمىز دە رەسمي نۇسقاۋدى كۇتىپ وتىرمىز. كەشىگۋ رەسەي ارقىلى تىيىم سالىنعاندىقتان ورىن الدى. مۇنداي اقپارات بىزگە اۋىزشا جەتتى. ەندى ونىڭ قۇجاتتاي راستالعان ءماتىنىن كۇتىپ وتىرمىز" دەيدى كومپانيانىڭ الماتىداعى وكىلدەرى.