قاراعاندى تۇرمەسىنەن تاعى بۇلىك شىقتى
جازاسىن وتەۋشىلەر "تۇزەۋ مەكەمەسىنىڭ باسشىلىعى ازاپتاپ، كۇش كورسەتىپ جاتىر"- دەپ نارازىلىق بىلدىرۋدە.
جانايقايلارىن ايتا كەلگەن سوتتالۋشىلاردىڭ جاقىندارى تەمىر قاقپانىڭ الدىنا جينالدى. ايتۋلارىنشا، بالقاش قالاسىنداعى اباقتىدان كۋاگەرلەر رەتىندە اۋىستىرىلعانداردى ا ك 159/1 كولونياسىنىڭ قىزمەتكەرلەرى سوققىنىڭ استىنا الىپ، جاپپاي ساباعان كورىنەدى.
سوتتالعانداردىڭ مىنا شاعىم حاتتارىن جاقىندارى تۇرمەدەن جاسىرىن تۇردە شىعارعان كورىنەدى. كولونيا باسشىلىعىنىڭ ارەكەتسىزدىگىنەن مەزى بولعاندار، «مۇنداي قادامعا بارۋدان باسقا امالىمىز قالمادى» دەپ ناليدى. تاباندارىنان تاۋسىلىپ، تالاي قۇزىرلى مەكەمەنىڭ تابالدىرىعىن توزدىرۋدان بەرەكەمىز قاشتى دەيدى ولار.
الفيا ماحيەۆا، سوتتالۋشىنىڭ اناسى:
كولونيا قىزمەتكەرلەرى بارلىق سوتتالعاندارمەن مالمەن سويلەسكەندەي سويلەسەدى. قازان ايىندا ەكى سوتتالۋشىنى دالاعا تىرداي جالاڭاش تۇرعىزىپ قويعان.
وسىدان ءۇش اي بۇرىن بالقاش قالاسىنداعى تۇزەۋ مەكەمەسىنەن قاراعاندىداعى تەرگەۋ يزولياتورىنا 40 سوتتالۋشى كۋاگەر رەتىندە اۋىستىرىلعان. اباقتىدا بولىپ جاتقان بىلىققا شىداماعان ولار سوققىعا جىعىلدىق دەپ باس پروكۋراتۋراعا شاعىم حات جازىپتى.
ءبىراق، كومەك سۇراپ جازعان وتىنىشتەردىڭ بىرەۋى دە دىتتەگەن جەرىنە جەتپەگەن كورىنەدى. بۇدان وزگە جاقىندارى، تۇرمەدەگى زورلىققا شىداماعان ايىپتالۋشىلاردىڭ بىرەۋى، ءتىپتى وزىنە قول جۇمساۋعا دەيىن بارعان دەيدى.
باحتيار رىسايەۆ، سوتتالۋشىنىڭ اعاسى:
الەكساندر كريۆونوس وزىنە قول جۇمساپ، اسىلىپ قالعىسى كەلگەن. ءبىراق ونى بىرگە وتىرعان بالالار قۇتقارىپ قالىپتى. بۇل جايتتى تۇزەۋ مەكەمەسىندەگىلەر جاسىرعىسى كەلگەن.
الەكساندر لۋنين، سوتتالۋشىنىڭ اتاسى:
مەن نەمەرەممەن كەزىكتىم. بىرنارسە ايتۋعا قورقادى. ابدەن قورقىتىپ تاستاعان. ءبىراق تۇرمە قىزمەتكەرلەرىنىڭ ولارعا قول كوتەرگەنىن ايتقان.
ال پروكۋرورلار تۇزەتۋ مەكەمەسىنىڭ قىزمەتكەرلەرى سوتتالعانداردى ۇرىپ-سوعاتىنىن تەرىسكە شىعارىپ وتىرعان جوق. سوزدەرىنشە، قازىر جازاسىن وتەۋشىلەرمەن سويلەسۋ جۇمىستارى جۇرگىزىلۋدە.
سەيداحمەت ۋتكۋروۆ، قاراعاندى وبلىستىق پروكۋراتۋرا باسقارماسى باستىعىنىڭ ورىنباسارى:
قوعامدىق باقىلاۋ كوميسسياسىنىڭ مۇشەلەرى تەرگەۋ يزولياتورىنا بارىپ قايتتى. ءيا، بۇل جاعداي شىنىمەن بولعان. ءبىراق، ءبىز سوتتالۋشىلارمەن كەزدەستىك. ەندى بۇل جايتتى قاداعالاۋعا الامىز.
وسىلايشا، جاعدايدى باستى نازاردا ۇستايمىز دەگەننەن تايماعان قۇزىرلى مەكەمە وكىلدەرى تۇزەۋ مەكەمەسىنىڭ باسشىلىعىمەن دە سويلەسۋگە نيەتتى ەكەندىكتەرىن ايتادى. تەك تەمىر توردىڭ ار جاعىنداعى جاعدايدىڭ جاي-جاپسارى جۋىردا وڭالا ما جوق پا ازىرگە بەلگىسىز.
31-ارنا