جاپونيا قىرىم سەكىلدى رەسەيدەن كۋريل ارالدارىن قايتارىپ الماقشى
«رەسەيدىڭ كەز كەلگەن جەرىندەگىدەي قۋريل ارالدارىنىڭ تۇرعىندارى بىلىكسىز ءارى سىبايلاس جەمقورلىققا بەلشەسىنەن باتقان ۇكىمەتتىڭ «ارقاسىندا» قايىرشىلىقتا ءومىر ءسۇرىپ جاتىر. تاعدىردىڭ قىزىق تالكەگى بولار، بۇگىنگى كۋريل تۇرعىندارى ىشىندە ەتنيكالىق ۋكرايندىقتار دا جەتەرلىك. ەگەر، مىسالى حالقىنىڭ 60 پايىزىن ۋكرايندىقتار قۇرايتىن يتۋرۋپ ارالىندا جاپونياعا قوسىلۋ تۋرالى رەفەرەندۋم وتسە، ۆلاديمير پۋتين ونى قىرىم سەكىلدى وپ- وڭاي مويىندار ما ەدى؟» دەلىنەدى يۋريكو كويكەنىڭ ءسوزىن كەلتىرگەن «Project Syndicate»باسىلىمىندا.
سونداي-اق ول 2012- جىلى جاپونيا ۇكىمەتىنە جاڭادان كەلگەن باسشى سيندزو ابەنىڭ كۋريل ارالدارى تاعدىرى تۋرالى ۆلاديمير پۋتينمەن قۇرعان ديالوگىنا كوپ ءۇمىت ارتقانىن ايتادى. بۇل ماسەلە بويىنشا تەرەڭ كەلىسسوزدەر جوسپارلانعان ەدى. الايدا، جاپونيانىڭ بۇرىنعى قورعانىس ءمينيسترىنىڭ سوزىنە قاراعاندا، «پۋتين ورىس يمپەرياسىن جاڭعىرتپاق ويىن اشىقتان اشىق ءبىلدىرىپ وتىرعان بۇگىنگى جاعدايدا بۇل ءۇمىتتى ءولى تۋعان دەپ ساناۋعا بولادى».
قورعانىس مينيسترلىگىنىڭ بۇرىنعى باسشىسىنىڭ ايتۋىنشا، جاپونيا ەندى «پۋتيننىڭ ەسەرسوق امبيتسياسى ۋكراينانىڭ وزگە ايماقتارىنا قاۋىپ توندىرەتىندەي كولەمگە ۇلاسىپ كەتپەس ءۇشىن «ۇلكەن جەتىلىك» مەملەكەتتەرىمەن مىقتاپ تىزە قوسپاقشى. سونداي-اق يۋريكو كويكە رەسەي باسقىنشىلىعىمەن كۇرەسۋ جانە ەكونوميكاعا كەلگەن زارداپتاردى قالىپقا كەلتىرۋ ءۇشىن توكيو ۋكرايناعا 1,5 ميلليارد دوللار كولەمىندە كومەك ۇسىنۋ تۋرالى شەشىم قابىلداعانىن باسا ايتادى.