تۇركيانىڭ ورتالىق سايلاۋ كوميسسياسى ەردوعاننىڭ سايلاۋالدى جارناماسىنا تىيىم سالدى

استانا. قازاقپارات - تۇركيانىڭ ورتالىق سايلاۋ كوميسسياسى پرەزيدەنتتىككە ۇمىتكەر ەلدىڭ ۇكىمەت جەتەكشىسى رەدجەپ تايىپ ەردوعاننىڭ سايلاۋالدى جارناماسىنا تىيىم سالدى.

سەبەبى ەردوعاننىڭ كەزەكتى جارناما روليگىندە سايلاۋدىڭ نەگىزگى ەرەجەلەرى مەن سايلاۋشىلار تۋرالى زاڭنىڭ 58 جانە ساياسي پارتيالار زاڭىنىڭ 87-بابىنا قايشى كەلەتىن ازان داۋسى، دۇعا مەن ساجدە كورسەتىلدى.

ال تۇركيانىڭ سايلاۋ زاڭىنا سايكەس ۇگىت-ناسيحات جۇرگىزۋ ماقساتىندا مەملەكەتتىك تۋدى پايدالانۋعا جانە ءدىني مالىمدەمە جاساۋعا بولمايدى.

وسىعان وراي بەينە روليكتىڭ ارنالاردان كورسەتىلىمى توقتاتىلدى. بۇل شەشىمگە شاعىمدانعان ادىلەت جانە دامۋ پارتياسىنىڭ ورتالىق سايلاۋ كوميسسياسىنداعى وكىلى شەرەف مالكوچ «ورتالىق سايلاۋ كوميسسياسى دۇعا، ساجدە مەن ازان داۋىسىن ءدىني كورىنىسكە بالاپ، وعان تىيىم سالدى. ەگەر بۇل قاتە تۇسىنىكتىڭ جەتەگىنە ەرسەك، ەرتەڭ ورامال تاققان مەن يەككە ساقال قويعان دا ءدىني سيپاتتا كەمسىتىلۋى مۇمكىن»، -  دەدى.

ەستەرىڭىزگە سالا كەتسەك، تامىزدىڭ 10- كۇنى تۇركيادا پرەزيدەنت سايلاۋى وتەدى. بۇل سايلاۋ دوداسىنا ەلدىڭ جەتەكشى «ادىلەت جانە دامۋ» پارتياسىنان قازىرگى پرەمەر-مينيستر رەدجەپ تايىپ ەردوعان، وپپوزيتسيالىق پارتيالاردىڭ اتىنان ەكمەلەددين يحسانوگلى جانە كۇردشىل حالىقتاردىڭ دەموكراتيالىق پارتياسىنان سەلاحاتتين دەميرتاش پرەزيدەنتتىككە ۇمىتكەر رەتىندە قاتىسۋدا.

24.kz