قازاقستان پرەزيدەنتى ەل ۇكىمەتىن قايتا قۇردى

 استانا. قازاقپارات - بۇگىن اقوردادا وتكەن ۇكىمەتتىڭ كەڭەيتىلگەن وتىرىسىندا ق ر پرەزيدەنتى نۇرسۇلتان نازاربايەۆ مينيسترلەر كابينەتىنىڭ قايتا قۇرىلاتىندىعىن جاريا ەتتى.

 بۇعان دەيىن قازاقستان ۇكىمەتىنىڭ قۇرامىندا 17 مينيسترلىك، 9 اگەنتتىك، 54 كوميتەت، 272 دەپارتامەنت بولسا، قۇرىلىمداۋدان كەيىن 12 مينيسترلىك پەن 30 كوميتەت قانا قالدى. ال بارلىق 9 اگەنتتىك جويىلىپ، كوميتەت تۇرىندە مينيسترلىك قاراماعىنا كىردى.

«قازىرگى ۋاقىتتا مەملەكەتتى باسقارۋدىڭ ءتيىمدى جۇيەسىن قۇرۋ تالاپ ەتىلەدى. جيناقى ۇكىمەت قاجەت. بىزگە قاجەتتىدەن دە كوپ شەنەۋنىكتى وتىرعىزۋدىڭ ەش قاجەت جوق» ، - دەپ ءتۇسىندىردى ەلباسى ءوز شەشىمىن.

 سونىمەن مەملەكەت باسشىسى جاڭا 5 مينيسترلىك قۇرىلاتىندىعىن جاريا ەتتى.

 «ۇلتتىق ەكونوميكا مينيسترلىگى - ونىڭ قۇرامىنا ەكونوميكا جانە بيۋدجەتتىك جوسپارلاۋ، وڭىرلىك دامۋ مينيسترلىكتەرى، ستاتيستيكا، تابيعي مونوپوليالاردى رەتتەۋ، باسەكەلەستىكتى قورعاۋ اگەنتتىكتەرى كىرەدى. پرەمەر- ءمينيستردىڭ ۇسىنىسىمەن بۇل ۆەدومستۆونىڭ باسشىلىعىنا ەربولات دوسايەۆ تاعايىندالدى» ، - دەدى ەلباسى.

 وسىدان كەيىن ۇلت كوشباسشىسى دەنساۋلىق ساقتاۋ مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگى بىرىگىپ، دەنساۋلىق جانە الەۋمەتتىك دامۋ مينيسترلىگى دەپ اتالاتىندىعىن جاريا ەتتى. «مينيستر لاۋازىمىنا كەڭەسە كەلە، بۇعان تامارا دۇيسەنوۆا جەتەكشىلىك ەتەدى دەپ شەشتىك. ال دەنساۋلىق ساقتاۋ ءمينيسترى ساليدات قايىربەكوۆاعا ەشقانداي كەمشىلىك جوق، تەك بىرىكتىرىپ جاتىرمىز. ەگەر كەلىسسەڭىز، وندا ءمينيستردىڭ ءبىرىنشى ورىنباسارى بولىپ تاعايىندالاسىز، بۇرىنعى جۇمىستار اۋقىمىن جالعاستىراسىز» ، - دەدى ن. نازاربايەۆ.

كەلەسى قۇرىلعان ۆەدومستۆو مادەنيەت جانە سپورت مينيسترلىگى اتالادى. وعان مادەنيەت مينيسترلىگىنىڭ، ءدىن ىستەرى، سپورت جانە دەنە شىنىقتىرۋ ىستەرى اگەنتتىكتەرىنىڭ قىزمەتتەرى مەن وكىلەتتىكتەرى بەرىلەدى. بۇل ۆەدومستۆوعا ارىستانبەك مۇحامەدي ۇلى باسشىلىق جاسايدى.

 سونداي- اق مەملەكەت باسشىسى يندۋستريا جانە جاڭا تەحنولوگيالار، كولىك جانە كوممۋنيكاتسيا مينيسترلىكتەرىنىڭ، بايلانىس جانە اقپارات، ۇلتتىق عارىش اگەنتتىكتەرىنىڭ وكىلەتتىلىكتەرى بەرىلە وتىرىپ، ينۆەستيتسيا جانە دامۋ جونىندەگى مينيسترلىگى قۇرىلعانىن جاريا ەتتى. اتالعان ۆەدومستۆوعا اسەت يسەكەشيەۆ باسشىلىق جاسايتىن بولادى. «وزدەرىڭىز دە جاقسى بىلەسىزدەر، ول وسى جىلدار ىشىندە جۇمىس ىستەپ تاجىريبە جيناقتادى جانە جۇمىسىن ودان ءارى جالعاستىرادى» ، - دەدى نۇرسۇلتان نازاربايەۆ.

سونداي- اق ەلباسى بۇعان دەيىن كولىك جانە كوممۋنيكاتسيا ءمينيسترى بولعان جەڭىس قاسىمبەك اتالعان مينيسترلىكتىڭ ءبىرىنشى ورىنباسارى قىزمەتىنە تاعايىندالعانىن اتاپ ءوتتى. ال بۇعان دەيىن بايلانىس جانە اقپارات اگەنتتىگىنىڭ باسشىسى بولعان اسقار جۇماعاليەۆ اسەت يسەكەشيەۆتىڭ ورىنباسارى قىزمەتىنە كىرىسەدى.

 «ەنەرگەتيكا مينيسترلىگى قۇرىلادى. ويتكەنى بىزدە ەنەرگەتيكا سالاسىندا تارتىپسىزدىك ورىن الىپ وتىر. تۇسىنىكسىز، مۇناي مەن گاز ءبىر جەردە، قاتتى ەنەرگەتيكا كەلەسى جەردە، ەلەكتر ەنەرگياسى ءۇشىنشى، اتوم ەنەرگەتيكاسى ءتورتىنشى ورىندا. ەشتەڭە دە تۇسىنبەيسىڭ» ، - دەپ اتاپ وتكەن مەملەكەت باسشىسى ەنەرگەتيكا سالاسىن ءبىر ورىنعا شوعىرلاناتىندىعىن باسا ايتتى. ق ر پرەزيدەنتىنىڭ اتاپ وتۋىنشە، بۇل مينيسترلىككە مۇناي جانە گاز مينيسترلىگى، يندۋستريا جانە جاڭا تەحنولوگيالار مينيسترلىگىنىڭ ەنەرگەتيكا سالاسىنا قورشاعان ورتا جانە سۋ رەسۋرستارى مينيسترلىگىنىڭ قورشاعان ورتانى قورعاۋ سالاسىنا قاتىستى قىزمەتتەرى مەن وكىلەتتىلىكتەرى بەرىلەدى. «تالقىلاپ، ويلانا كەلە بۇل سالانى ەنەرگەتيكانى تۇسىنەتىن ۆلاديمير شكولنيكتى ەنەرگەتيكا ءمينيسترى قىزمەتىنە تاعايىنداۋ شەشىمىن قابىلدادىم» ، - دەگەن ن. نازاربايەۆ بۇعان دەيىن مۇناي جانە گاز ءمينيسترى بولعان ۇزاقباي قاراباليندى جاڭا ءمينيستردىڭ ءبىرىنشى ورىنباسارى بولىپ تاعايىندالعانىن ايتتى. وسى ورايدا ەلباسى قورشاعان ورتا جانە سۋ رەسۋرستارى ءمينيسترى نۇرلان قاپپاروۆقا 2 بىردەي قىزمەت ۇسىندى. «بۇل مينيسترلىككە قورشاعان ورتانى قورعاۋ ماسەلەلەرى كىرەدى. نۇرلان قاپپاروۆ بۇل جۇمىستاردى جاقسى جۇرگىزدى. ول ءوز قالاۋىمەن بۇل مينيسترلىكتە ورىنباسار رەتىندە جۇمىسىن جالعاستىرا الادى نەمەسە مەن وعان «قازاتومونەركاسىپ» ۇلتتىق كومپانياسىنىڭ پرەزيدەنتى بولۋدى ۇسىنامىن. شەشىمىڭدى ماسىموۆكە بايان ەتەرسىڭ. مۇمكىن قازىر ايتاتىن شىعارسىڭ» ، - دەدى ن. نازاربايەۆ ن. قاپپاروۆقا قاراتا. ءوز كەزەگىندە ول اتوم ونەركاسىبى سالاسىندا جۇمىس ىستەۋ قىزىقتىراق سانايتىندىعىن ايتىپ، كومپانيا باسشىلىعىنا مويىن بۇرىپ تۇرعاندىعىن سەزدىردى.

 سونىمەن بىرگە ق ر توتەنشە جاعدايلار مينيسترلىگى تاراتىلىپ، ونىڭ قىزمەتى ەلىمىزدىڭ ىشكى ىستەر مينيسترلىگىنە تولىعىمەن ءوتتى. بۇل جاڭا ۆەدومستۆوعا ق ر ىشكى ىستەر ءمينيسترى قالمۇحانبەت قاسىموۆ باسشىلىق جاسايدى. ال مينيسترلىگى تاراتىلعان ۆلاديمير بوجكو ىشكى ىستەر ۆيتسە- ءمينيسترى بولىپ تاعايىندالدى.

 ۇلت كوشباسشىسى قىسقارۋعا ۇشىراعان ۆەدومستۆولاردىڭ باسشىلارى جۇمىسسىز قالمايتىندىعىن دا اتاپ ءوتتى. «بىرىكتىرىلگەن مينيسترلىكتەر، قىسقارىپ جاتقان مينيسترلەر ولاردىڭ جۇمىسىندا ەش كىنا جوق. ۇكىمەت مەنىڭ تاپسىرمام بويىنشا ولاردى جۇمىسقا ورنالاستىرادى. ال بۇرىن مينيستر بولىپ، ەندى ورىنباسارلىققا تاعايىندالعاندار وزدەرى بۇرىن اتقارىپ كەلگەن قىزمەتتەرىنىڭ بولىگىن جالعاستىرادى» ، - دەدى ن. نازاربايەۆ. سونىمەن قاتار، ن. نازاربايەۆ وڭىرلىك دامۋ ءمينيسترى بولعان بولات جامىشيەۆتىڭ قازاقستاننىڭ دامۋ بانكىنە تاعايىندالاتىنىن اتاپ ءوتتى. «كەلىسسەڭىز، قازاقستاننىڭ دامۋ بانكىنە باسشىلىق جاساڭىز» ، - دەدى ەلباسى.

 ق ر پرەزيدەنتى قالعان مينيسترلىكتەر وكىلەتتىكتەرىندەگى ءبىرقاتار وزگەرىستەرمەن ساقتالاتىندىعىن اتاپ ءوتتى. اتاپ ايتقاندا، ەكونوميكا جانە بيۋدجەتتىك جوسپارلاۋ مينيسترلىگىنىڭ بيۋدجەتتىك جوسپارلاۋ سالاسىنداعى قىزمەتى قارجى مينيسترلىگىنە بەرىلەدى. قورشاعان ورتا جانە سۋ رەسۋرستارى مينيسترلىگىنىڭ بالىق شارۋاشىلىعى، سۋ رەسۋرستارىن باسقارۋ، ورمان جانە سۋ قىزمەتتەرى اۋىل شارۋاشىلىعى مينيسترلىگىنە بەرىلەتىن بولادى. سونىمەن بىرگە ەلباسىنىڭ تاپسىرماسىنا ساي ۇكىمەت مينيسترلىكتەردەگى كوميتەتتەر سانىن وڭتايلاندىراتىن بولادى. ياعني، مينيسترلىك قۇرىلىمىندا اۋماقتىق بولىمشەسى بار كوميتەتتەر عانا قالۋى ءتيىستى. ال ونداي قۇرىلىمدارى جوق كوميتەتتەر مينيسترلىكتىڭ دەپارتامەنتى رەتىندە قايتا قۇرىلۋى قاجەت.

ايتا كەتەرلىگى، پرەمەر- ءمينيستردىڭ ەكى ورىنباسارى بولادى. ءبىرىنشى ورىنباسار بولىپ باقىتجان ساعىنتايەۆ قالسا، ال ادامي دامۋ ماسەلەلەرى جونىندەگى ورىنباسارى گۇلشارا ءابدىقالىقوۆا بولادى.

جيىن سوڭىندا اتقارۋشى بيلىكتىڭ جاڭارتىلعان قۇرامىن ايقىنداعان ق ر پرەزيدەنتى ن. نازاربايەۆ ولاردىڭ الداعى جۇمىستارىنا ساتتىلىك تىلەدى. «وسىندا وتىرعان بارشامىز، سونداي- اق بارلىق قازاقستاندىقتار ەلدىڭ ەرتەڭى ءۇشىن جۇمىس ىستەسەك، سوندا عانا ماقساتىمىزعا جەتەمىز. باعدارلامالار بەكىتىلدى، تاپسىرمالار ايقىن. ەندى تەك جۇمىس ىستەۋ كەرەك. ەندەشە ساتتىلىك تىلەيمىن. بارلىق قالعان جۇمىستاردى كارىم قاجىمقان ۇلى تياناقتى تۇردە قاراپ شىعاتىن بولادى. مينيسترلىكتەر مەن ۆەدومستۆولاردىڭ الداعى ماسەلەسىن دە شەشەدى. ۇكىمەت ەش كەدەرگىسىز جۇمىس ىستەۋىنە ءتيىستى شەشىمدەر قابىلدايدى دەپ سەنەمىن» ، - دەدى مەملەكەت باسشىسى.

 اۆتور: مارلان جيەمباي