اقتاۋ قالاسىنىڭ اكىمى كوپ بالالى انالارعا «التىن القا» مەن «كۇمىس القا» تابىستادى -فوتو

اقتاۋ. قازاقپارات - بۇگىن قالا اكىمى ەدىل جاڭبىرشين ەلباسى جارلىعىنا سايكەس ناگرادتتالعان اقتاۋلىق كوپبالالى انالارعا التىن جانە كۇمىس القالارىن تابىس ەتتى. ناقتىراق ايتقاندا 7 جانە ودان كوپ بالاسى بار 3 اناعا «التىن القا» تابىستالسا، 6 بالاسى بار 14 اناعا «كۇمىس القا» بەرىلدى.

«التىن القا» بەلگىسى ق ر وردەنى مارتەبەسىنە يە. قالا باسشىسى التىن قۇرساقتى باتىر انالاردى قۇتتىقتاپ، جىلى لەبىزىن ءبىلدىردى.

«وسكەلەڭ ۇرپاقتى تاربيەلەۋدە انانىڭ ءرولى ەرەكشە. بالاسىن ەلدىڭ قىزمەتىنە لايىقتى ازامات رەتىندە تاربيەلەگەن جان - بارلىق ماقتاۋعا لايىق. وتباسىلارىڭىزعا اماندىق تىلەيمىن»، - دەدى اقتاۋ قالاسىنىڭ اكىمى ەدىل جاڭبىرشين.

ەندى كوپ بالالى انالار الەۋمەتتىك جاردەماقى الۋ ءۇشىن تولەم ورتالىقتارىنا جۇگىنۋگە قۇقىلى. سونىمەن قاتار، ولار ءبىر جىل ىشىندە قوعامدىق كولىكتى تەگىن پايدالانا الادى.

«التىن جانە كۇمىس القامەن ماراپاتتالعان انالارعا 11 مىڭ 853 تەڭگە كولەمىندە اي سايىنعى جاردەماقى تاعايىندالادى»، - دەدى اقتاۋ قالالىق «مەملەكەتتىك زەينەتاقى تولەۋ ورتالىعى» ءبولىمىنىڭ مامانى ءىنجۋ جۇبانيازوۆا.