تەڭگەنىڭ قۇنسىزدانۋى تۋرالى داقپىرتتىڭ ەش نەگىزى جوق - ق ر ۇلتتىق بانكى

استانا. قازاقپارات - ق ر ۇلتتىق بانكى تەڭگەنىڭ قۇنسىزدانۋى تۋرالى قاڭقۋ سوزدەردىڭ ەش نەگىزى جوق ەكەندىگىن مالىمدەيدى. بۇل تۋرالى بانك ءتوراعاسىنىڭ كەڭەسشىسى ولجاس قۇدايبەرگەنوۆ ءوزىنىڭ «فەيسبۋكتەگى» پاراقشاسىندا حابارلادى.

«2014- جىلدىڭ 31- شىلدەسىندە نەمەسە 1- تامىزىندا تەڭگەنىڭ قۇنسىزدانۋى ورىن الادى دەگەن سوزدەردىڭ بۇگىندە ەش فۋندامەنتالدى سەبەپتەرى جوق ەكەندىگى ايدان انىق. ۇلتتىق بانك تەكسەرىلمەگەن اقپاراتتى جاريالاۋدان جانە قاڭقۋ سوزدەردى تاراتۋدان باس تارتۋدى سۇراۋدا»، - دەلىنگەن حابارلامادا.

ديەۆالۆاتسيانىڭ باستى دالەلى رەتىندە ۇلتتىق بانكتىڭ التىن قورىنىڭ مامىر-ماۋسىمدا 6 پايىزعا ازايۋى كەلتىرىلگەن بولاتىن. دەگەنمەن مالىمدەمەدە اتاپ كورسەتىلگەنىندەي، اقپان ايىندا التىن قورى 6 پايىزعا، ناۋرىزدا - 2 پايىزعا، ساۋىردە 7 پايىزعا وسكەن. سوندىقتان مامىر-ماۋسىمدا ونىڭ كولەمى كەمىگەنىمەن، 26,5 ميلليارد دوللار شاماسىندا تىركەلگەن جانە جىل باسىنداعى كورسەتكىشكە قاراعاندا 2-2,5 ميلليارد دوللارعا كوپ.

«شىلدەدەگى ناتيجەلەر بويىنشا ايدىڭ سوڭىندا ق ر ۇلتتىق بانكتىڭ التىن قورىنىڭ كولەمى 2 پايىزعا (0,5 ميلليارد دوللاردان استام) وسكەن جانە 27 ميلليارد دوللارعا جەتىپ وتىر. سونىمەن قاتار جىل باسىنان قارايتىن بولساق، ۇلتتىق بانكتىڭ التىن قورى 2,3 ميلليارد دوللارعا (+9,2%) كوبەيگەن»، - دەلىنگەن مالىمدەمەدە.

بانكتىڭ مالىمەتتەرىنە سايكەس، قازاقستان بيرجا قورىنىڭ تاڭەرتەڭگىلىك ساۋدا سەسسياسى بارىسىندا تەڭگە دوللارعا شاققاندا 182,08 كولەمىندە بەكىدى.

«ۇلتتىق بانك ۆاليۋتانىڭ كولەمىن باقىلاۋدا ۇستاپ تۇراتىن بولادى، قازىرگى ۋاقىتتا ەكىنشى دەڭگەيلى بانكتەردە حالىقتىڭ سۇرانىسىن قامتاماسىز ەتۋ ءۇشىن ۆاليۋتانىڭ جەتكىلىكتى قورى ساقتالعان»، - دەپ جازادى بانك.

اۆتور: جاسۇلان جولدىبايەۆ