جىنىستىق قاتىناسقا قاتىستى ءدىن نە دەيدى؟
مەن دە بۇگىن اسا كوپ اشىق ايتىلا بەرمەيتىن جىنىستىق قاتىناس تاقىرىبىنىڭ نازار اۋدارارلىق ءبىر تۇسى - ەتەككىر كەزىندەگى قاتىناس تۋرالى ءسوز ەتكىم كەلەدى.
نەگىزى، مەن بۇرىن ەرلى-زايىپتىلاردىڭ توسەك قاتىناسىنداعى كوپ جايتتار دىنگە قاراما-قايشى شىعار دەپ ويلايتىنمىن.
ءتىپتى ولاردىڭ تىرجالاڭاش جاتۋى دا وعاش بولاتىن شىعار دەپ ويلادىم. كەيىن ءدىني كىتاپتاردى پاراقتاپ قاراسام، ءدىنىمىز توسەك قاتىناسىندا كوپ ماسەلەنى قولدايدى ەكەن.
«ەرلى-زايىپتىلاردىڭ توسەك قاتىناسى شىرىن دا ءلاززاتتى بولۋ ءۇشىن سەزىم مۇشەلەرىنىڭ بارلىعى ىسكە قوسىلۋ كەرەك. بۇل نارسە ەركەك پەن ايەلدىڭ ءبىر-ءبىرىنىڭ كوزى ءۇشىن ساندەنۋلەرى، مۇرىندارى ءۇشىن حوش يىستەنۋلەرى، قۇلاقتارى ءۇشىن جاعىمدى سوزدەر ايتۋلارى ارقىلى كورىنىس تابادى.
مۇسىلمان ايەل تۇزدە ادەپتى، ۇيدە قىلىقتى بولۋ كەرەك. ەركەكتىڭ كوڭىلىن جاي تاپتىرار ورنى - شاڭىراعى. سول شاڭىراقتىڭ شاتتىعى ءۇشىن ايەل وسىنداي ءىس-ارەكەتتەرگە بارسا، بۇل ماقتاۋعا تۇرارلىق نارسە جانە ول ساۋاپسىز دا قالمايدى. ويتكەنى اللاھ تاعالانىڭ ءوزى ءجانناتتىڭ ايەلدەرىن «كۇيەۋلەرىنە سۇيىكتى (ەرلەرىنىڭ اڭسارىن اۋدىرىپ، قۇشتارلىعىن شاقىرىپ تۇرۋشى)» دەپ سيپاتتاعان. («ۋاقيعا» سۇرەسى، 36-37 اياتتار)» دەلىنگەن ءدىني ادەبيەتتە.
ايەل كۇيەۋىنىڭ كوڭىلىن اۋلاۋ ءۇشىن ادەپتى ايەلگە جاراسپايتىن جۇقا، قىسقا كيىمدەر كيىپ، ءتۇرلى سوزدەر ايتىپ قىلىقتار كورسەتسە، ونىڭ ءبارى وڭ سانالادى. شاريعات ەرلى-زايىپتىلارعا ءبىر-ءبىرىنىڭ دەنەسىنىڭ كەز- كەلگەن بولىگىنە قاراۋعا رۇقسات بەرەدى. سونداي-اق، ەركەك پەن ايەلدىڭ توسەكتە كيىمسىز، جالاڭاش بولۋلارى جىنىستىق قاتىناستى ناتيجەلى ەتەتىن العى شارتتاردىڭ ءبىرى. ەگەر ەرلى-زايىپتىلار تۇگەل شەشىنبەي جەڭىل كيىمدە بولعاندى ءجون ساناسا، بۇل ولاردىڭ ءوز ەرىكتەرىندەگى نارسە.
كەزىندە «ەرلى-زايىپتىلاردىڭ ءبىر-ءبىرىنىڭ جىنىس مۇشەلەرىن ۇستاپ، سيپالاۋلارىنا بولا ما؟» دەگەن سۇراقتى يمام ءابۋ حانيفادان ونىڭ شاكىرتى ءابۋ يۋسۋف سۇراعان ەكەن. سوندا يمام اعزام: «وندا تۇرعان ەشتەڭە جوق. بالكىم، ولاردىڭ الار ساۋاپتارى ارتا تۇسەر دەپ ۇمىتتەنەمىن»، - دەپ جاۋاپ بەرگەن («مۋعنيل- مۋحتاج»، حاتيب ءاش-شاريني، 3-توم، 144-بەت).
عۇلامالارىمىز ءتىپتى پايعامبارىمىزدىڭ (س. ا. س.) سۇننەتىنە جانە الدىڭعى وتكەن ىزگى كىسىلەردىڭ حابارلارىنا سۇيەنە وتىرىپ جىنىستىق قاتىناستىڭ كوپتەگەن ادەپتەرىن كورسەتكەن. سولاردان ءۇزىندى كەلتىرەيىك:
1. توسەك قاتىناسىنىڭ الدىندا «ءبيسميللاھ» دەپ، سۇننەتتە كەلگەن دۇعانى ايتۋ. حاديس يمامدارى تۇگەلگە دەرلىك ابدۋللاھ يبن ابباستان (ر. ا.) مىنا حاديستى ريۋايات ەتكەن. پايعامبارىمىز (س. ا. س.) بىلاي دەگەن:
«سىزدەردىڭ ءبىرىڭىز ايەلىنە جاقىنداسپاق بولسا؛ «ءبيسميللاھ، اللاھۋمما ءجاننيبناش-شايتان، ءۋا ءجاننيبيش-شايتانا ءما رازاقتانا» دەپ ايتسىن. ەگەر وسى (توسەك قاتىناسىنىڭ ناتيجەسىندە) ارالارىندا بالا پايدا بولسا، ول بالاعا شايتان ەشقاشان زارار جەتكىزە المايدى».
2. ايەلدى توسەك قاتىناسىنا دايىنداۋ. ەركەكتىڭ كۇتپەگەن جەردەن بىردەن ايەلىنە باس سالۋى ونىڭ توسەك قاتىناسىنداعى ادەپسىزدىگى بولىپ تابىلادى. ايەل ەركەك سياقتى جىنىستىق قاتىناسقا جىلدام دايىن بولا المايدى. سوندىقتان دا شاقۋات تالابى ويانعان ەركەك جۇبايىن توسەككە ەپپەن تارتۋى كەرەك.
3. ەركەكتىڭ دورەكىلىك كورسەتپەۋى جانە اسىعىس ارەكەتكە بارماۋى. توسەك قاتىناسى ەركەك پەن ايەلدەن ۇيلەسىمدىلىك تالاپ ەتەدى. قاتىناس ەكەۋىنە بىردەي جاعىمدى بولعاندا عانا ءلاززات، تويات كورىنىس تابادى. سوندىقتان دا ەركەك دورەكى قيمىلداپ ءىسىن تەز بىتىرە سالماي، اسىقپاي باپتاپ، قاشان ايەل بويىنان كەتكەنشە كۇتكەنى ءجون. ويتكەنى، ايەل كىسى ەركەككە قاراعاندا بويىن كەشىرەك بەرەدى. تولىق تويات تابا الماي قالعان ايەلدىڭ بويىندا مازاسىزدىق پايدا بولىپ، توسەك قاتىناسىنا سالقىن قاراپ، ودان جەرۋى مۇمكىن. پايعامبارىمىز (س. ا. س.) بىلاي دەگەن:
«قايسىبىرەۋلەرىڭ ايەلىمەن توسەك قاتىناسىن جاساسا، وعان ادال بولسىن. ەگەر ول قاجەتىن (ايەلىنەن) بۇرىن وتەپ قويسا، ونى قاجەتىن وتەپ بولعانشا اسىقتىرماسىن.
4. ەركەك پەن ايەلدىڭ سىرت كوزدەن وڭاشا بولۋى. بۇل دەگەنىمىز ەسىك-تەرەزەلەردى جابۋ، پەردەنى ءتۇسىرۋ، مىسىق سياقتى ءۇي جانۋارلارىن جاتىن بولمەدەن شىعارۋ، مۇمكىندىگى بولسا، ەمىزۋلى بالانى دا باسقا بولمەگە ۋاقىتشا اۋىستىرۋ.
5. توسەك قاتىناسى بارىسىندا ەكەۋىنىڭ اۋرەت تۇستارىن قالقالاۋشى جامىلعىنىڭ بولۋى.
ال ەندى «دىندە توسەك قاتىناسىن ءتۇرلى قالىپتا (شالقالاپ، ەتپەتتەپ، جانتايىپ، ت. س. س.) جاساۋعا رۇقسات ەتىلە مە؟» دەگەن سۇراققا كەلسەك، بۇل ماسەلە ساحابالاردىڭ كەزىندە دە كوتەرىلىپتى.
«ويتكەنى مەدينەلىك انسارلار ايەلدەرىمەن جانتايعان قالىپتا عانا توسەك قاتىناسىنا تۇسەتىن. ال قۇرايىشتىقتار توسەك قاتىناسىنان ءتۇرلى قالىپتا: الدىعا قاراپ تا، ارت قاراپ تا، شالقالاپ تا ءلاززات الۋشى ەدى. ءبىراق ولار ايەلدىڭ ارتقى تەسىگىنەن ىستەمەيتىن.
مەككەلىك مۇسىلماندار مەدينەگە قونىس اۋدارىپ كەلگەن سوڭ ولار جەرگىلىكتى ايەلدەرگە ۇيلەندى. وسى نەكەلەردىڭ ناتيجەسىندە كەيبىر مۇسىلمان وتباسىندا توسەك قاتىناسىنداعى كەلىسپەۋشىلىك پايدا بولدى. مەككەلىكتەر جىنىستىق قاتىناستى وزدەرىنە ۇيرەنشىكتى قالىپتا جۇرگىزگىسى كەلەتىن، ال مەدينەلىك ايەلدەر بۇعان قارسى بولدى. سول كەزدە اللاھ تاعالادان:
«ايەلدەرىڭ سەندەردىڭ ەگىس القاپتارىڭ؛ ەندەشە القاپتارىڭا قالاعان تۇستارىڭنان كەلىڭدەر» (باقارا، 223) دەگەن ايات ءتۇستى» دەگەن جاۋاپ بەرىلەدى ءدىني ادەبيەتتە بۇعان قاتىستى. دەمەك، مۇسىلمان ايەلىمەن قالاعان قالپىندا جىنىستىق قاتىناسقا تۇسە الادى، تەك ارتقى تەسىكتەن ساقتانسا بولعانى. جوعارىدا ءبىز اتاعانداي، مەديتسينادا عانا ەمەس، يسلام دىنىندە دە ەتەككىر كەزىندەگى جىنىستىق قاتىناسقا قاتاڭ تىيىم سالىنىپ، ول كۇنا بولىپ ەسەپتەلەدى.
ەتەككىر جاعدايىنداعى ايەل ناماز وقۋ، ورازا تۇتۋ، مەشىتكە بارۋ سياقتى ءبىرقاتار عيباداتتارىن توقتاتادى. سولاردىڭ قاتارىندا ونىڭ كۇيەۋىمەن جىنىستىق قاتىناسقا تۇسۋىنە دە رۇقسات ەتىلمەيدى. ويتكەنى عۇلامالاردىڭ ءبىراۋىزدى پىكىرلەرى بويىنشا ەتەككىر مەرزىمىندە ەرلى-زايىپتىلاردىڭ جىنىستىق قاتىناس جاساۋلارى حارام جانە مۇنداي ارەكەت، ەكى تاراپتىق كەلىسىممەن بولعان جاعدايدا ەكەۋىن دە بىردەي كۇناعا باتىرادى. «اللاھ تاعالا ايتادى: «سەنەن ەتەككىر جايلى سۇرايدى. ولارعا: «ول جيرەنىشتى نارسە، ەتەككىر ۋاقىتىندا ايەلدەردەن اۋلاق بولىڭدار. ولارعا تازارعانعا دەيىن جاقىنداسپاڭدار» دە. راسىندا اللاھ تاۋبە قىلۋشىلاردى ۇناتادى ءارى تازا بولۋشىلاردى ۇناتادى» (باقارا: 222) دەيدى دىندە بۇل تۋرالى.
ال ەتەككىر كەزىندە توسەك قاتىناسىن جاساپ، كۇناعا بارعاندار نە ىستەۋى كەرەك؟ وعان مىناداي جاۋاپ بار: " عۇلامالاردىڭ بارلىعى مۇنداي كەزدەردە ايەلىمەن توسەك قاتىناسىنا تۇسكەن ەر كىسىنىڭ اۋىر كۇناعا باتاتىنى جونىندە بىردەي پىكىرگە كەلگەن. جانە بۇل نارسەگە ايەل ءوز ىرقىمەن كەلىسسە، كۇناعا ول دا سەرىك بولادى. كۇنانىڭ بۇل ءتۇرىن جاساعان مۇسىلمانعا شىنايى تاۋبەگە كەلۋ قاجەت. بۇعان قوسىمشا جاعدايى كوتەرگەن سومادا ساداقا شىعارسا، بۇل ونىڭ كۇناسىنىڭ جۋىلۋىنا سەپتىگىن تيگىزەدى».
ورىس باسىلىمدارىندا، اسىرەسە، ءتۇرلى-ءتۇستى جۋرنالداردا ەشبىر ۇيالماستان ايتىلا بەرەتىن «انالدى سەكس» ماسەلەسىنە دە ءبىزدىڭ ءدىن قالاي قارايدى؟ ول تۋرالى كوپتەگەن حاديستەردەن وقۋعا بولادى. ماسەلەن، يبن ءماجا مەن ناساي، ءابۋ حۋرايرادان (ر. ا.) ريۋايات ەتكەن حاديستە پايعامبارىمىز (س. ا. س.) بىلاي دەگەن: «اللاھ قيامەت كۇنى ايەلىنىڭ ارتقى تەسىگىنەن جىنىستىق قاتىناس جاساعان ەركەككە نازار سالمايدى». سونداي-اق، اللاھ ەلشىسى (س. ا. س.) تاعى ءبىر سوزىندە: «ايەلىنىڭ ارتقى تەسىگىنەن جىنىستىق قاتىناس جاساعان ەركەك لاعنەتكە ۇشىراعان» دەيدى.
«الاش ايناسى»