ىلەدە ايتىس ءوتتى دۇركىرەگەن - فوتو
اتالمىش ايتىستا كوپ كوڭىلىنەن شىعۋعا قۇلشىنعان ءسوز شەبەرلەرى وزەكتى تاقىرىپتاردىڭ بۇيداسىن اعىتتى. ەل مەن جەر ماسەلەسى، ءتىل مەن ءدىن ماسەلەسى تىلگە تيەك بولدى. ازاماتتىق پىكىرىن بىلدىرگەن ادۋىندى اقىندار بىردە جۇرت اراسىندا بەلەڭ الىپ بارا جاتقان كەلەڭسىز جاعدايلاردى قىزىل تىلىمەن شەنەسە، بىردە ۇلتىق جەتىستىكتەردى جىرعا قوسىپ ولەڭ سۇيەر اعايىنداردى ءبىر جەلپىندىرىپ تاستادى.
قازاقى ءداستۇرىمىزدىڭ جويىلىپ بارا جاتقانىن جەتكىزگەن قاناتبەك زەيتوللا ۇلى قارسىلاسى ارزىگۇلگە:
«ساقتاردىڭ سارقىتى ەدىك سالتى مايدا،
قول سوزعان اسپانداعى التىن ايعا.
مايلىعىم مەن سۋلىعىم دايىن دەيسىڭ،
ارزىگۇل اڭگىمەنىڭ ارتىن ويلا.
ەت جەسە قايىسارقانعا قولىن ءسۇرتىپ،
قىمىز ءىشىپ باتاتىن بالقىپ ويعا.
قايىستان نوقتا جاساپ جۇگەن ورگەن،
دالالىق ءداستۇرىمنىڭ نارقى قايدا.
نوقتا تۇگىل مىنەتىن ات ازايدى،
بولارسىڭ بۇل سوزىمە حالقىم اينا.
ەل ەدىك ەر-تۇرمانىن ارداق تۇتىپ،
ات قويعان قايىسبايعا، قامشىبايعا.
«ءايت» دەسە تامام اۋىل تىكسىنەتىن،
باياعىنىڭ ءباھادۇر قارتى قايدا،
قارتىڭنىڭ قادىرلىسىن تانىتاتىن،
التى تاسپا، بۇزاۋ ءتىس قامشىڭ قايدا؟» دەگەندە جينالعان جۇرتتىڭ شاپالاق ءۇنى كوپكە دەيىن باسىلمادى.
ءدۇبىرلى تويدا اقىندار ايتىسىنان باسقا ات بايگەسى، بۋرا ساندى بالۋانداردىڭ كۇرەسى، كوكپار، قىز قۋۋ ت. ب. ۇلتتىق ويىندار وينالدى.
ءۇش كۇنگە سوزىلعان ايتىستا باعى مەن بابى قاتار شاپقان ناعىمان شۇقان ۇلى، قاناتبەك زەيتوللا ۇلى، زۋرا تىلەۋ قىزى، ەرلان امانقوجا ۇلى قاتارلى اقىندار قىراعى وي، وتكىر ءتىلىنىڭ ارقاسىندا 1- دارەجەلى سىيلىقتى قانجىعالادى. 2- دارەجەلى سىيلىقتى ۇلاربەك ميناتحان ۇلى، انارگۇل بادەلحان قىزى، باقىتالى تىلەۋبەردى ۇلى، ارزىگۇل قايىمبەك قىزى قاتارلى التى اقىن قاناعات تۇتتى. قالعان اقىندار قاتىسقانى ءۇشىن ءتۇرلى باعالى سىيلىقتارمەن ماراپاتتالدى.
يمەدەت توقسانباي
Kazaitys.kz