قازاقستان رەسەيدەن كەلەتىن مۇناي ونىمدەرىنە شەكتەۋدى الىپ تاستايدى
«ياعني، ەندى رەسەيدەن مۇناي تاسىمالداۋ قىزمەتى بارلىق قاتىسۋشىلار ءۇشىن اشىق. ەسكە سالا كەتەيىك، ءبىز كوكتەمدە شەكتەۋدى ەنگىزىپ، وعان رۇقساتتى تەك «قازمۇنايگاز» ۇلتتىق كومپانياسىنا بەرگەن بولاتىنبىز. بۇل شارا نەگىزىنەن رەسەيدەن اكەلىنەتىن مۇناي ونىمدەرىنىڭ كۇرت وسكەنىنە قاتىستى بولاتىن. جالپى، بىزدە ءوزارا كەلىسىم-شارتتارعا قول قويىلىپ، يندەكاتيۆتىك بالانس بەكىتىلگەن، وندا ءبىزدىڭ ءبىر جىلعا باج سالىعىنسىز اكەلە الاتىن مۇناي ونىمدەرىنىڭ مولشەرى كورسەتىلگەن»، - دەدى مينيستر.
ونىڭ ايتۋىنشا، اعىمداعى جىلدىڭ ءبىرىنشى توقسانىندا رەسەيدەن تاسىمالدانعان مۇناي ارتىعىمەن ورىندالدى. سوعان وراي، كوكتەمدە ءبىر عانا وپەراتور تاعايىندالىپ، رەسەيلىك مۇنايدى جەتكىزۋمەن سول عانا اينالىسىپ كەلگەن ەدى. «جارتى جىل ىشىندە ءبىز ءوزىمىز مەجەلەنگەن مولشەردى جەتكىزىپ الدىق. ەندى ەش الاڭداماستان شەكتەۋدى اشىپ، كەز كەلگەن ۇيىمعا تاسىمالداۋ مۇمكىندىگىن دە بەرىپ وتىرمىز»، - دەدى ۇ. قارابالين.
وسىعان وراي، مينيستر قازاقستان جاعى شەكتەۋدى الىپ تاستاۋ تۋرالى بۇيرىققا قول قويعانىن، ەندى رەسەي تاراپىندا ونى كەلىسۋ پروتسەسى ءجۇرىپ جاتقانىن ايتتى. «ءبىز ولاردان شەشىم قابىلداعانى تۋرالى اقپاراتتى الىسىمەن وسى بۇيرىق كۇشىنە ەنەدى»، - دەدى ۇ. قارابالين.
اۆتور: قانات مامەتقازى ۇلى