وتاندىق ديزاينەرلەردىڭ قىتايدا تىگىلەتىن «برەندتتەرى» نەگە قىمبات؟
كاسىبي تىلدە "جوعارعى مودا" (ۆىسوكايا مودا) وتانى اتالاتىن ۇلتتارعا يتاليان، فرانسۋز، نەمىس، اعىلشىن، يسپان جانە ازيالىق ايداھار قىتايلىقتاردا كىرەدى ەكەن.
بىزدە دە باتىستان سوققان «فەشن-يندۋستريانىڭ» ادىمداپ باسقان قادامى قاۋقارسىز بولىپ تۇر. اسپانداپ وسكەن قۇنىنا ۇسقىنى ساي ەمەس.
ۇلدە مەن بۇلدەگە ورانىپ، ۇلتتىق برەندتى ماقتانا كيىپ ءجۇرۋ ءۇشىن «ايدا كاۋمەنوۆانىڭ» 125000 نان باستالىپ 200000 -300000 تۇراتىن شۇبەرەگىن ساتىپ الۋىڭىز جەتكىلىكتى.
بۇل قايدان شىققان باعا؟ وتاندىق كاسىپكەرىمىزدى اسىراپ تۇرعان ازىرشە باي-پاتشالار، دوكەيلەر مەن ەسترادا جۇلدىزدارى ەكەن.
ءوز كيىمدەرىنىڭ وتانىنان قاراعاندا شەتەلدە كوبىرەك سۇرانىسقا يە ەكەنىن ايدا حانىم ماقتانىشپەن ايتاتىن كورىنەدى. سونىمەن قاتار، ءوز ەلىندە ۇلتان بولۋدان گورى وزگە ەلدە سۇلتان بولۋدى قالايتىنداردىڭ ىشىندە ءانشى جانە از ۋاقىتتا ديزاينەر بولىپ ۇلگەرگەن ليدو ( ليديا دوسالينا) جانە بەت-ءپىشىنى دە قازاقتان گورى شەتەلدىك قىزتەكەلەرگە كوبىرەك ۇقسايتىن ساكەن جاقسىبايەۆتاردىڭ قولىنان تۋعان ونەرلەرى قاراپايىم حالىققا قول جەتىمسىز قىمبات.
قازاقستاندىق كيىم باعالارىنىڭ نەلىكتەن شارىقتاپ تۇرعانىن بىلە المادىق، ەسەسىنە "قازاقستاندا فەشن دامىماعان" دەگەن "عالامدىق" جاعداي بۇل كيىم تىككىشتەردىڭ سۇيىكتى ءسوزى اينالعان.
تۇركيانىڭ 12000 تۇراتىن ساپالى كويلەگى نەمەسە قىتايدىڭ 5000 تەڭگەلىك جەيدەسىن قاناعات تۇتىپ جۇرگەن حالايىققا 100000 تۇراتىن ايدەنىڭ كيىمىن نەگە المايسىڭ دەپ قالاي رەنجيمىز؟
ءبىزدىڭ فەشن-ەكونوميكامىز مۇنداي جاعدايدا قالاي دامىماق؟
ءوز پايىمداۋىمشا، باعانىڭ قولجەتىمسزدىگىمەن قاتار، وتاندىق تەكستيل وندىرىسىندە باسەكەنىڭ ازدىعى اسەر ەتەدى. ارزانداۋ تىگەتىن تىگىن فابريكالارىن كەڭىنەن اشىپ، زاماناۋي تەحنولوگيامەن قامتاماسىز ەتەتىن بولسا، جۇمىسسىزدار دا وتاندىق ديزاينەرلەر دە قارق بولىپ قالاتىن ەدى.
ءبىزدىڭ «زاماناۋي يندۋستريالدى-يننوۆاتسيالىق» دەگەن ءسوزدى ۇناتاتىن ۇكىمەت وسى سالاعا نەگە نازار اۋدارمايتىنىنا تاڭىم بار. جىل سايىن «ديزاينەر» فاكۋلتەتىن اياقتاپ جاتقاندارعا دا تاپتىرماس تاجىريبە دە بولارى ءسوزسىز.
ماسەلەن، ەۋروپالىق اتىنان ات ۇركەتىن برەندتىك - MANGO, MEXX, Dolce Gabbano, GUCCI, Prada سەكىلدى كيىم ماركالارى ءوز مەملەكەتتەرىندەگى ءوندىرىس ورنىن جاۋىپ، قىتاي رەسپۋبليكاسىنان فابريكالار اشقان.
وعان سەبەپ- ارزان جۇمىس كۇشى جانە تىگىن ماشينالارى مەن ماتەريالدارىنىڭ قىتايدا جاسالاتىنى. بەلگىلى برەندتىڭ تەحنولوگياسىمەن اينىتپاي تىگىپ شىعىپ، الەمدى اۋزىنا قاراتىپ وتىرعان ايماق.
بىزدەگى ديزاينەرلەر دە كورشىلەس تۇركيا مەن قىتاي تىگىن فابريكالارىنا تاپسىرىس بەرەدى. تىگەتىن فابريكا دا ادام دا ءبىر، ءبىراق باعاسى جەر مەن كوكتەي. ماڭداي تەرىڭىزبەن تاپقان قاراجاتىڭىزدىڭ جارتىلاي قۇنى تەك برەندتىڭ اتاۋىنا تولەنەدى.
جۋىردا استاناداعى "كەرۋەن" ساۋدا ورتالىعىنا كىرىپ، ايدا كاۋمە NOVA (جۇرتتار تەگىندەگى - وۆا، - يەۆادان قۇتىلا الماي جۇرگەندە، فاميلياسىنداعى ماعىناسىز جالعاۋىن بادىرايتىپ ۇلكەيتىپ قويىپتى. ول دا «برەند» شىعار.) دەگەن بۋتيككە كىرىپ باعاسىنا قىزىقتىم.
ساتۋشى كەلىنشەك قىسقاشا كويلەكتى 165000 دەدى. بۇل كويلەكتى كىم الادى دەپ تاڭقالدىم. ءبىز سەكىلدى كونتينگەنتكە ارنالىپ تىگىلمەگەن دۇنيە بولعان سوڭ ءۇنسىز شىعىپ كەتە باردىق. ودان ءسال وتە بەرە ZHSAKEN بۋتيگىنە كوزىمىز ءتۇستى. مۇنداعى باعا 65000, 50000 عا كويلەكتەر تابۋعا بولادى.
ارينە كاۋمەنوۆا حانىمنىڭ قاسىندا بۇل باعالار جاندى جۇباتادى، ءبىراق 50000 دەگەن قازاقستانداعى ورتاشا جۇمىسكەردىڭ ءبىر اي جۇمىس ىستەپ تاباتىن جالاقىسى. ال وڭتۇستىكتە ول مەن دەگەن مۇعالىم مەن دارىگەردىڭ اجەپتەۋىر ايلىعى. بولماسا، دەنى 20000-30000 ايلىق الادى. ول كىسىلەر دەمەك ديزاينەرلەرىمىزدىڭ كيىمىن كيە المايدى ەكەن عوي. كيمەگەنى دە دۇرىس، ويتكەنى ساكەن مىرزانىڭ دۇكەنىنە كىرىپ، كيىمىنىڭ باسى قايسى، موينى قايسى، اياعى قايسى ەكەنىن تاپپاي قالدىق. ۇيالعانىمىزدان ول جاقتان دا شىعۋعا ءماجبۇر بولدىق.
ايتا كەتەرلىگى، بۇل كىسىلەر كيىمىنە ەتنو ستيل قوسادى ەكەن. ياعني كيمدەرىن قازاقي ويۋ- ورنەكتەرمەن اشەكەيلەپ بەزەندىرەدى. قازاقيلىعىمىزدى كورسەتەمىز دەپ ۇگىتتەپ جۇرگەن كاسىپكەرلەرىمىزدىڭ ءوزى قازاقشا سويلەۋگە كەلگەندە ات تونىن الا قاشادى.
ۇلتتىڭ قامىن ەمەس، باسقا الىپ قوسارى بولماعان سوڭ، ۇلتتىق ستيلمەن قالتانى قومپايتىپ جۇرگەنى ايدان انىق قوي.
6-7 - شىلدەدە وتكەن استانا كۇنىنە وراي، قالا كوشەلەرىندەگى كورمەدە جۋىردا شىققان MUKAZHAN برەندىنىڭ ءامياندارى مەن سومكەلەرى ساتىلدى. ءبىر ءامياننىڭ قۇنى - 15000 تەڭگە، بەلبەۋ- 20000، قۇجاتتاردى سالاتىن ءاميان - 7000 نان 10000 بارادى ەكەن. باسقا بىلعارى ءاميانداردان ايىرماشىلىعى- اتىمدى وقىڭدار دا الا بەرىڭدەر دەگەن سەكىلدى ويۋى مەن مۇقاجاننىڭ ەسىمى ءمور بوپ باسىلعان. بولدى، باسقا ەرەكشەلىگى جوق.
سوعان قاراعاندا ءبىزدىڭ كاسىپكەرلەرگە «ەكونوميكا نەگىزدەرىن» قايتا وقىتۋ كەرەك-اۋ. نارىققا جاڭا شىققان كەز-كەلگەن تاۋار وزىنە ۇسىنىس تابۋ ءۇشىن الدىمەن باعا ساياساتىمەن قىزىقتىرماۋشى ما ەدى.
جۋىردا جاستاردىڭ MAKENZO برەندى جارىق كوردى. فۋتبولكالاردىڭ قۇنى 6500 تەڭگەدەن باستالادى. 2000-3000 تەڭگەگە ساتىلىپ الىنعان ماتانىڭ ۇستىنە باسپاحاناعا بارىپ، ابايدىڭ، باۋىرجاننىڭ، شاكارىمنىڭ بەينەلەرىن جابىستىرىپ الساڭىز، بەلگىلى «برەندتىڭ» يەسى بولىپ شىعا كەلەسىز.
ۇلتتىق ۆاليۋتامىز مەنسىنبەي قويعان ۇلى تۇلعالارىمىزدىڭ بەينەسى كۇندەردىڭ كۇنى ا ق ش-تىڭ جالاۋىنا ۇقساپ ءىش كيىمىزدە جەلبىرەپ جۇرسە تاڭقالا قويماسپىن.
فرانسۋزداردىڭ بەلگىلى ديزاينەرىكوكو شانەل ءوز زامانىندا بىلاي دەگەن ەكەن: "تاپتىرمايتىن مامان بولۋ ءۇشىن ۇنەمى ىزدەنىس ۇستىندە وزگەرىپ وتىرۋ كەرەك". بۇگىنگى جاس ديزاينەر قاۋىمنان تىڭنان جول اشقان ءبىر جاڭاشىلدىقتى كورسەك دەيمىز. ايتىلا-ايتىلا تىزەسى شىققان ويۋ-ورنەكپەن قازىر قوعامنىڭ كوڭىلىنەن شىعىپ، وق بويى وزىپ كەتۋ وسىدان 10 جىل بۇرىن باستالعان تەندەنتسيا. ءبىزدىڭ تىلەك - تەك ءسان الەمىندە " Made in Kazakhstan" اتىن كورۋ.
blogtime.kz