اقتاۋ جۇرتشىلىعى ۇلتتىق ويىن مەن سالت-ءداستۇردى جاڭعىرتۋدا - فوتو
قارت كاسپيدىڭ جاعاسىندا ماڭعىستاۋلىق جاستار ۇلتتىق قازاق ونەرى مەن ءداستۇرىنىڭ وتاۋىن تىكتى. قارا دومبىرانى كۇمبىرلەتىپ، ءدۇيىم جۇرتتى « دومبىرا- Party گە جيناعان ماڭعىستاۋلىق بەلسەندىلەردىڭ باستاماسى بۇگىندە جاقسى قارقىن الىپ كەلەدى. ودان بەرىدە اسىق اتۋدان سايىس وتكىزىلىپ، «قۇرالايدى كوزگە اتقان» مەرگەندەردىڭ باسىن قوسىپ جاتقان «اسىق- پاتي» تاعى بار.
كەڭ دالانىڭ قاسيەتىن بويىنا سىڭىرگەن، قازاقىلىعى قاندارىندا ويناعان رۋحتى جىگىتتەر مەن قىزدار تۋعان جەرگە دەگەن سۇيىسپەنشىلىكتەرىن وسىلاي تانىتۋدا.
سوڭعى ءبىر-ەكى جىلدىڭ ىشىندە ەلىمىزدىڭ تۇكپىر-تۇكپىرىندەگى جاستاردىڭ ساناسىندا سونى كوزقاراس، ەرەكشە سىلكىنىس، جاڭا لەپ پايدا بولدى. قازاقتىڭ ناقىشى، قازاقتىڭ ونەرى، دومبىراسى مەن اسىعىن ۇلتتىق يدەيانىڭ ءتۇپ-تامىرى ەتىپ العان ولكە جاستارى جىر مەن تەرمەنىڭ تيەگىن اعىتىپ، حاس ونەردى، ۇلتتىق مادەنيەتتى باتىل ناسيحاتتاۋعا كوشىپ كەتكەنى قاشان.
بۇل، ءبىر جاعىنان، « قازىرگى جاستار ءوز مادەنيەتىن ۇمىتىپ بارادى» دەپ سوگە جونەلۋگە اسىعىپ تۇراتىن كەيبىرەۋلەرگە «مادەني سوققى» بولسا، ەكىنشى جاعىنان قازاقىلىقتان الىستاپ، دۇمبىلەز بولىپ بارا جاتقان كەي جاستارعا ءجون كورسەتۋ، ولاردىڭ ساناسىن وياتۋ بولىپ تابىلادى.
جۇرتشىلىق اقتاۋدىڭ قاق ورتاسىندا وتىرىپ الىپ، دومبىرانى كۇمبىرلەتەدى دەگەن وي ءبىر كەزدەرى كوپشىلىكتىڭ ويىنا كىرىپ تە شىقپاعان بولار. ال بۇگىندە دومبىرا كەشىنە جينالاتىن تاۋەلسىز ەلدىڭ ەركىن ۇلدارى مەن قىزدارى جىردان دا، كۇيدەن دە كەندە ەمەس، اسىقتى دا الشىسىنان تۇسىرەدى.
ەلدىڭ ەلدىگىن كورسەتە بىلگەن، وتان سۇيگىشتىكتەرىن سوزبەن ەمەس ىسپەن دالەلدەپ جۇرگەن ولكە جاستارى رۋحاني تاربيە تىزگىنىن ۇزبەك ەمەس. الدا تالاي جاقسى جيىندار بولادى دەپ سەنەمىز.