تاريحي-ءدىني جادىگەر سەكسەن جىلدان كەيىن شىڭعىرلاۋعا ورالدى - ب ق و
ونى سول كەزدە شىڭعىرلاۋدا تۇرعان ءمىناۋرا بەكتەمىروۆا تاۋىپ الىپ، ساقتايدى.
اتالمىش تاتار وتباسى توقسانىنشى جىلدارى ورىنبورعا قونىس اۋدارادى.
مۇنى اۋدان تۇرعىنى مىرزابولات قۋانايەۆتان ەستىگەن اۋداندىق «سەرپىن» گازەتىنىڭ رەداكتورى اداق شوتپانوۆ ورىنبوردا تۇراتىن بەكتەمىروۆتەر وتباسىنا حابارلاسادى. سويتسە، «تەمىر اي» م. بەكتەمىروۆانىڭ ۇلى، قازىر زەينەتكەر، جاسى سەكسەنگە جەتسە دە، جۇمىستان قالماي جۇرگەن اسحاتتىڭ قولىندا بولىپ شىقتى.
جۋىردا اسحات اقساقال شىڭعىرلاۋعا كەلىپ، كونە جادىگەردى شىڭعىرلاۋلىقتارعا تابىس ەتتى. «نۇر وتان» پارتياسى اۋداندىق فيليالى ءتوراعاسىنىڭ ءبىرىنشى ورىنباسارى تىلەگەن قاليەۆ مۇنداي جادىگەردىڭ قاسيەتتى رامازان ايىندا ەلگە ورالىپ وتىرعانىن اتاپ ءوتتى. شىڭعىرلاۋدا تۋىپ-ءوسىپ، ەلۋ جىلداي تۇرعان ا. بەكتەمىروۆكە العىس ايتىلىپ، يىعىنا شاپان جابىلدى.
اۆتور: ەلجان ەرالى