ەلباسى ەلىمىزدىڭ بارشا مۇسىلمان قاۋىمىن كەلە جاتقان ورازا ايت مەيرامىمەن قۇتتىقتادى
19:26, 25 - شىلدە 2014
استانا. قازاقپارات - ەلباسى نۇرسۇلتان نازاربايەۆ قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ەرجان مايامەروۆپەن كەزدەستى، دەپ حابارلادى اقوردانىڭ باسپا ءسوز قىزمەتى.
كەزدەسۋ بارىسىندا ەلىمىزدىڭ رۋحاني ومىرىندەگى وزەكتى ماسەلەلەر تالقىلاندى. مەملەكەت باسشىسى قازاقستاندا ءدىني احۋالدىڭ تۇراقتى ەكەنىن، ءتۇرلى كونفەسسيا وكىلدەرى تاتۋلىق پەن كەلىسىم جاعدايىندا ءومىر ءسۇرىپ جاتقاندىعىن اتاپ ءوتتى.
سونىمەن قاتار، كەزدەسۋدە ءدىني ءبىلىم بەرۋ ماسەلەسى قوزعالدى. نۇرسۇلتان نازاربايەۆ جاستارعا رۋحاني- ونەگەلى تاربيە بەرۋدىڭ ماڭىزدىلىعىنا، سونداي-اق بۇل سالاعا مەيلىنشە مۇقيات تالداۋ جۇرگىزۋ قاجەتتىگىنە توقتالدى.
ە. مايامەروۆ مەملەكەت باسشىسىنا قازاقستان مۇسىلماندارى ءدىني باسقارماسىنىڭ قازىرگى جۇمىسى جونىندە باياندادى.
سوڭىندا قازاقستان پرەزيدەنتى ەلىمىزدىڭ بارشا مۇسىلمان قاۋىمىن الدا كەلە جاتقان ورازا ايت مەيرامىمەن قۇتتىقتادى.