وليمپيادا چەمپيوندارى پاتەرلەرىن جالعا بەرىپ قويىپتى
اۋىر اتلەتيكادان وليمپيادا ويىندارىنىڭ چەمپيوندارى سۆەتلانا پودوبەدوۆا، مايا مانەزا جانە ءزۇلفيا چينشانلو وزدەرىنە سىيلانعان پاتەرلەردى جالعا بەرىپ قويعان ەكەن.
وليمپيادا ويىندارىندا توپ جارعانى ءۇشىن سىيلىق رەتىندە العان پاتەرلەرىن اۋىر اتلەتتەر - سۆەتلانا پودوبەدوۆا، مايا مانەزا، زۋلفيا چينشانلو جانە ۆلاديمير سەدوۆ جالعا بەرىپ قويعان. مۇنداي اقپاراتتى سپورتشىلاردىڭ پاتەرى ورنالاسقان «جاڭا كەنت» تۇرعىن ءۇيىنىڭ باسشىلارى راستاپ وتىر.
اڭگىمەنى ارىدەن باستايىق. بۇعان دەيىن دە جازعانىمىزداي، اۋىر اتلەتيكادان وليمپيادا ويىندارىنىڭ چەمپيونى سۆەتلانا پودوبەدوۆا - «بىزگە 2009 -جىلى الەم چەمپيونى بولعانىمىز ءۇشىن تالدىقورعان قالاسىنان پاتەر سىيلانعان بولاتىن. مىنە، 5 جىلعا تايادى، وسى پاتەرلەر ءوزىمىزدىڭ اتىمىزعا اۋدارىلعان جوق. پاتەر ءوز اتىمىزعا جازىلۋ ءۇشىن بىزگە تاعى ءبىر الەم چەمپيوناتىندا جەڭىسكە جەتۋ كەرەك دەگەن تالاپ قويدى. ودان كەيىن ءبىز وليمپيادا ويىندارىندا جەتىستىككە جەتتىك. ءبىراق پاتەر سول كۇيىندە ءبىزدىڭ اتىمىزعا اۋدارىلعان جوق. مەن الماتى وبلىسىنىڭ اكىمى اڭسار تۇرسىنحان ۇلى مۇساحانوۆقا ەكى رەت وسى ماسەلە بويىنشا بارىپ، ءمان-جايدى ءتۇسىندىردىم. مايا مانەزا دا اكىمگە كىردى. الايدا ول ءبىزدىڭ كوزىمىزشە ءبىر-ەكى ادامعا حابارلاستى دا، ماسەلەنىڭ شەشىلەتىنىن ايتتى. ءبىراق ءالى كۇنگە ءبىز پاتەردى ءوزىمىزدىڭ مەنشىگىمىز دەپ ساناي الماي وتىرمىز. ءبىراق بۇل پاتەرلەردىڭ كىلتىن بىزگە كوپشىلىكتىڭ كوزىنشە سالتاناتتى تۇردە تابىستاعان بولاتىن»، - دەپ پاتەرىمنەن ايىرىلىپ قالۋىم مۇمكىن دەپ داۋ شىعارعان بولاتىن.
سونداي-اق سپورتشى بۇل پاتەرلەردى الماتى وبلىسىنىڭ سپورت باسقارماسى ولارعا ساتىپ الىپ بەرۋى كەرەكتىگى تۋرالى ايتقان. «سپورت باسقارماسىنىڭ پاتەرلەردى ساتىپ الۋعا مۇمكىندىگى بار. الايدا ولار وسى پاتەرلەردى قىزمەتتىك پاتەر رەتىندە بىزگە ۇسىنىپ وتىرعان سىڭايلى»، - دەيدى زىلتەمىرشىلەر. ودان بولەك سۆەتلانا سپورتشىلار 2009 - جىلدان بەرى ايىنا 135 مىڭ تەڭگە جالاقى الاتىنىن ايتتى. ونىڭ بۇل سوزدەرىن مايا مانەزا مەن زۋلفيا چينشانلو دا قولداپ، راستاپ وتىر.
ءبىراق، كەيىننەن الماتى وبلىسى سپورت جانە تۋريزم باسقارماسىنىڭ باسشىسى مۇحيت تۇرسىنبايەۆ سپورتشىلاردان پاتەردى ەشكىمدى تارتىپ المايتىنىن ايتقان ەدى. تۇرسىنبايەۆتىڭ ايتۋىنا قاراعاندا، زىلتەمىرشىلەردىڭ پاتەرلەرى جالعا بەرىلەتىن ۇيلەردە ورنالاسقان ەكەن. «ولار وليمپيادا ويىندارىنىڭ چەمپيونى اتانعان كەزدە قالاداعى جالعا بەرىلەتىن ۇيلەردىڭ قۇرىلىسى اياقتالىپ، ءبىز ولارعا سول جەردەن پاتەر بەردىك. ول كەزدە ءبىز سپورتشىلاردى قۋانتقىمىز كەلىپ، اسىعىس بەردىك»، - دەيدى ول. باسشىنىڭ ايتۋىنشا، جاڭادان بەكىتىلگەن «دەنە شىنىقتىرۋ جانە سپورت» زاڭناماسىندا وليمپيادا، پاراليمپيادا جانە سۋردليمپيادا ويىندارىنىڭ چەمپيوندارىن مىندەتتى تۇردە پاتەرمەن قامتاماسىز ەتۋ كەرەك دەگەن باپ بار. سۆەتلانا پودوبەدوۆا، مايا مانەزا جانە زۋلفيا چينشانلونىڭ پاتەرلەرىنە بايلانىستى ماسەلەلەردى سول زاڭنامالاردىڭ نەگىزىندە قاراستىرۋعا بولاتىنىن ايتتى.
سونىمەن قاتار باسقارما باسشىسى سۆەتلانا پودوبەدوۆا، مايا مانەزا جانە زۋلفيا چينشانلولاردىڭ الاتىن جالاقىلارى 135 مىڭ تەڭگەنى قۇرايتىنى جالعان دەدى. «الماتى وبلىسىندا 10 سپورتشى 150 مىڭ تەڭگەدەن، 10 ادام 100 مىڭ، 10 ادام 70 مىڭ، 10 ادام 50 مىڭ، جانە 20 ادام 30 مىڭ تەڭگەدەن الادى. بۇل جالاقى ەمەس. بۇل وبلىس اكىمدىگىنەن بەرىلەتىن ىنتالاندىرۋ. ال ولار بولسا مۇنى جالاقى دەپ ويلايدى. سۆەتلانا پودوبەدوۆا، مايا مانەزا جانە ءزۇلفيا چينشانلولار الاتىن 135 مىڭ تەڭگە - بۇل ەڭ ۇلكەن ىنتالاندىرۋ سوماسى. ال 2,5 مىڭ دوللار كولەمىندەگى جالاقىنى سپورتشىلار ۇلتتىق كوماندالار ديرەكتسياسىنان الادى. ول جاقتا سپورتشىلار ۇلتتىق قۇرامانىڭ مۇشەسى رەتىندە تىركەلگەن»، - دەيدى تۇرسىنبايەۆ.
«سۆەتلانا پودوبەدوۆا، مايا مانەزا جانە زۋلفيا چينشانلو 2012 - جىلعى وليمپيادا ويىندارىن جەڭىپ العان سوڭ وبلىس باسشىلارى سپورتشىلارعا 10 ميلليون تەڭگە بەرسە، جەكە دەمەۋشىلەر بۇل سپورتشىلارعا Toyota Land Cruiser-200 اۆتوكولىگىن مىنگىزگەن. ال، سپورتشىلار ول كەزدىڭ وزىندە ق ر باسشىلىعىنان 250 مىڭ ا ق ش دوللارىن الىپ قويعان ەدى»، - دەپ تولىقتىرىپ ءوتتى باسقارما باسشىسى.
ودان بولەك، تۇرسىنوۆتىڭ مالىمەتى بويىنشا، بۇل سپورتشىلاردىڭ جارىس الدىندا جانە جاتتىعۋ جۇمىستارى كەزىندە ەلىمىزدىڭ سپورت كوميتەتى ولارعا 1000000 كولەمىندە اقشا بولەدى ەكەن.
سپورتشىلاردىڭ جالاقاسى تۋرالى ءبىزدىڭ قولىمىزعا تاعى ءبىر اقپارات ءتۇستى. جوعارىدا بۇل سپورتشىلار وبلىس اكىمدىگىنەن ىنتالاندىرۋ رەتىندە 135 مىڭ تەڭگە جانە ۇلتتىق كوماندالار ديرەكتسياسىنان 2,5 مىڭ ا ق ش دوللارىن الاتىنىن ايتتىق. ال، ۇلتتىق كوماندالار ديرەكتسياسىنىڭ جەتەكشىسى قايىرگەلدى جانپەيىسوۆتىڭ اۋيتۋىنا قاراعاندا، بۇل زىلتەمىرشىلەر قازاقستان اۋىر اتلەتيكا فەدەراتسياسىنان دا 1,5 مىڭ دوللار كولەمىندە جالاقى الادى ەكەن. قاراپ وتىرساڭىز، سپورتشىلار ءۇش جەردەن 5 مىڭ دوللارعا جۋىق ايلىق الىپ وتىر. بۇل دەگەنىمىز ەلىمىزدەگى ورتانقول وتباسىنىڭ تابىسىنان ەكى نە ءۇش ەسە كوپ دەگەن ءسوز.
ەندى مىنا قىزىق ءجايتقا قاراڭىز. «ۆرەميا» گازەتىنىڭ ءتىلشىسى ساندۋعاش دۇيسەنوۆا سپورتشىلاردىڭ ايىرىلىپ قالامىز دەپ داۋ شىعارعان پاتەرلەرىنە بارىپ كورىپتى. ءبىراق، ول پاتەرلەردە قازىرگى تاڭدا سپورتشىلاردىڭ وزدەرى دە تۋىستارى دا تۇرمايتىن بولىپ شىقتى. ولار سىيعا بەرىلگەن پاتەرلەرىن ايىنا 65000 تەڭگەمەن جالعا بەرىپ قويعان ەكەن. بۇل مالىمەتتى «جاڭا كەنت» تۇرعىن ءۇي كەشەنىنىڭ ءتوراعا ورىنباسارى جەڭىس ىدىرىسوۆا دا راستاپ وتىر. «ولار بۇل پاتەردى العاننان كەيىن-اق جالعا بەرىپ قويعان. بەس جىل بويى بۇل پاتەرلەردى جالدامالى تۇرعىندار تۇرىپ كەلەدى. تەك قانا ۆلاديمير سەدوۆ ءوزىنىڭ پاتەرىندە ءبىر جىلداي عانا تۇرىپ، كەيىننەن ول دا جالعا بەرىپ قويدى»، - دەيدى ول.
«بىرەۋ توڭىپ، ەندى بىرەۋ تويىپ سەكىرەدى» دەگەن جاقسى ءسوز بار. ارينە، بۇل جەردە زىلتەمىرشەلىرىمىز تويىپ الىپ سەكىرىپ جاتىر. ايتپەسە، قازىر اكىمشىلىكتەن پاتەر الا الماي جۇرگەن ادامدار قانشاما؟
ستاتيستيكالىق مالىمەتكە سۇيەنەتىن بولساق، سول تالدىقورعان قالاسىنىڭ وزىندە 8093 ادام پاتەر كەزەگىندە تۇر ەكەن. ولاردىڭ قاتارىندا ۇلى وتان سوعىسى ارداگەرلەرى، اۋعان سوعىسى ارداگەرلەرى، مۇگەدەكتەر، كوپ بالالى انالار بار. مىنە، كەزەكتە تۇرعان وسى ازاماتتارعا قاراماستان اكىمشىلىك بۇل زىلتەمىرشىلەرگە پاتەردى كەزەكتەن تىس بەردى. ءبىراق، ولار بۇل سىيعا دا قاناعات تۇتىپ وتىرعان جوق. راس، بىزدە وليمپيادا ويىندارىنىڭ چەمپيوندارىن ماقتاپ، ماداقتاۋدا وزگە ەلدەرگە قاراعاندا الدىمىزعا جان سالمايمىز. دەگەنمەن، كەيدە وسىنداي جاعدايلاردا اسىرا سىلتەپ جىبەرمەيمىز بە ءبىز وسى؟!
اۆتور: ءۋاليحان قوسانباي
«الاش ايناسى» گازەتى