قىرعىزستاننىڭ بۇرىنعى پرەزيدەنتىن ءومىر بويى باس بوستاندىعىنان ايىرۋ تۋرالى سىرتتاي شەشىم شىعاردى

استانا. قازاقپارات - قىرعىزستاننىڭ بۇرىنعى پرەزيدەنتى قۇرمانبەك باكيەۆتى ءومىرىنىڭ سوڭىنا دەيىن باس بوستاندىعىنان ايىرىپ، قاماۋعا الۋ جانە مۇلكىن تاركىلەۋ شەشىمى سىرتتاي شىقتى، دەپ حابارلادى «ينتەرفاكس».

باكيەۆ 2010 - جىلى 7- ساۋىردە جاپپاي قىرىپ-جويۋدى ۇيىمداستىردى دەپ ايىپتالدى. وسىنداي كىنا تاعىلعان ونىڭ ءىنىسى مەملەكەتتىك كۇزەت قىزمەتىنىڭ بۇرىنعى باستىعى جانىبەك (سگو، جانىش) باكيەۆتىڭ دە جازاسى وسىنداي بولادى. سۋديا اعايىندى ەكەۋى دە قىزمەتىن اسىرا پايدالانىپ، ادام ولىمىنە قاتىسى بار دەپ تانىلعانىن مالىمدەدى. ولار 3 جىلعا مەملەكەتتىك قىزمەتتەن شەتتەتىلدى.

سونىمەن قاتار مەملەكەتتىك كۇزەت قىزمەتى باستىعىنىڭ بۇرىنعى ورىنباسارلارى دانيار دۇنگانوۆ پەن نۇرلان تەمىربايەۆ 25 جىلعا باس بوستاندىعىنان ايىرىلدى.

تەمىربايەۆ قىزمەتىن اسىرا پايدالانىپ، ميتينگكە شىققانداردى قارۋمەن اتىڭدار دەپ بۇيرىق بەرگەنى ءۇشىن ايىپتالدى. ارنايى قىزمەتتىڭ بۇرىنعى باستىعى مۇرات سۋتالينوۆقا دا وسىنداي كىنا تاعىلدى، ول 20 جىلىن تەمىر توردىڭ ار جاعىندا وتكىزەتىن بولدى.